أسرتي الجميلة

فتاة الاسلام · #1

كلنا يعرف الظروف التي نمر بها .. في الوقت الحالي من عطاله وبطاله

ويا سعد من وجد له وظيفة ... وطبعاً أغلب الوظائف " الجديده " إن لم تكن

كلها .. براتب لا يتجاوز الـ 1500 ريال سعودي .. وإن زاد وصل 1800 ريال

فهل هذا المبلغ قادر على .. أن يزوج الشاب ... ويتتم به نصف دينه ؟؟

وهل تقبلين بزوج يمتلك هذا الراتب ؟؟؟؟؟
و هل تفضلين الزوج صاحب المال والثراء ام الزوج صاحب الحب والحنان حتي ولو كان فقيرا .

وانت ايها الشاب
من تتمني الزواج منها --- صاحبة القلب الحنون والحب الجارف .. ام صاحبة الوجه الجميل الفتان .

نريد إجابات جاده وصريحه ويقبل بِها العقل ...

منقول

تحياتي
فتاة الاسلام

الاصيلة · 01-04-2004, 02:53 AM

اختي فتاة الاسلام

صدقيني لو رضينا من باب الحمية

واظهار الروح المتسامحة تظهر المشاكل بسبب المال وقلته

فالاولى ان اتركة حتى اجد من هو افضل منه

ودمتي

اختك الاصيلة

warda · 02-04-2004, 02:18 AM

اهلا اختي فتاة الاسلام

وانا مع اختي الاصيلة سيكون الزواج غير متكافئ وغير مقبول المعاش هذا بيدفع فيه ايجار وله اكل وشرب وله شنو ؟
الله يكون بالعون

خالد اليزيد · 02-04-2004, 03:31 PM

السلام عليكم

يعطيكم العافية والله الموضوع هذا ذو شجون

وله طابع خاص في النقاش

نأخذه بعين العقل شوفي يا وخيتي واحد راتبة 1500 أو 1800 أو 200 ما عاد تفرق في هالوقت

في البداية مثل هذا الشاب ليس عنده أي طموح بتقولون لي ليه أقول لكم السبب

أول شئ بما أنه لم يحصل إلا ع وضيفة ذات راتب قليل وأكيد أنها ع البند يعني مو رسمية

طيب ليه مايتحرك في التجرارة ففي حديث المصطفى عليه أفضل الصلاة والتسليم فيما معناه

تسع أعشار الرزق في التجارةتقولون لي وين يجيب راس المال

أرد عليكم وأقول عندك حراج بن قاسم ما يبي له أي راس مال يعني لو يشتر بـ 500 ريال أو ما يطلع من راتبه

صدقوني راح يتخل أضعافها بإذن

ولو خسر مره أو مرتين ما أظن راح يخسر في الثالثة

لأنه إنسان يبحث وعنده طموح في تطوير نفسة وتحسين دخله المعيشي

عندك التعقيب في الدوائر الحكومية ايضاً ما يبيلها راس مال

والله أن أحد الزملاء لي في العمل يقول صليت الفجر ونزلت لحراج الخضره

وشرا له شحنه خيار (دينا) وأول ما نزلها قام يبيعها في نفس الموقع قطاعي وبعدها أخذ له كم دوره

ع المطاعم والباقي جابه للعمل وباعه ع الزملاء

من صلاة الفجر إلي وقت الدوام دخل في جيبة مايقارب 300 في وشلون لو فتح له مبسط وأخذ يدية هو بنفسه

يعني العيب والله فينا

وإليي يبي يرفع من دخله المادي له طرق كثيره من خلالها يرتقي بحاله ومستواه

آسف ع الإطاله بس والله حبيت أبين وجهت نظري في هذا الموضوع

وإذا أستدعت الظروف شاركت مره أخرى في هذا الموضوع الحساس <<< في قلبه حكي كثير

مشكوره أختي الكريمة فتاة الاسلام ع نقل هذا الموضوع وكنت أتمنى أن أرى وجهت نظريكي في هذا الموضوع

وتقبلي تحياتي

أجّودي · 03-04-2004, 12:20 AM

السلام عليكم ورحمة الله وبركاته

طبعاً في الوقت الحاظر اغلب البنات مايقلب لتعدد الاسباب .... ومنها

انها تبي تلبس لبس كشخه وتمشي مع الموضه بالعطور وغيرها [ وماهو الكل البعض منهن ]

وإنها ماتحب شخص يكون راتبه قليل بالشكل هذا وتتفشل عند زميلاتها .

وإنها تفكر انها تبي تعيش عيشة فقر معه وتبي تعيش عيشة تعاسه كتفكير البعض .

ومسألة الراتب 1500 ولا 2000 ريال اهم شيء الشخص اللي يستلمه هو يتصرف براتبه بعقلانيه ولا شخص مبذر ومايبقى من راتبه شيء وثاني يوم من الراتب وهو طاير .

اذا هو شخص عاقل يبي يفكر بمستقبله واذا هو شخص حادرن له وادي يبي يصرف الراتب سواء كان قليل او كثير ماتعدى يومين .

أعرف أشخاص معي بالعمل ورواتبهم ماتتعدى 1600 ريال وعلى بند العمال [ فئة .. أ ] وعلاوتهم السنويه 95 ريال ومع هذا اثنين منهم تزوجوا والحمد لله مرتاحين ومبسوطين مع زوجاتهم .

والله ان الاول له اكثر من سنه بالعمل معي وتزوج والثاني ماكمل خمسة أشهر إلا وهو يعزمنا على زواجه

وإذا تبون تقولون يجيهم مساعدات ولا غيره المساعدات او العانيه مثل مانقول ماتجي غير قبل الزواج وماتوفي مع الزوج يعني لا مساعدات تنفع ولا عمل اضافي لهم .

مع ان واحد منهم زوجته مدرسه ورضت فيه ولو انها تبي تتخلف ولا تحسب للمشاكل الماديه مثل البعض اي حساب ماتزوجت ويمكن يفوتها قطار الزواج [ وتحتري لين يجيها واحد شاب ووزير ] << قابليني

والثاني زوجته ماتشتغل ومستانس ومبسوط ومايشتكي من شيء وماله دخل ثاني حتى اقول انه شبعان فلوس كل راتبه 1600 ومع هذا الله لا يضرهم مايشتكي من اي مشاكل ومرته حامل والله يستر عليهم

ويا اختي الاصيلة اذا الدعوة مال ماراح الواحد حتى يطالع بنفسه واذا هو موظف على البند وراتبه مايتجاوز 1500 مع الوقت يزيد وكل شخص مايرضى بالوضع اللي عايش فيه بوضع راتبه او غيره وكل الشباب يطاردون لتوظيفهم وكل مادخلوا محل يلاقون الف سبب لمنعهم من العمل واللي يوقف لهم ديوان الخدمة المدنية ومكتب العمل

واذا انتي مدرسه وغيرك من المدرسات يبي يطالع ويفكر بزوج المستقبل بأن يكون شخص [ فارِهـ ] ومعه سيارة كشخه [ وياليت فياقرا ] . ويسكنها في بيت ملك وياليت يكون قصر

هذا اللي يسبب للبنات العنوسه يضعون اللوم علينا ولو انها تتزوج اللي راتبه 1500 وتساعده وتبدأ معه وتحاول تشجعه يفتح له اي مشروع برأس مال قليل وينجح ونجاحه من نجاحها وسعادته من سعادتها هذا اللي اتوقع انه ماراح يصير لأن المرأه تفكر بسعادتها الماديه ماتفكر بسعادتها الزوجيه .

الا اقول ماودك بمدير مدرسه << كخخخخخخخخ ولا مدير ادارة التربيه والتعليم << ينقلك

والله ما ادري عن كلامكم اليوم تقولون كلام وبكره وقت الجد يتغير كل شيء

اللي مؤيد يعارض واللي يعارض يؤيد وغيرها [ ومن الحب ماقتل ]

ماعليش يا الاصيلة بس الواقع يحاكي المنطق والمشاكل العائليه ماهو سببها المال وبس لها اسباب كثيره .

المشكله ماهي قضية رواتب المشكله قضية العقول اللي ماتفكر غير بالمال

وبعدين بدال ماتكونوا متعاونين على اللي رواتبهم ضعيفه المفروض تتعاونون على وزارة المالية والتخلف المالي حتى يتم رفع رواتبهم وتعديلها لمستويات أفضل حتى يتم التكافؤ وتنحل ازماتهم الماليه .

الحقيقه الكلام يطول ولا عندي غير الكلام هذا الحين وما ابي اشتت الموضوع من نواحي كثيره واكتفي بالكلمات اللي كتبتها مع وجود الكثير بس ما اتوقع ان احد يبي يقتنع بالكلام اللي اقوله واللي يبي يقتنع قليل وليته يطبق

ولكم حرية الرأي والإختيار

أجّودي

warda · 03-04-2004, 12:46 AM

كلامك منطقي يا اجودي
بس لو حسبتها عدل ما توفي بعدين مو كل بنت همها المال ربك عطانا العقل تفكر انت تحسب زمن اهالينا هو نفس الزمن الحين؟؟ قبل كل شيء فيه بركه مع انه راتب قليل جدا بس مبروك انت شوف هذا اليه تقول راتبه 1600 احسب كم يطلع منها ايجار؟ كم يشتري منها لوازم البيت من ماكل ومشرب؟ السكن والاكل والشرب يالله يمكن يكفيها هذا
والوحده لو كانت تشتغل ورضت بالزوج هذا ما هو عيب دام هي راضيه تحط ايدها بيده ويتعاونون بس لما تكون هي ما تشتغل وشنو تسوي ؟ ووراهم عيال بعد انت مقتنع انه 1600 تكفي بيت وزوجه واولاد ومتطلبات كل منهم؟
وبعدين مو كل شيء تقولون البنت تبي وتبي وتبي اسم الله عليكم انتم بس تشوفون الفلوس زادت عندكم شوي اول شيء شنو تسون ؟؟؟ علطول تصكون الوحده بزوجه ثانيه

نرجع لموضوعنا
انا مع الاصيله في كلامها ومع ابو خالد ان الواحد لازم يسعى لطلب رزقة بس كوضع باني اقبل اليه يعيش على معاش ثابت مثل هذا لا اقبل واكيد ما في احد يحب ان ما يعيش عيشه جيده وانت تقول انها ما تفشل امام زميلاتها اظن هذا شيء ما يفشل اليه يفشل لما الواحد يمد ايده ويطلب المساعده من هذا وهذا

وبعدين انا اعرف بنات ساعدو ازواجهم تدري اول شيء شنو سواه الزوج ؟؟ تزوج عليها والله مو قصه فلم هندي لا والله واحد من قرايبنا سوه بزوجته كذا زوجته طلعته فوق فوق والله اشهد انها مرا سنعه بس هو مو كفو
انا ما اتكلم عن كل الرجال لا بعض وليس كل علشان لا تزعلون

المهم
ما هو عيب ان المرا تساعد الرجال بس بحدود المعقول يعني ما هي حلوه ان المرا تتحمل كل شيء وهو حضرت جنابه قاعد معتمد عليها بكل شيء وهذا في زمنا اليه حاصل وتقولون بعدين ليه الحريم صاروا رياجيل

sosah · 03-04-2004, 12:55 AM

اذا كان له وظيفه حره غيرها ممكن اقبل فيه بس اذا تقدم لي

أجّودي · 03-04-2004, 01:22 AM

اختي ورده هذا الكلام اللي ابيه ماهو كلمة وتقفلون على الموضوع وكأنكم اعطيتونا رأيكم وكله سطرين

واشكرك اختي وردة على ردك وتفهمك للموضوع وماهو كل الرجال اللي تعاونه زوجته يروح يتزوج عليها .. تلاقيها تعاونه بالمال وتحرمه امور كثيره او انها مقصره عليه حتى بالكلام .

وتقبلي تحياتي

سوسه على رجتك هذي اذا جاك واحد يخطب ترى المهر علي << يعني قابليني كخخخخخخخخخخ

وتقبلوا تحياتي

أجّودي

sosah · 03-04-2004, 01:27 AM

8
8
8
اتفقنا...

<<< ناويه توهقك...

خخخخخخخخخخخخخخخخ

بنت النور · 03-04-2004, 01:54 AM

والله يااااجماعه

انا من رااي انه عادي تاخذ البنت واحد راتبه 1500 ريال

اهم شي التدبر والله بتعيشهم في بادئ الامر وان شالله انه بيوصل لمرحله احسن من مرحلته الحاليه بتشجيع زوجته وتحملها على الحياه معه والوقوف معاه ع الحلوه والمره

اهم شي التدبر وعدم الاسراف

واهم شي ان المراه ماتتهتم لكلام الناااااس ولا تلتفت له بتاتا الزم ماعليها زوجها وبيتها

والله يعيين على هالدنيا

ومشكوره يافتاة الاسلام على موضوعك الرااااااااااائع جدا

مواضيع ذات صلة
الموضوع	الكاتب	المجلس	المشاركات	المشاركة الأخيرة
((===الـــتـــغـــطـــيـــه الـــمــبــاشــره لــخـــلـــيـــجــــ18ـــي===))	المجهول	عالم الرياضة	57	31-01-2007 09:05 AM

أسرتي الجميلة

كل مايختص بالاسرة والمجتمع وشئون المرأة والطفل

موضوع جدا حساس.هل تقبلين بزوج راتبه1500ريال"للنقاش"

حلى الكوكييييييييز.. سرييييييييييييييييع وخفيف

حوار بين الحشمة والسفور .. لقاء بين عباءة ساترة ، وعباءة كتف

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق