أختي الغالـــــــــيه ...توفي...
شاكره لك هذا الطرح القيم....والهادف...واللي نسعى جميعا الى الوصول اليه من خلال هذا المنتدى الرائع...

غاليتي...اعتقد ان الرجل اللي يلجأ للزواج الثاني وبدون أسباب مقنعه تماما...مثل اللي يذبح انسان برئ ماله اي ذنب..
تذكرت في هذا المقام بعض الأبيات التي أجد فيها اجابات على اسئلتك...وربما وصف للمعاناة..

عاد ليت اللي ذبحها وارهب الموت بوسيله.......ما دفن وجه الضحية والسكاكين ابنحرهــــا
ليت قلبه يوم طاوع فعلته كمــــل جميـــله ....... لو غسلها من عروقه وبكفن صدره قبـــرها
من حفر بضلوع قلبه حفرة تكفــي قتيــــله........ليه ما يدفن قتيله بالضلوع اللي حفرهــــــــا
اشتكيت للرفـــــوف والبراويــــز الهزيلــــــه ......وان ذعرت من النياح اللي سمعته في صورها
رحت أسولف للجبال الصم عن قصة رحيله......ما تركت متونها الا ينحــــت الدمــــع بصخـــرها

أبطرح رأيي وبكل صراحه وبعد عن المجامله...وتنميق الجمل...

أنا أشوف ان مابه انسان كامل ومهما كان اللي حصل بين الطرفين لا يمكن تنباع العشره بسهوله...
الحياة فيها الحلو والمر...والسهل والصعب...حرام تنبني الاحلام وتصير قصور وآخرتها بلحظة غضب أو هوى او طيش تضيع وتنهد...
انت مو كامل ...وانا بعد منب كامله...فليه ما أجبر أخطائك وقصورك بايجابياتي وحبي....وليه ما تزين أنت برجولتك وحكمتك وحنانك سلبياتي..
ليه مثل ما أنا رضيت بك قدري ونصيبي وقبلتك بعيوبك ترضى انت فيني وبعيوبي وسلبياتي..ولا عشانك بس تملك القدرة على الزواج الثاني ... والمرأة بالمقابل ما تملكه ....ترا مثل ما انت لك احاسيس هي بعد عندها مشاعر..
ليه ما نكون انا واياك ثنائي متوازن...والله سبحانه وتعالى يقول: ( وعسى أن تحبوا شيئا وهو شر لكم وعسى أن تكرهوا شيئا ويجعل الله فيه خيرا كثيرا..) وقوله تعالى : ( وعاشروهن بالمعروف فان كرهتموهن فعسى أن تكرهوا شيئا ويجعل الله فيه خيرا كثيرا )
سبحان الله..والله لو حنا بس نناظر شوي ونتدبر بكتاب الله وسنة نبيه كان عرفنا حل كثير من المشاكل اللي ممكن تواجهنا....
والرسول عليه الصلاة والسلام بما معنى الحديث قال ان كرهت منها خلقا رضيت منها خلقا آخر....
ولو مافي اطفال فانا ابقوله في امان الله وحياة سعيده...واطوي صفحتي معها..
ولو في اطفال فانا بعيش لعيالي وبس اما هو فينسى وجودي تماما ...لاني والله ماقعدت الا عشان هالاطفال لا تنهدم حياتهم... خلهم هم على الاقل يعيشون صورة الاسره بشكلها الجميل وبدون ما نقحمهم في مشاكل الأب والأم ....
وباعتبر أنا انه مات وانتهى..واسترجاع الماضي والحسابات والحزن لمآسيه جنون...وقتل للارادة..وتبديد للحياة الحاضرة...بالعكس أنا أبحط كل تركيزي بأطفالي وسعادتهم ومستقبلهم وبس ....
ولا رح أظلم بنت الناس بعد ولا رح أطلب منه يطلقها..لكن الله يهنيه ويهنيها بعيد عني أنا....
والفضايح وكشف الأوراق والأسرار انا ما أأيده أبد بس أبتناقش معاه بهدوء قدر الامكان وأمسك أعصابي ...حول كيف بتكون حياتنا بعد كذا وأحط له الخطوط الحمرا عشان ما يتجاوزها ...



عموما ما نقول الا الله لا يبتلينا ويسخرلنا...ويصلح لنا أزواجنا وذرياتنا ويجعلهم قرة عين يارب العالمين..



مع أرق تحياتي يالحبيبــــــــــه..