السلام عليكم ورحمة الله وبركاته

....(( مــدخــل ))....

** ندّعي المثالية لتبرير بعض مواقفنا وحين يكون موقفنا يستدعي العكس نقول اننا شعب متخلف ومجتمعنا فيه من الفساد الكثير ..

** نرجع في كل امورنا الى شريعتنا الاسلامية .. ولكننا نتناساها لمجرد رغبتنا في اشباع رغباتنا الحياتيّة ..

** نحاجّ ونخاصم من يخالفنا رأينا وقد تصل الى حد الشتم والسباب والقاء التهم اذا وصل النقاش الى طريق مسدود خاصة في المواضيع الحساسة ..

*** مشكلة مجتمعنا الوحيدة هي : عدم الثقة في النفس والشعور بالنقص والانهزامية والتحدث عن كل أمور الحياة من هذا المنطلق وغالبا يكون ذلك بطابع هزلي.. عدم الرغبة في التقدم والتفكير بمنطقية في أمورنا بحجة اننا " محناب كفو"..

----------------------------------------------------

فهد وسلمان شابان يعملان في مدينة بعيد عن اهلهما وكانا يسكنان في شقة لهما .. كانا صريحين مع بعضهما في كل امورهما ومتفاهمين وكانت علاقتهما أشد وأوثق من علاقة أخوين .. ظروف الغربة ومواقفها قربتهما من بعضهما اكثر.. فكان كل واحد منهما كتاب مفتوح للآخر ....
عاد سلمان من خارج الشقة متأخرا فوجد فهد يتحدث عبر هاتفه الجوال ..
سلمان : من تكلم ؟.. هذا فارس؟ !! سلم عليه بالله ..

فهد يحادث الطرف الاخر : سارة .. انتبهي لنفسك ،، فمان الله ياغالية .. وينهى المكالمة ..
سلمان : اهلن اهلن !!فهد : اركد .. الموضوع ماهو مثل ماتفكر فيه
سلمان : لا ياشيخ ياميّة من تحت تبن .. بتغازل من ورايه يلاا .. من جد ماتوقعتها منك!! افاا وتخبي علي؟؟
فهد : انا كنت باقول لك من اول بس خفت تفهمني غلط وخفت تغلط عليها وهي غالية حيييل عندي...
سلمان : شكلك تحبها من جد
فهد : سلمان خلاص عاد هذي صديقتي واعتبرها مثل اختي بليز اذا تحترمني لاتغلط
سلمان : وشو وشو وشووو .. بلا استهبال عاد .. وش السالفة؟!!..فهد : هذي بنت عندها ظروف صعبة .. ومشاكل مع اهلها .. تعرفت عليها بالنت .. وقامت تشكي لي وانا اشكي لها ونسولف وكذا .. وكبرت علاقتنا انا اعتبرها اخت لي وهي كذلك .. وعلاقتنا مع بعض علاقة أخوّة ..اذا ضاقت بها الدنيا لقتني قدامها مساحة ترمي فيها أحزانها .. تفضفض .. ترمي الكلام والهم من صدرها .. ونفس الكلام بالنسبة لي ....،،، سلمان .. لاتناظرني كذا .. اعرف اننا نمشي بطريق غلط وماندري وش نهايته .. بس اللي متأكدين منه .. اننا بدأنا هالعلاقة بالاحترام ونيتنا صافية وصادقة وراح ننهي علاقتنا بكل احترام .. لايمكن افكر فيها بأي طريق غلط .. وهي كذلك .. اخوان .. اخواااااان ،،
سلمان : هي متزوجة؟؟
فهد : ماتفرق متزوجة والا لا .. انا اكلم احساسها ومشاعرها واخلاقها .. نظرتي لها ماهي لاشباع غريزة او تفكير مراهق .. اووو حتى علاقة مستقبلية .. زواج او شي ..

سلمان : الله يوفقكم بس .. بس برضه مافكرتوا .. مثلا لو حبيتوا بعض .. او هي حبّتك ماتقدروا تتحكموا في مشاعركم ..
فهد : لا لايمكن .. احنا متأكدين ان مالنا طريق مع بعضنا بالحلال لظروفنا ونظرة مجتمعنا .. وظروف كثيرة عشان كذا لايمكن نسمح لأنفسنا بأي تفكير زي كذا .. وافضل من اننا نضحك على بعض بالكلام والاوهام والخرابيط .. كنّا صريحين مع بعض واتفقنا على كل شي بيننا من البداية ........ أرجوك افهمني .. ياخي وش تبيني اسوي؟؟ تبيني اسوي علاقات محرمة؟؟ أدشر؟؟ عاجبتك حياتنا كذا؟؟ بذمتك ياسلمان متى اخر مرة سمعت كلمة حلوة؟؟ متى اخر مرة حسيت ان فيه احد مهتم فيك وخايف عليك ومحسسك باهميتك وكيانك كبني آدم؟؟ يلعن امها عيشة اللي احنا عايشين فيها .. ؟؟ لا ويقولون ليش تغازلون وليش تدشرون ؟؟ ....... سلمان .. احنا فاققدين شي اسمه حنان !! فاقدين شي اسمه تقدير واحساس .. فاقدين شي اسمه حب .. حب مو خرابيط مراهقة وكذب أفلام أو حب لأجل مصلحة والا غرض معين .. حب صادق وصافي مبني على الاحترام والتضحية وتمني الخير ..
ومو بس احنا .. كثير من البنات زي كذا ..
والا بذمتك منهي المجنونة اللي تروح ترمي مشاعرها وحبها لانسان ماتعرفه ..الا لانها مالقت من يحس فيها .. مالقت من يسمع لها .. مالقت من يقدرها فاقده شي وتدور له بهالاوهام والحب والخرابيط .. وفي الاخير بتعرف انها كانت على غلط وبتندم ...

سلمان : فهد !! كلامك سليم والله كله صح .. بس ماتضمن الناس ياخي موب كل الناس نياتهم طيبة مثلك لو مثلا قلنا المفروض يسوون كذا وتكون علاقتهم بهالشكل .... بعديننن امممممم!!
فهد : وشو ؟؟سلمان : اخاف تزعل
فهد : لا لاتخاف انت اخر انسان بالدنيا ممكن ازعل منه !!
سلمان : طيب .. ممممم ترضاها على اهلك كذا؟؟
فهد : سلمان ؟!!! .. ليش تفكير الناس كذا .. كلما صار شي قال لي ترضاها لاهلك؟؟
انا اكلمك عن فئة معينة من البنات والشباب .. الناس المتدينين واللي محافظين .. الله يوفقهم .. هم اللي صح وياليتنا مثلهم !! انا اكلمك عن الناس اللي احتمال كبير انحرافهم !! أو انهم يدورون لهالاشياء اللي فقدوها بطريق حرام وعلاقات غير مشروعة !!!...سلمان : يعني تبي تقنعني ان علاقتكم مشروعة؟
فهد : طبعا لا .. بس احنا موب نضحك على انفسنا وندّعي المثالية .. احنا نسوي اشياء غلط اكبر من كذا ولانعتبره غلط .. وبعدين انا اشوف ان هالشي او هالعلاقة تحمي من غيرها ومن اكبر منها .. وحسناتها اكبر بكثير من مساوئها .. عارف ان المفروض مانسويها وممكن يكون فيه شي افضل .. بس ارجع واقول احنا مانغالط انفسنا وندّعي المثالية ..
سلمان : أقول تصبح على خير شكلي والله مابنام الليلة باجلس افكر في كلامك ..
فهد : وانت من اهله .. نفسي أحد يفهمنا ويصدقنا .. نفسي

أ.هـ

------------------


السؤال باختصار : ما رأيكم في وجهة نظر فهد وسارة ؟؟؟
موضوع للنقاش .. كل له وجهة نظره ويجب احترام وجهات النظر
رجاء : اللي بيشارك بالموضوع وبيزعل او بيغلط عالناس رجاءا لايرد
كنت بانزل الموضوع في منتدى العامه .. بس اتوقع انه يناقش قضية أسريّة اكثر علاوة على انني احب العامه مررة ..


تحياتي واحترامي للجميع

بـــس

مرحبا البدر

لاتزعل ياخوي ...

كثيرين يتابعون الموضوع حتى لو ماشاركوا ..

عن نفسي ... اشوف جانب من الموضوع تطرقت له في طرحي " أريد حباً "


حقيقي موضوع يستحق المناقشة ..

السلام عليكم ورحمة الله وبركاته

اخيرن قررت وتجرئت ورديت في منتديات الرياض مدري كتاباتكم وردودكم تروع اتخيلكم شباب وشابات كلكم لابسين ثياب ومصفطين الكموم والعضلات مفتولة والغترة على الكتف ولابسين زبيريات متقطعه من كثر التسحيب بها في المشي
ياي منضركم غير شكل رهيب

البـــدر الكاتب المبدع طالما استمتعت بقراءة مواضيعك قبل التسجيل واخيراً بقدر ارد على موضوع لك

وعلى فكره ترا موضوعك هذا هو الي خلاني اسجل بس من شان ارد عليه

نرجع للموضوع

يمكن الي خلاني ارد على موضوعك هو تحاشي الكثير من الاعضاء الخوض فيه وهذا الي شجعني اكثر على الرد يمكن يتجرؤن ويردون عليه بكل صراحه وجرائه :

واسمع كلامي وانا وخيتك يا البدر

اللي محتاج حنان وحب ومن ذا الكلام احسن حل انه يتزوج وبالحلال يملي الفراغات العاطفية اللي بحياته..اما حكاية انه يكلم بنات الناس بحجة طلب الحنان فانا مااتفق معاه فيها لانه شي مرفوض عرفيا وشرعيا, واستحالة بيسلم من ضميره, وين الراحة اللي يدور عليها؟

بالنسبة للعذر البايخ (برايي) واللي هو انهم مجرد اصدقاء واستحالة تتحول علاقتهم الى حب ومدري ايش فهذا غلط..هو ايش دراه عن مشاعره؟ هو اصلا ماكلمها الا عشان يبادلها مالشاعر اللي في مرحلتهم يتكون الحنان, لكن مصيرها تتطور وممكن تصير حب, ساعتها راح ياخذها كزوجة له؟؟ ماظنيت..طيب ليش من الاساس يتعلقوا ببعض وهم عارفين انه فيه امل كبير انه علاقتهم تنتهي بشكل مأساوي؟؟

على فكره البـــدر

وقت ما قرينا موضوعك (( يعني انا ووحده من ربيعاتي )) علقت انا في ردي الي فوق وهذا الرد راح يكون لها واسمها (( الدانه ))

---

صراحه وانا اختك بطلق عليك كاتب الساعه ماشاء الله عليك مواضيعك قوية ومواكبة الحدث
نجي للموضوع محل البحث, كنت ناوية اكتب تعليقي لا وصلت البيت بس حسيت التعليق رافض إلا أن يتصادر مني بهاللحظه فقلت إكرام التعليق إهداره
شف وانا اختك ماراح اتكلم بصيغه المستنكر والرادع لانه واضح فيه قناعة وفيه تبرير قاعد يطرح ويزين هالموضوع في بال فهد وساره فانا ودي نمشي خطوة خطوة معاهم <-----عندي احساس فيه ناس وصلوا عند هالمقطع وبدو يغنون ألالالا يالليل ماطولك

شف الله يرضى عليك حنا في مجتمع فكرة الاختلاط عموما مرررررفوضة شكلا وموضوعا وبدوووون نقاش يعني رجال من المريخ ونساء من الزهره تناسب فكرة مجتمعنا طيب هذا الحال العااااام والي تربينا ونشأ عليه فهد وساره
طيب هم لما تجاوزو حاجز العرف والتربيه بإنهم سمحوا بهالتواصل القريب والي تطور من تخاطب قكري نتي إلى تخاطب صوتي لاحظ التطور في تجاوز الحواجز
طيب وهم كانو يقفزون على هذه الحواجز اكيد كان فيه رادع داخلي يهيبهم من تجاوزه واكيد فيه امل ومها وريم ومساعد وعبدالله يفكرون مثل تفكير فهد وساره(

اقتباس الكاتب : البـــدر فهد : هذي بنت عندها ظروف صعبة .. ومشاكل مع اهلها .. تعرفت عليها بالنت .. وقامت تشكي لي وانا اشكي لها ونسولف وكذا .. وكبرت علاقتنا انا اعتبرها اخت لي وهي كذلك .. وعلاقتنا مع بعض علاقة أخوّة ..اذا ضاقت بها الدنيا لقتني قدامها مساحة ترمي فيها أحزانها .. تفضفض .. ترمي الكلام والهم من صدرها .. ونفس الكلام بالنسبة لي ....،،، سلمان .. لاتناظرني كذا .. اعرف اننا نمشي بطريق غلط وماندري وش نهايته .. بس اللي متأكدين منه .. اننا بدأنا هالعلاقة بالاحترام ونيتنا صافية وصادقة وراح ننهي علاقتنا بكل احترام .. لايمكن افكر فيها بأي طريق غلط .. وهي كذلك .. اخوان .. اخواااااان ،، فهد : ياخي وش تبيني اسوي؟؟ تبيني اسوي علاقات محرمة؟؟ أدشر؟؟ عاجبتك حياتنا كذا؟؟ بذمتك ياسلمان متى اخر مرة سمعت كلمة حلوة؟؟ متى اخر مرة حسيت ان فيه احد مهتم فيك وخايف عليك ومحسسك باهميتك وكيانك كبني آدم؟؟ يلعن امها عيشة اللي احنا عايشين فيها .. ؟؟ لا ويقولون ليش تغازلون وليش تدشرون ؟؟ ....... سلمان .. احنا فاققدين شي اسمه حنان !! فاقدين شي اسمه تقدير واحساس .. فاقدين شي اسمه حب .. حب مو خرابيط مراهقة وكذب أفلام أو حب لأجل مصلحة والا غرض معين .. حب صادق وصافي مبني على الاحترام والتضحية وتمني الخير .. ...

طيب امل ومها وعبدالله .... الي تهيبوا من تجاوز الحواجز لما نجي نقول إنه هالصورة المثاليه(لفكرة ساره وفهد) من مخاطبو جنسين مختلفين لايرتبطون بااااي علاقه ونغلفها كبدايه بصداقه نتيه لاضير فيها فهي مجرد افكار وخطوط كيبورديه ليس لها من الواقع شي وهكذا تبدا إلى ان تنتهي مافيها شي جلسه بكفي بين الناس بس لانه التواصل الفكري راح يكون اكبر لما تتواصل النفوس وتتلاقى العين فللعين لغة قد تغني عن الكلام طيب السؤال كم حاجز راح يتكسر ؟؟؟؟؟؟؟ كم راح يزين الشيطان لفهد وساره من امور خطأ هم عارفين إنها خطأ بس للاسف الشيطان مزينها ومبررها لهم لحد مايقعون فيما تكون صدمة لهم او تكون لهم زي الي كسر حاجز رهبة عمل الذنب فيستمرى عمل الذنوب لانه خلالالالاص مخربها مخربها
اعتقد يضحك على نفسه او تضحك على نفسها من تؤمن بوجود صداقه بين جنسين
نعم قد توجد زملاة عمل لانه لها ضوابط ولها احكام تقتضي وجودها وتنظمها بس الصداقه تواصل بلا حدود حتى تصبح صداقه بمعناها الاصح اما من وجهة نظري من يخدع نفسه بوجود الصداقه بين الجنسين فهو يوهم نفسه ليبرر عدم تمكنه من تحويله لحب وتجد دليل على كلامي من كلام فهد

اقتباس الكاتب : البـــدر فهد : لا لايمكن .. احنا متأكدين ان مالنا طريق مع بعضنا بالحلال لظروفنا ونظرة مجتمعنا .. وظروف كثيرة عشان كذا لايمكن نسمح لأنفسنا بأي تفكير زي كذا .. وافضل من اننا نضحك على بعض بالكلام والاوهام والخرابيط .. كنّا صريحين مع بعض واتفقنا على كل شي بيننا من البداية ........... [/color]

وانا اختك الموضوع متشعب ودهاليزه كثيره فاتوقع لي رجعه [/color]