السلام عليكم,,

<----- ابد ماطلع غبار من سلامها

يووه يا قدمي بعد انا...اخبر آخر مره كتبت موضوع فيذا من اكثر من شهر , بس لاتخافون تراني اشقر عليكم من فتره لفتره

<---- مايجرها من شوشتها الا ريحه طبخات معانق اليل تالي الفجور

ايه صح نسيت ابارك لشيف معانق اليل على المركز الاول <--- تو الناس

---------------------

نخش في المفيد

بنشوف الحين مشهدين من حياتنا, ونبي نقارن بينهم

<----- اصلا ماذبحتس الا هالمقارنات

احم احم, خلونا الحين نرفع الستار ونشوف

<------- مهيب عاقله شكسبير زمانها

خلاص عاد بلا تعليقات مالها داعي؟

<-------

&&&&&&&&&&


(( الموقع / سوق ..... مول( يقالكم ماتبي تسوي دعايه ),, الزمان/ 9 مساء( اتقطع على الدقه انا) ))

فهمي : بُصي يا ناديه في الفستان ده.. حياكل منك حته.. ايه رايك فيه؟
ناديه: مُش بطال... بس اللون ده مش عاجبني.. لو حلبسه حيخليني زي البادنجانه
انا : ( <------ قطت اذنها معهم)
فهمي: ولا يهمك يا أمر(قمر يعني).. حسألك عن الالوان.. يمكن نلائي لون يعجبك.
ناديه: طاااااايب

( وبينما ناديه وفهمي يتشاورون في هاك الخلق, ومعهم ابنيهم فتحي 5 سنوات ,, وعماد سته اشهر في العربيه(( <--- مشبرتهم بعد )), انطلقت صافره الانذار معلنه صياح عماد)

ناديه قطت الخلق من يدها بصوره مخيفه) اللــــه .. ده عماد بيعيط !!
فهمي: (بوجه بشوش ) مُوش مشكله يا حبيبتي.. كملي انتي وانا حاخذه برا المحل امشيه شويه عشان يسكُت.
( والله يانا علقت على هالضمات <---- شاة بدو وطاحت بمريس )
ناديه :

( انشغل مصطفى خارج المحل مع اولاده.. تاره يعطي عماد مصاصته..وتاره يمسح خشه فتحي من عقب الآيسكريم الي كله ..والبسمه تعتلي محياه .. وبينما هو كذلك خرجت زوجته من المحل بعد ان نقت الفستان الذي تبيه وحاسبت عليه.. ولما خلصوا لف ودوران وتعشوا..ساروا جنباً الى جنب متجهين الى بوابه الخروج.. مجرجرا فهمي عربيه ابنه عماد.. معلقهً عليها المقاضي(تسمع بأمانه التوصيف) ..بكل سعاده وانبساط

<------- عسى ماركبتي معهم السياره بعد؟

---------------------------------------------------------------------

(( في نفس الموقع والزمان ولكن مع عائله سعوديه))

<------ موصيه المهـــره تلاحقهم

صالح :لا والله شكلتس منتب جايه تشترين انتي!! .. الظاهر جايه تتمشين ذا رابع محل ندخله يالعله ولا بعد شريتي
ساره: ( وجه خانقته العبره ) شوي بس تكفى والي يرحم والديك .. والله مالقيت شي زين. . يعني تبيني اخم اي شي والسلام؟ هذاك الزهري الي شفناه تو زين بس مهنا مقاسات , وهذيك التنوره واسعه حيل علي .. تكفى شوي بس لازم اشتري اليوم العزيمه بكره وماعندي شي البسه
صالح: اقووول عاد . . المحل الجاي آخر محل لتس.. اشتري ولا ترى طلعنا وان شاء الله عمرتس ماشريتي ومارحتي!
ساره :

( وبينما ساره منهمكه في المحل بحثا عن شي مناسب مدفدفه العربيه امامها , انفجرت ابنتها الصغيره بكاءً من الجوع.. وكاد برج من نافوخها يطير ايضا بسبب الحاح ابنها فهد (7 سنوات) بأن يشتري بالونه بعد ان اعطاه والده ركبه.. مجرجراً بذلك عباءه امه.. ساره ماكان بينها وبين الجنون إلا شعره .. ماعرفت وش تسوي ووش تبدي بينما زوجها قابعا خارج المحل يقلب في الجوال )

ساره: ( طلعت من المحل متجهه الى صويلح( <-- حقدت عليه من جد انا ) صالح.. تكفى امسك العربيه شوي خلني اعرف اتقضى , وترى فهد اذاني يبي بالونه.. اشتر له وفكنا من حنته
صالح : ( وعلى وجه انواع علامات التذمر والعصبيه ) اقووول .. اها بس مشيناااا.. الله ياخذتس انتي وبزارينتس
ساره : <------ خافت من الفشايل


(( طلعوا ساره وصالح من السوق بخفي حنين.. الرجال وصل السياره وزوجته توها في السوق مابعد وصلت.. بيد تدف عربيه بنتها واليد الثانيه ماسكه بها ولدها ..ودمعتها على خدها
..لدرجه ان كل من شافهم قام يركض يحسب انهم في سباق الماراثون ))




كل هالمشهدين بصراحه من وحي خيالي , لكن ذا مايمنع انهم موجودين ونشوفهم دايمن في الاسواق والاماكن العامه والمنتزهات, يعني مهوب بس في سوق.

بصراحه,, انا لا شفت طريقه تعامل الاجانب (العرب وغير العرب حتى) مع زوجاتهم تخنقني العبره , مدري ليه مانشوف السعوديين يسوون سواتهم مع اطفالهم وعائلاتهم, لاشفت سعودي مع زوجته واولاده يتمشون تحس كنه مغصوب على الطلعه ومايرتاح الا رجعهم البيت وطلع عاد هو مع ربعه للاستراحه , مايدري ان زوجته واولاده لهم حق عليه بالاهتمام والطلعات لو مره او مرتين بالاسبوع حتى,بدون منه ولا تكشيره ..

اما الاجانب تلقى الاب في معظم الاحيان هو الي يقترح على زوجته واولاده انهم يطلعون ويرفهون عن انفسهم, ولا تجوز له الطلعه والوناسه الا وهو بين زوجته وعياله لو في سوق ,حتى يشارك زوجته مع اختيارها لملابسها ويشور عليها ..ويساعدها في حمل الاطفال والاهتمام بهم


وتبون تصدقوني اكثر.. شوفوا كم عدد الحريم الاجانب الي طالعين مع ازواجهم واطفالهم لـ( السوق مثلا ) , وقارنوهم بالحريم السعوديات ..

طبعا كلامي هذا مهوب عام.. لان اكيد فيه ازواج من نمونه الاجانب , بس الصراحه معظم السعوديين كذا المتزوجين وغير المتزوجين بعد, تحسون ان بينهم وبين الطلعات مع الاهل عــــداوه ياكافي



وش رايكم بالله؟ متفقين معي ولا لا؟ ووش الحل بنظركم ؟




انتهى

<------ للحين متأثره بأسئله الامتحانات