حياك الله يالغالية

موضوعك جميل جداً

ويهم شريحة كبيرة من أعضاء المجالس

شوفي يالغالية

ولد بثاني ثانوي معناتها انه يعيش المراهقة في أعلى مستوياتها

وطبعا اذا انتي جامعية وسبق ودرستي شي عن علم نفس النمو فراح تعرفين خصائص هالمرحلة بالذات

في هالمرحلة يحاول المراهق لفت الأنظار إليه .. لفت النظر بأي طريقة .. حتى وإن كانت خاطئة .. بل حتى وإن كانت شاذة ..

وهذا سلوك طبيعي جداً .. البعض يسلك سلوك التدخين .. والبعض القصات الغريبة .. والبعض اللباس الغريب .. والبعض التفحيط .. وعدد كبير من السلوكيات المتنوعة ..

أفضل طريقة حسب وجهة نظري هي كسر الحواجز الأسرية بينكِ وبين أخيكِ .. فلا تقومي بدور الموجه دائماً .. لا تفعل .. لا تخرج .. وغيرها من الأوامر ..

حاولي يالغالية إنك تدخلين جوه وعالمه الخاص .. مثلاً سولفي أنتي وإياه عن الاستهبال بالمدرسين .. واذا قالك سالفة سواها مع المدرس وصرقع فيه لا تقولين له هذا غلط ..

لا لا لا .. اضحكي وقولي الله يقطع ابليسك يا منسم .. فهمتي علي .. يعني قومي بدور خويه بالضبط .. هو طبعاً بيتميلح ويعطيك من الرخيص بس انتي عطيه جوه

اذا شفتيه بدا يسترسل معك بالكلام ويسولف لك عن مواقفه وقصصه فهذي دلالة على إنه مرتاح لك وواثق فيك .. واذا ارتاح لك ووثق فيك فأكيد راح يتقبل منك ..

لكن لا تنصحينه بعد بطريقة مباشرة .. خلي نصايحك بطريقة غير مباشرة .. يعني مثلاً الاستهبال على المدرسين .. اذا خلص سالفته وضحكتي وعطيتيته جوه قولي بس انتبه ترى موب كل مرة تسلم الجرة .. هالمرة عدت وما درى عنك الحصة الجاية خلك عاقل واللي بعدها هبل فيه عادي

وبهالطريقة راح تلاحظين شي عظيم .. وهو إنك كسبتي أخوك .. نعم كسبتيه .. لأنه بدال ما يروح يبحث عن صديق خارج أسوار المنزل يفهمه وجد هذا الصديق داخل اسوار المنزل ..

لكن سياسة المواجهة المباشرة نتيجتها لحظية .. لو شفتيه يدخن وهاوشتيه وفتشتي غرفته وطلعتي علبة الدخان وجبتيها قدامه وقلتي شف لا تكذب علي فصدقيني انك ما سويتي شي .. بل بالعكس خليتيه يعاندك ويتعلق فيه أكثر .. لأن المراهق يرى أنه ينتقم منك بالطريقة هذي .. اللي هي الإصرار على الخطأ ..

انا كثرت كلام والظاهر إني ضيعتك لكن اذا افطرتي الليلة ان شاء الله وفتحتي مخك تعالي اقريه ..

عسى الله يخليلك أخوك ويعصمه عن كل شر ..

والولد والبنت يتفقان كثيراً في طريقة المعاملة .. والاختلاف في الجزئيات البسيطة اللي تتعلق بطبيعة وتكوين البنت الفسيولوجي المختلف عن تركيبة الولد ..

لكِ كل الود ..