عطوني رايكم اذا سمحتوا

انا الترس انا انسان ترتيبي الرابع بين اخواني والأصغر فيهم .. وجميعهم متزوجين ماعدا أنا ولا يوجد لدي خوات.. توفيت والدتي رحمة الله عليها من حوالي العشر سنوات وأسكن مع والدي (ابو عبدالله) الله يمتعه بالصحه والعافيه .. بعد وفاة والدتي أصيب والدي بفشل كلوي .. وأبتدت رحلة العلاج ( غسيل الكلى ) الا انها لم تدوم طويلا حيث قررنا زراعة كلية له ..ولم نرغب في اجرائها في دول اسيا..
المهم بعد التحاليل والكلام هذا كله اتضح اني أنسب واحد صحيا ونفسيا للتبرع.. لآن مهوب الشغلة بس مطابقة فصيلة الدم لا .. فية شغلات ثانيه لازم تكون مطابقة في الدم ..صفائح الدم ومدري ايش المهم تم التنسيق مع الدكتور شلبوط اللي في التخصصي الله يذكره بالخير والدكتور المشاري ودكاتره ثانيين الله يذكرهم بالخير ..ومايو كلينك في امريكا .. المهم رحنا وسويناها وبعد 5 شهور رجعنا طيبين.. وبعد شهر من رجعتنا جتني انتكاسه دخلتني للمستشفى حوالي شهرين .. المهم طلعت والحمدلله الكلى عندي وعنده شغاله زي الحلاوه والأمور تمام ...بعد 4 سنوات حصلت مشكله للوالد(ابو عبدالله) في الكبد .. نقص حديد وتعطل وظيفة الكبد .. المهم لازم تبرع بجزء من الكبد .. وماأطول في السالفة انا اللي تبرعت له بجزء من الكبد بعد صجة ولجة ولا ومايصير انت متبرع له بكليه وفيه خطوره على حياتك وكلام كثير .. المهم بعد التنسيق والفحوصات وكنت المره هاذي أصعب لأن الكبد اصعب من الكلية.. وبعد التنسيق مع التخصصي والدكتور السبيل الله يذكره بالخير ودكاتره ثانيين امريكان وواحد اردني ومايو كلينك وشغله طويله عريضه سافرت انا والوالد(ابوعبدالله) وممرضه امريكيه من التخصصي أسمها (ليزا) سمراء وكشتها طايرة والوالد يسميها (نفيسه) .. وبعد معنا ممرض مصري مطوع اسمه عادل عندنا في البيت.. ويوم السفر كان لابس كرفته بغى يزنط نفسه ..المهم وصلنا نيويورك النفسيات خايسه ماغير نتفل على بعض هههههاي..ورحنا لمايو كلينك وصلنا وأستقبلونا وخذوني بالأحضان يوم عرفوا اني ابتبرع لأبوي بالكبد .. المهم ماأطول عملوا فحوصات كثيره وأختبارات وسوينا العملية.. وجلسنا في العناية وبعد كذا قلبت الأمور معي ودخلت في العناية الفائقه بين الحياة والموت اشتبهوا في تكسر مفاجىء للصفيحات الدمويه وألتهاب حاد ومدري ايش.. المهم أنطقيت تقريبا ثلاث أسابيع ..بعد كذا طلعت من العنايه وجلسنا تقريبا 6 شهور نقاهه.. الوالد(ابو عبدالله) الله يعطيه الصحه والعافيه متقبل للعلاج والوظايف الحيويه للجسم عنده ممتازه وبالنسبه لي نص ونص... صار عندي برود عجيب فوق ماأنا بارد وعجاز خلقه .. وصرت كثير نوم .. وصار يجيني بروده في الأطراف بدون سبب .. وصرت أستخدم كمام طبي لأن المناعه عندي ضعفت شوي .. بس والله العظيم ياجماعة الخير لين شفت أبوي مبسوط هو وشعره ذا الأشهب اني انبسط وتهون على الدنيا.. المهم جلسنا حوالي ست شهور وكنت فيها ممنوع من أكل وشرب حاجات كثيره .. وخلال الفتره هاذي استأجرت واحد جاء يعلمني الدي جي .. واحد تكروني اسمه (مايك) وعليه مناخر تقول فتحات دربيل هعهعهعهعهعهعهاي.. وكنت وقتها أخذ 13 نوع من العلاجات.. منها حبوب مضاده للأكتئاب وسألتهم ليش قالو هذا طبيعي بعد النوعيه هاذي من العمليات..قلت لا ماأبيها قالوا لا لازم تاخذها قلت معصي ( طلعت شطانة وعناد حواري عليشه أول ) قالوا خلاص لازم تشوف الدكتوره اللي كتبتلك هالنوع من الحبوب .. رحت للدكتوره ففهمت منها ان الحبوب والعلاج هذا يعطى للشخص المتبرع منه مهوب المتبرع له .. قلت اوكى فهمت .. طلعت ورميت العلاج لأني متبرع لأبوي وأفرح اذا شفته طيب .. المهم بعد فتره رجعنا للسعوديه وعملنا فحوصات مرة ثانيه في التخصصي وكانت الأمور تمام .. بالنسبة للوالد وضعه تمام وماعنده مشاكل ولا أي مضاعفات ووضعه الصحي تمام التمام وبالنسبه لي نص ونص ... يوم كويس ويوم أحس بكسل وخمول وتنميل في الأطراف وبرود في الأصابع .بس العجز والكسل والخمول صار مزمن معي .. زاد وزني بسرعه بعدين سويت رجيم بعدين انتفخت ثانيه بعدين رجعت وسط .. احيانا ماأطلع كثير عشان الهواء والمناعه والكلام الفاضي هذا كله .... ولازم اشرب سوايل كثيره عشان الكلية .. حت شعر الشنب قمت حلقته كله بعدين طلع بعدين حت ثانيه قمت وحلقته شهر وخذت علاج بعدين طلع ثانيه وطبيعي الأن .. مربي شعر الراس وطويل مره وأربطه بمغاط.... اذا جتني زكمه أدخل للعناية المركزه على طول .. وصارت مرتين .. بس كل هذا يهون وأشوف الوالد( أبوعبدالله) مبسوط .. هالشايب االلي يزاعق علي كل يوم ... ورا ماتاخذ علاجاتك .. ورا ماتحلق كشتك ..ورا ماتاكل زي الناس...ورا ماتنوم زي المسلمين .. ورا ورا ورا... وأنا كل اللي أقوله أبشر أبشر طالع عمرك وأضحك ....الحقيقه أنا أدري وهو يدري أني أموت فيه وأحبه وأفديه بروحي .. وأدري أن هالزعاق بس حرص علي لاأقل ولا أكثر ... وماأنسى مره جتني زكمه وتعبت ورحت للطواري وقبل مايدخلوني للعنايه جاء للطواري وكانوا خواني كلهم فيه وشافني منسدح على السرير وحاطين لي في خشمي (أشوى ان خشمي مافيه شعر ولا كان فشله) ويوم شافني حط يده على راسي وقعد يسمي بس ماتحمل .. نزلت الدمعه على خده وطلع يصيح ولحقه أثنين من أخواني..حتى المره الثانيه يوم دخلت المستشفى 4 أيام قلتله وقالوا له اخواني اني طالع البر .. وزعل وتضايق ليش ماخذت علاجي ليش ماخذت الفروه وليش وليش ..بالنسبه لوضعي النفسي مستقر تماما.. وكذلك الوضع الأجتماعي والمادي .. يعني ماشيه الأمور ومستوره .. وخلال سنه حاولت اني أخطب 3 مرات وكل مرة يرحبون ومافيه زيك والكلام هذا كله .. بس بعدين يعتذرون بصنعة لطافه بدون سبب فأستنتج انا ان البنت ماتبي ترتبط بانسان حياته على كف عفريت زي مايقولون... هذا طبعا بعد مشيئة الله سبحانه وتعالى ... لدرجة مرة اني فكرت اتزوج من احد الدول العربيه ... بس ماش فكرت في الموضوع لقيته من طلع من داره قل مقداره ...بالاضافه اني منيب فاضي ودني جبني .. بعدين اقولها روحي ولاعاد تجين ..

(انا انسان أحب الضحك والتعليق والتنسيم ..أنسان جدي وقت الجد بس أحس راسي منفتق وقت التعليق والضحك والهستره ..انسان أتبع نظام أكل معين ..بس احيانا أحذف عنه وأكل وأشرب حاجات كثيره ممنوع علي أكلها وشربها.. أكل بصل ني وثوم وكراث وجرجير وفجل<<< لاتخافون مافيه ريحه .. وعسل وفاكهة وخضار طازه(يوميا) ..انسان بعيد عن المشاكل بسيط جدا ومتواضع للأخر وعجاز وكسول وماعندي مشكله اذا في جيبي الف ريال ولا مية ريال ..أتكلم بالفطرة وبلغه عاميه بحته....أتكلم مع الوزير زي فراش المدرسه.. ومع الأمير زي الصديق ..أنسان لبسي مرتب..وأحب النظافه والريحه الزينه .. ممنوع علي أشم ولا أستخدم أغلب العطور ..وأستخدم دهن ورد .. كل الناس سواء عندي .. احس اني شبعان وجايع في نفس الوقت وماأبغي المظاهر .. يعني لو جتني فرصه اسافر لجنيف اسبوع محفول مكفول ولا أقعد في الملحق..في هالحر تحت مكيف بارد وأفلام ونوم وجح يمكن أختارالثاني..وكذا بدون سبب.. يمكن عجز وكسل)



على العموم ماأطول عليكم <<< ياخوي أخلص علينا

بس حبيت أشارك بهالموضوع وأستغرب ليش بعض بنات الناس ماتقبل تترتبط بأنسان متبرع بكليه وجزء من الكبد ؟

1- هل السبب انه أنسان مريض ؟

2- هل هو أنسان غير قادر على القيام بالأمور اليوميه الأعتياديه...مشاوير وأغراض ومتطلبات منزل الزوجيه على أكمل وجه؟

3- أو مافيه سبب يخليني أرتبط بأنسان وضعه الصحي غيرمستقر وممكن يبهذلني بنوعية أكله وشربه

4- اي شي تقولينه...


كرجل ماذا تعمل ؟
1- تحاول تقنع البنت وأهلها لين يوافقون ؟

2- تبحث وتبحث لين تلقى بنت الناس اللي تقبل فيك وفي وضعك ؟

3- تكذب وبعدين تصارحها بعد الزواج بأن لك كلية واحد ومتبرع بجزء من الكبد ؟ للمعلوميه أثر العمليتين راح يبين حتى بعد عملية التجميل <<< يعني مفضوح مفضوح

4- تشوفلك زوجه من جنسيه عربيه ثانيه ممكن تصلح وممكن تخرب بيتك وبيت اللي جابك وتسحرك وتخليك زي الأراجوز ؟

5-اي شي تقوله ...

(ولي انشالله موضوع قريب عن صديقي وولد حارتنا زمان سامي الجابر..والأخت الفاضله الدكتوره منى أبو سليمان
وكيف تدخلوا شخصيا وفكوني من صجة ولجة برنامج كلام نواعم اللي كانوا ميتين يبغون يقابلوني)

والعذر والسموحه على طريقة الكلام .. بس هاذي لهجتي وطريقة كلامي
((أخوكم الترس))