| الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور | |
|
|
|
|
|||||||
| الانتساب | تعليمات س - ج | قائمة الأعضاء | المفكرة | إشارة الأقسام مقروءة |
أسرتي الجميلةكل مايختص بالاسرة والمجتمع وشئون المرأة والطفل |
إعلانات منتديات منطقة الرياض
|
|||||||||||||||
|
|||||||||||||||
 |
|
|
LinkBack | أدوات الموضوع |
|
#1
|
||||
|
||||
اوراق مبعثرة من مذكرات (( M ))
أهـــــداء !! قاتل الله الشطرنج .. علمني الخكرنه والجبن .. حتى وانا في قمة انتصاري .. لا املك ان اقول للملك الا .. كش  فعلا ياااااااااااااااااااااااااااااااااااااااااي ***************** الموضـــوع اوراق مبعثرة من مذكرات (m) قبل ثلاث سنوات كنت اتمشى بالسيارة ومدري وشلون لقيت نفسي رايح لحراج بن قاسم وادور لي موقف للسيارة ونزلت على رجولي ومعي كيس فصفص ويدي مغير شغالة كنها بذارة بس الفرق ان البذارة ترمي في الارض على طول ويدي ترمي في ثمي همن من ثمي للارض مباشرة المهم ما اطول عليكم مغير دوجي من زحمة في زحمة خبركم هالعالم من تشوف ناس متكومة تحشر نفسها معها عاد همن فك عمرك مرة تطلع وانت تلمس مخباتك خايف على البوك  ومرة تلمس الثنتين خايف على البوك والجوال ومرة تهج تدور اوكسجين ومرة ماتدري الا ووراك واحدن متلطم ولا تسال نفسك وشو يدور المهم انك تدور الفكيك !!!  ما اطول عليكم شفت في حدى هالزحمات شويب باسطن له بكومة كتب وانا اللي ابوبز ماهمتني الكتب كله ابقهر هاللي متلطم ويلاحقني  ,,, المهم بعد مابوبزت قمت اقلب في هالكتب وما دريت الا والقى لي بينها دفتر ابو اربعين متشققة صفحاته وشكله قديم مرة وانا اللي القطه واسال هالشويب هالدفيتر للبيع ياعم؟ على بالي ابخليه يزهد فيه ويقول لا خذه ببلاش  وما دريت الا وهو ينزرني : اجل للاكل ؟ !!!كلش فيذا للبيع لو تبيني انا بعد  قلت : لا والله ياعم الله يخليك لعين ترجيك بس ابسال عن هالدفتر  رد : وبتشتريه ؟  قلت له : ايه بكم رد : انت خامس واحد كلهم يسالون عنه والا علمتهم بثمنه هجوا وبيني وبينك مابسطت بهالكتب الا علشان هالدفيتر اللي معك فقيت اثمي وهو يتل الدفتر من يدي وهو يقول : اها بس اللي مهوب مشتري لا يسال عن الثمن ذيك اللحظة صممت على اني اشتريه مهوب علشانه بس ابقهر هالشايب  قلت له : وان شاء الله هالكلام كله علشان هالدفتر وش يسوى؟ قال : مسيومن مني في سوق الزل بميه وخمسين وعييت قلت تبيع بميتين؟ قال ورى ماتقول : ميتين واربعين ال احسن الاخ شريطي سيارات ؟ !!!  <<< ميدي ،،،رح شف المعارض في طريق الحجاز مهوب فيذاوانا اللي اوقف واقفي والتفت له وانا اقول : تبيعه بثلاث؟ !!  وماصدق اني اقولها الا وهو يقول : اهوه << يعني هات دراهمك  بس شف لا تجيني بعد شوي تقول ابرجعه ترى مامنا ترجيع وهو يوم يقول هالكلام داري اني ماامداني ابرق فيه واعرف وش فيه المهم نقدت له الدراهم واخذت الدفتر وسيده على موتري وانا اشوف المتلطم وهو كنه يدعي على الشايب اللي باعني الدفتر وخلاني اترك له الحراج كله  ,, الللي قاهرني وش هالرجال يدور يوم انه يلاحقني !!!  ويوم وصلت البيت وانا اللي اخدر لي هاك البريق وامدد رجيلاتي وافتح هالدفتر واجلس اقرا اللي فيه بس اللي ضيق صدري اني لقيت بعض الاوراق مشقوقة وبعضها مشخط عليه وبعضها مهيب كاملة بس اني في هالموضوع ابختار لكم بعض اللي قريت مع اني مااتحمل أي مسؤولية عن اللي فيه ولا اؤيد او اخالف اللي فيه لان اللي فيه يمثل راي اللي كتبه او بالصح اللي كتبته ولا يمثل رايي تعالوا نقرا بعض اللي فيه : وسانقله لكم بامانه كما رايته : (كل مقطع من ورقة مستقلة ) اول ورقه لقيت فيها رقم مكون من خمس خانات ويبدا برقم خمسة وفي وسط الرقم رقم 2 مشطوب عليه باكس ومكتوب تحت الرقم : ارقام ماتفيد ولا تنفع ارقام ماتت ارقام بلا معنى ,, صارت حياتنا كلها ارقام . وياليت هالارقام تفيد واليوم اكتشفت اني مااحب الرقم 2 علشان كذا شطبته وابشطبه واشطب راعيه من مخي === اليوم عازمتنا خالتي هيا علشان اخوي سعد جاء من امريكا وامي تقول لي لاتروحين توك مطلقة من اسبوع ومايصلح تروحين عيب وبغيت اقول ان العيب ان اخوي سعد جايب معه وحدة مهيب من دينا ومتزوجها هناك. وما رحت جلست في البيت وقلت فرصة اقعد اكتب شوي وهاذاني قاعدة اكتب وانا مشغلة شريط عبدالحليم الجديد : واسمعه يغني : أي دمعة حزن لا لا لا على فكرة هالشريط جابته لي موضي بنت عمتي من جده وعطتنياه قبل يومين يوم جت مع امها تسلم على اخوي سعد ( اخوها من الرضاع ) لان سعد مرضعته عمتي وهو صغير ,, موضي تحب عبدالحليم ودايم تجيب صورته وتورينيها وانا اقهرها واقول : وع انا اشجع فريد وماتدري ان الصور اللي معها ادري انها تشقها من مجلة الكواكب وتجي تشخص بها عندي وهالحين كني اسمع صوت اهلي جو من عزيمة خالتي === ناصر ولد جيراننا اشترى سيارة جديدة وقال لابوي : ورى ماتخلوني اوديكم لشعيب حريملاء يقولون انه سايل وهو ماهمه ابوي ولا الشعيب قصده اني اركب سيارته الجديدة ,, مسكين مايدري اننا صعب نلتقي واني مااحبه علشاني داريه وش نهايه معرفتي له : اهلي واهله عارفين الفروق اللي بيننا وعلشان كذا عايشين جيران وكننا اهل الا في مسالة الزواج بس مدري ليه همانا كلنا ابونا ادم وامنا حوا === قلت لامي ابروح معك لمجلس الامهات اللي في مدرسة اختي الصغيرة هدى قالت مايخالف بس من بيودينا قلت لها بنروح على رجلينا ونجي على رجلينا قالت لي واذا درى ابوتس قلت بنروح ونجي وهو مابعد جاء من الدكان ووافقت امي ورحت معها وفي الطريق شفت سيارة ناصر ورحمته علشانه حاط على سيارته من ورى حرف ( m ) === اليوم مرشهر على قصة طلاقي مرنا صالح بالتكسي يبي يشوف ولده وعييت قلت لامي قولي له ان امه رايحتن للمستشفى وانا قاعدة اتسمع لهم من ورى باب المقلط و ومن يوم قالت له امي (وهي متغطية عنه !!! ) هالكلام وهو يقول : بسم الله عليها وش فيها عسى ماشر ويوم سمعته يقول هالكلام وانا ارحمه واقول : حسبي الله على اللي كان السبب الله لا يحلله ولا يبيحه هاللي طيحه في علومن مهيب زينه اولها تتن واخرتها شراب لكن ما اقول الا حسبي الله ونعم الوكيل , ويوم تطمن علي وعلى ولده من كلام امي قال لامي : ورى ماتقنعينها كود يهديها الله وترجع والله مهوب على شاني علشان هالمسيكين وماقصرت امي ردت عليه ردن لو ابقول نصفه ماقدرت طلع وخاطره مكسور === قربت الدراسة وقلت لامي يمه ابدرس في معهد المعلمات منها اوسع صدري ومنها اتوظف عقب ثلاث سنين واصير مدرسة ويجيني راتب قالت لي امي : وهالولد من يبزاه والله مافيني حيل قلت بسيطه نعطيه ابوه وانا يوم اقول هالكلام خابرتن امي بتعيي وبتوافق انها تمسكه الين اجي من المعهد عندها ولا عند ابوه وفعلا صار اللي خططت له ووافقت امي بديت اجهز اغراضي للدراسة ويوم فتحت شنطة هدومي واغراضي لقيت فيها عروسة صغيرة تتحرك يديها ورجليها جايبها لي سعود ولد جيراننا يوم حجت امه وابوه عطوهياه وقالوا له يعطينيها يبونها هدية علشان سعود قعد عندنا الين جو اهله من الحج وذيك اللحظة اللي عطانياها فرحت وقمت اصارخ : عروسة عروسة عروسة وشافتني امي وسمت علي ودعت لام سعود وابوه ان الله يقبل حجهم . هالعروسة محتفظه بها الين هالحين مدري ليش ؟ === سعود ولد جيراننا مرنا ابوه امس وقال لابوي كلام فهمت منه ان سعود وده يخطبني قال له ابوي وانا اتسمع لهم : والله لوها ذبيحتن كان ماعشتك بس انت عارف يابو سعود البنت معها ولد ولا ودنا انه يعني ... همن تلخبط ابوي وما عرف يكمل وانا عارفة ان ابوي قصده لعل البنت ترجع لرجلها او شي زي كذا قام ابو سعود وفهم السالفة وسال ابوي الا صالح ماطلقها ؟ يسال وهو عارف اني مطلقة من بس باقي ايام على العدة رد عليه ابوي وقال الا بس قمين الله يفتح على قلبه ويهديه قال ابو سعود : صالح؟ الله يستر علينا وعليه راح في طريقن ماظنتي فيه رجعه مير الشور لك وانت ابو البنت والله يكتب اللي فيه الخير لنا ولكم ويوم طلع ابو سعود وانا اروح لغرفتي واسوي نفسي ماادري عن شي وجت امي ومعها ابوي يبون يشاوروني المهم ان السالفة انتهت اني وافقت على شرط اني اكمل دراستي في المعهد ويوم درى سعود سمعت انه قال لو تبي تدرس بالكلية انا موافق قلت : ويني وين الكلية من يوديني لها في عليشة : الله المستعااااان === العطلة الطويلة قربت وكل يوم يروح تزيد ضيقة صدري علشان صالح يوم درى اني ابتزوج جاء يبي ولده وعيا ابوي قال له رح للشرع هو اللي يبي يعطيك حقك ان كان لك حق وابوي داري انه لو بيشتكي بيصير الحق ضده علشان علومه التعبانه === الله يغفر له ويرحمه : قلتها اول ماسمعت بخبر انقلاب سيارة صالح على طريق الحجاز ومعه ركاب يبيوديهم لللدوادمي ,, قلتها وانا اول مرة اشعر ان له في قلبي شي مدري وشو مرة اقول حب ومرة اقول رحمة علشانه ابو ولدي ومرة اقول انه ضحية لناس مايخافون الله . === تذكر هالعروسة ياسعود؟ اخذها مني وقام يطالعها وقال : تبين الصدق لا والله مااذكرها قلت تذكر يوم يحجون اهلك وتقعد عندنا الين جو ؟ قال الله المستعااااان الى هالحين وهي عندك؟ قلت وليش مستغرب ؟ محتفظه بها علشان خالتي الله يخليها لي هي اللي جابتها لي رد علي وبسرعة : وانتي ان شاء الله بتجيبين لها عروسة حقيقية وبتخلينها تصير جدة لاول مرة قال سعود هالكلام ويوم ناظرت في عيونه لقيت فيها دمعة ودها تنزل بس سعود بسرعة التفت وطلع من الغرفة وانا عارفة بالظبط وش شعوره عقب خمس سنين زواج بلا ذرية === اتصل سعد اخوي بالتلفون على امي وقال لها : قولي لابوي يروح لي فلوس ويوم سمعت صوته وهي تقعد تصيح وتشاهق ومادريت وشي تقول وانا اخذ السماعة منها واكلم سعد واعلمه عن امي انها ودها تشوفه واعلمه انها مريضة قال : الله يشفيها بس لا تنسين تقولين لابوي يروح لي فلوس تراي على الحديدة همن سكر السماعة وما مر على هالمكالمة شهر الا وامي مدخلينها مستشفى الشميسي وقال لها الدكتور ان مافيها شي مغير قلق واكتئاب يقول هالكلام لابوي وابوي عارف ان اللي فيها هو فراق سعد اخوي اللي له سنين ما جاء عقب يوم يجينا اول مرة . === الصفحة الاخيرة بقلم البـــــدر : مر اليوم على وفاة امي عشر سنوات ومر على زواجي عشرون ومازال سعد في امريكا وام سعود لم تصبح جدة بعد !!! ........................... بصراحه مالي وجه أعتذر منكم على طول الموضوع بس أحترامي لأقلامكم ولفكركم هو الي يشجعني على الكتابه وعلى المحاوله في التميز لكم كل ودي وأحترامي
|
18-12-2004, 01:00 PM
|
#2 | |
|
كبار الشخصيات
  |
رد : اوراق مبعثرة من مذكرات (( M ))
والله شدتني الحروف من ألفها الى يائهــــا وخلت انني أقراء روايـــة للمحفوظ أو للريحـــاني ... والله انها مذكراات تشد القارء للنهايـــة البـــدر شكرا لك ... و لحراج بن قاسم الذي أتحفط بهذا الدفتـــر الدفين ... الذي أظهر خاطرك لنـــا تحياتي لك روائي مجالس الرياض
|
|
|
|
18-12-2004, 02:13 PM
|
#3 | |
|
كبار الشخصيات
كاتب قديـر |
رد : اوراق مبعثرة من مذكرات (( M ))
|
|
|
|
|
18-12-2004, 03:05 PM
|
#4 | |
|
عضو مشارك
 |
رد : اوراق مبعثرة من مذكرات (( M ))
والله اعجبتني مذكرات اخت سعد اللي ماجا من امريكا الى هالحين 000 بس حافظ على هالدفيتر اللي معك يمكن تبيعه بعد مدة بغلى من سعره اللي شريته فيه اخخخخخخ وشفلنا باقي المذكرات انا قاعدة احتريك ههههههه
|
|
|
|
|
18-12-2004, 03:07 PM
|
#5 | |
|
عضو مشارك
|
رد : اوراق مبعثرة من مذكرات (( M ))
نسيت اقولك تبيع الدفيتر ابو اربعين ورقة وربحك ردلي بسررررررررررعة |
|
|
|
|
18-12-2004, 06:26 PM
|
#6 | |
|
مراقب مجلس الكمبيوتر والإنترنت
 |
رد : اوراق مبعثرة من مذكرات (( M ))
    يدور بالسوق يدور دفتر ابو ثلاث طعشمذكرات هي العالم المسي المهمل في حياتنا كل مانستطيع حفظه هو اوراق الضمان لجهاز نشتريه على فكره انت ماعرفت المتلطم ولا شبهت عليه تذكر زين البدر كل الشكر لك يالغالي على سطوع البدر اشرقت واشرقت معك عقولنا يعطيك ربي العافية تقبل تحياتي
|
|
|
|
|
18-12-2004, 08:31 PM
|
#7 | |
|
عضو مؤسس
 |
رد : اوراق مبعثرة من مذكرات (( M ))
قريتها كلها وما كان ودي تخلص .. من جد روووووووووووووووووووعه ... وأتمنى يكون في جزء ثاني لباقي المذكرات .. يعطيك العافيه .. تحياتي لك
|
|
|
|
|
20-12-2004, 02:07 AM
|
#8 | |
|
عضو مؤسس
 |
رد : اوراق مبعثرة من مذكرات (( M ))
عمـــار عاشق نجد سوزان الســاحر وهــج لي عــوده تليق بكم يــ الغــــالين <------ رااعي طويله
|
|
|
|
|
01-03-2005, 06:42 PM
|
#9 | |
|
عضو مؤسس
|
رد : اوراق مبعثرة من مذكرات (( M ))
 البدر هذا الاسم كم رسى عليه من سفينه من سفن المحبين وكم غرق حول اعماقه من العشاق والمجانين وكم تحمل من هموم وعانق خلان لوكان ينطق لابكى من هول مايرى من العجائب في اعماقه ذالك الشاطئ الذي يعشقه كلاً منا اه اه اه اخي كم خيالك واسع واحساسك صادق وكلامك عظيم ووجدانك اعظم دمت لنا استاذي البدر 
آخر تعديل أمير البشائر يوم 01-03-2005 في 06:46 PM
|
|
|
|
|
01-03-2005, 08:02 PM
|
#10 | |
|
عضو مؤسس
 |
رد : اوراق مبعثرة من مذكرات (( M ))
لأن الحاجات اللي زي كذى .. تشدني وتعجبني وهي من اول اهتماماتي .. اذا تقدر تصور الدفتر وتنزل صورة .. نزله عشان نشوفه .. عموما يعطيك الف عافية يالغالي ..
|
|
|
|
|
| زوار هذا الموضوع الآن : 1 (0 عضو و 1 ضيف) | |
| أدوات الموضوع | |
|
|
مواضيع ذات صلة
|
||||
| الموضوع | الكاتب | المجلس | المشاركات | المشاركة الأخيرة |
| سلسلة مذكرات من ملكات جمال العالم للمثقفين فقط !!!!! | كمان | المجلس العام | 2 | 07-02-2007 08:05 PM |
| من مذكرات همسة حق !! | همسة حق | عطر القوافي | 16 | 05-02-2007 04:51 AM |
|
Powered by: vBulletin® Version 3.6.10 Copyright ©2000-2008, Jelsoft Enterprises Ltd.
SEO by vBSEO 3.1.0 Translated By vBulletin®Club©2002-2008 |
