يوم ثارت في جنون .. من جنون الجاهلية
عاتبتني لين شبت في شراييني لهبها

واستفزتني .. وفزت، وزعلت مني .. عليه
و أستضاقت من كلامي يوم زعلني عتبها

من بعدها ما بقى لي في محانيها بقيه
أسدلت دمع المحاجر للبكا .. و أرخت هدبها

و الله اني ما نويت ابدي معاها بالخطيه
بس هي اللي تعدت حدها لحظة غضبها

و الله اني كنت أكابر .. بالعتاب ، بحسن نيه
بس أبدري: هو صحيح اني الوحيد اللي عجبها؟

يمكن اني كنت قاسي بالعتب معها .. شويه
كثر ما كانت تمني راحتي .. و أعشق تعبها !

جرحتني بالكلام وكبرت حيل القضيه
و أخسرت بي كل عرق من شراييني كسبها

والا هي، ماكان فيها للموادع مقدريه
و الجفا كانت تعافه ، بس مدري وش قلبها؟

ليتني ما رحت أقايس قيمتي عند بدويه
رجعت لي كل عرق ، حبها .. والا نهبها

علمتني كيف باجفا .. وانتصر .. و أبقى ضحيه!
و علمتني كيف قلبي لو غلبها ما غلبها!

و علمتني يوم صدت عنفوان الأجوديه
ما تلوح للمقفي لو سلبها ما سلبها

رابيه بين القبايل، والعرب، و أهل الحميه
عالقه ما تبذر الا نخله تعرف رطبها

" ان تهادت " ذكرتني في خفةق العامريه
و " ان تمادت " تركب أبليس و ما ركبها!

جفنها لا سلهمت به ما يطيق السامريه
تسحبه برضاه عينه، و ان سهت عينه سحبها

و ان حكت تعطي مكانه للحروف الأبجديه
كن كلمتها تلفت للكلام اللي عقبها

و الحروف اليا تعدت بالشفاه النرجسيه
كنها صارت قصيده، بس ربي ما كتبها

وش بوصف من حلاها؟ وش بخلي للبريه
ما بها بالحسن عيب و أكشفته الا حجبها!

شعرها فيه الخوي اللي تبرى من خويه
و الشفا لو تشرب الما و أختلط فيها شربها

كن في ضمة شفاها جمرتين بنار حيه
كل من حس بدفاها واحترق صد وقربها

شفتها مثل الجريمه و أبتليت ابها بليه
غلطة جيت آتحاشى ظلمها قلت أرتكبها

كل شي شفت فيها فيه نبرة جاذبيه
موهبه من فضل ربي و أشهد ان الله وهبها

كلها لله بـــ لله فاتنه ها لآدميه
عاجبتني من بداية راسها لا سفل كعبها

لو تبادلني شعوري شعوري والهديه بالهديه
ما وفت لي لو تبيع ثيابها و أغلى ذهبها

هملتني و القلوب الجرهديه جرهديه
و أحرقني و المحبه نارها تاكل حطبها

و لا أنا ما كنت أكابر والليالي سرمديه
يمكن ان اللي غصبني للولع فيها غصبها

يا خفوقي و أدري انك منت في حاجة وصيه
شفت مكاني وانت تدري وين هي يمة عربها

رح لها و ان كان فيها قلب يطمح في مجيه
شف طلبها في عرقه وان حصل تمم طلبها

و أنشده وان قال عنها من هدر دمي بريه
قله اني ما تحمل بالعتب " قلة أدبها "

و لو يقول اني انا اللي كنت بادي بالخطيه
قل هي اللي تعدت حدها لحظة غضبها

حامد زيد