الحلقة السابعة


قبل ما انقل لقسم الاسكانر لما كنت في الاستفسار كان معي في نفس القسم اثنين من الشباب واحد حبيب وعلى نياته اسمه عبدالله الله يوفقه ويفرج همه والثاني ملكع ولعاب وراعي استهبال اسمه سامي الله يذكره بالخير وكان سامي هذا يجنن بلد ويحب يجنن المسؤولين ويحب يرفع ضغطهم ودايم ينحاش ويتأخر ويسوي مصايب كبيره المهم مره من المرات وحنا جالسين فاضين وطفشانين قال لي سامي شف ياعبرود بستهبل على بعض الموظفين قلت له وشلون قال بقلد صوت مدير قسم شؤون المرضى اللي اسمه عبدالرحمن وبخليهم يروحون له المهم كان مدير شؤون المرضى عبدالرحمن اذا طلب موظف عن طريق الهاتف يدق عليه ويقول له فلان تعال بدون مايسلم وبدون مقدمات هههههههههههههههههه وكان فيه واحد من الشباب الله يذكره بالخير اسمه سعد الله يوفقه ويفرج همه وين ماراح هذا سعد لو تشوفونه تقولون سوري من بياضه ماشاء الله بس هو من اهل الخرج وعليه يد قسما الله لو صطر واحد كف وهو كافر قسما بالله يسلم هههههههههههه كانت يده تقول بطن ضب من خشونتها المهم كان يدق عليه سامي ويقول له بصوت عبدالرحمن ياسعد تعال وكان مكتب عبدالرحمن في قصر جده في الدور الثاني وكان مكتب سعد في الدور الارض هههههههههههه وكنت انا وسامي نروح نتفرج على سعد وهو يطلع الدرج وهو رايح لعبدالرحمن مدير القسم وكان ينزل ويقول ياخي المدير انهبل يدق علي ويقول تعال وروح له وبعدين يقول لي لا ما طلبتك هههههههههههههه المسكين مايدري ان سامي هو اللي متصل عليه وعلى هذه الحاله كل يوم وكل شوي وفي مره من المرات تدرون وش سوا سامي المجرم راح لمدير القسم عبدالرحمن وقال له سم انت طلبتني قال له لا ما طلبتك بس في واحد يقلد صوتي ويسحب في الموظفين وان شاء الله بنطلعه المهم بعد فتره دق عبدالرحمن على سامي وقال له ياسامي تعال ههههههههههههههههه قام سامي المجرم واستهبل على المدير وقال له اقول لا تكذب انا داري انت تقلد صوت المدير وتبيني اروح له اقول العلب على غيري ههههههههههههههههههه وكان سامي داري انه المدير بس كان يستهبل عليه ههههههههه الله لا تعاقبنا يازينه من ايام

المهم نرجع لأيامي في قسم الاسكانر في عام 1423هـ دخل علينا مدير القسم الاستاذ زياد الله يوفقه وقال بكره ان شاء الله بننقل المكتب حقنا من قصر الملك أي قصر اليمامه إلى قصر الامير عبدالعزيز بن فهد الجديد وبنصير نداوم هناك ولما جا ثاني ويوم ورحنا للمكتب الجديد قسما بالله مكتب ولا في الخيال مكتبنا حنا بس احسن من مكتب مدير شركه كبيره فما بالك في مكتب الامير او مكتب مدير الامير المهم تبي تعرف مواصفات قصر الامير الجديد أقرأ كتاب اسمه (السجينه) قصة حقيقه لوحده كانت عايشه بقصر ملك المغرب اسمها مليكه أوفقير في هذا الكتاب فيه وصف لقصر ملك المغرب قسما بالله مافي فرق بينه وبين قصر الامير عبدالعزيز والله العظيم قصر ولا في الخيال
انا بنسبا لي اعتبره من عجائب الدنيا التسعه هههههههههههه

المهم اول ما دخلت مكتبنا الخاص بقسم الاسكانر والله العظيم رحت رميت نفسي على الارض وقعدت اتبطح واتقلب على الفرشه والموكيت اللي احس قيمت المتر والواحد بقيمة سياره قسما بالله رجلي تغوص في الموكيت تقول داعس على قطن وتشوف الممرات وعليها زخارف من الطراز الاندلسي والمغربي من جد شي خيالي بس عيب مكتبنا هذا انهم فصلونا عن موظفين الوارد صار موظفين الوارد لهم مكتب خاص وبعيدين عنّنا وصرنا حنا بلحالنا والله العظيم تشوف عيون الموظفين طايره من التصاميم حقت المكتب ههههههههههه ما ينلامون
الواحد فينا وهو جالس على الطاوله كأنه وزير من جمال المكتب وكانت المواقف تحت الارض

معليش بروح أقرأ قرأن عشانه فيه اجر عظيم في رمضان

وللحديث بقية


اخوكم في الله والفصول / عبرود