أحاسيس ماطرة

عبرود · #1

بسم الله الرحمن الرحيم

قبل أن أبدأ احب ان اعتذر على اسلوبي في كتابة المذكرات بالعامّية

ما دعاني لكتابه هذه المذكرات وأنا عضو جديد بهذا المنتدى إلا ليعرف الإنسان بأنه معرض لتقلبات في حياته ربما تؤدي به إلى الإنهيار ، وينسون بأن الرزق من عند الله سبحانه ، وما على الإنسان إلى الصبر على ما إبتلاه الله.

فأنا إنسان عادي قد تخطى عمري الثلاثين عاما و قد كتب الله لي أن أصل إلى أماكن لن يصلها غيري بسنوات ، وإنتهت بدون سابق إنذار.

وتغير الحال ، وتغيرت نظرة الناس

وتغير كل شئ بحياتي

أخواني وأخواتي الأعضاء أحببت أن أسرد لكم قصتي من بداية حياتي حتى وصلت إلى قصور الأمراء إلى أن وصلت ما وصلت إليه من العمل على سيارة ليموزين ( تاكسي )

وقد جعلت القصة على شكل حلقات ، فإن أردتم أن أستكملها فأن حاضر ، أو سأوقفها.

فإن حازت على رضاكم فسأكتبها على شكل حلقات

ويعلم الله أني كتبتها لأجل العبرة فقط.

الحلقه الأولى

انا من مواليد مدينة جده ومن سكانها بس نقلت للرياض بعد تقاعد ابوي من الخطوط الجويه حيث تخرجت من ثانوية رضوى بمدينة جده بتقدير جيد عام 1420هـ وبعدها طلبت من ابوي بأن اخذ دورة ادخال بيانات ومعالجة نصوص مدتها ستة اشهر في مدينة الرياض لأني بصراحه انا من عشاق مدينة الرياض وكنت ارغب ان انتقل عند اعمامي او خوالي لكي اعيش في الرياض بس ابوي رفض قبل تقاعده من الخطوط السعودية المهم دخلت المعهد ودرست فيه وفي اثناء دراستي للمعهد كنت ابي اصرف على نفسي وكان ابوي يحول لي 500 ريال كل شهر على اساس انه مصروفي الشهري بس كان ما يمر اسبوع الا وخلص مصروفي بس في بعض من عماتي وخالاتي اوصلهم للمدارس والجامعات وهم مدرسات ما شاء الله ولا يقصرون معي يعطوني المقسوم اللي كاتبه لي الله وبصراحه كنت طفشان وكان ودي بوظيفه عشان يصير لي راتب ودخل المهم ضاقت فيني الدنيا وقفلت معي وقلت في نفسي مشي حالك في كبينة اتصالات او خلك سواق ليموزين لين الله يفرجها وكنت مصمم على هذا الشي ورحت للكباين واتصلت على امي الله يشفيها لي وقلت لها يمه تكفين ادعي لي بالتوفيق في الحصول على وظيفه في الرياض وبعدها قفلت الخط ورحت لبيت عمي وجلست في الملحق حق البيت اللي نجتمع فيه كل يوم من بعد صلاة المغرب حتى طلوع الفجر بسبب العطاله وأنا جالس جاني ولد عمي اسمه خالد جعل ربي يوفقه وين ماراح وسألني وقال لي وش رايك تشتغل عندنا في مكتب الأمير عبدالعزيز بن فهد قلت مو مشكله ، سألني ولد عمي وقال انت سريع في الكتابه على الكمبيوتر قلت ايه قال كم سرعتك قلت تقريباًَ 35 إلى 30 كلمه في الدقيقه وبدون ما اشوف الكيبورد قال لي طيب بكره ان شاء الله بكلم مديرنا وبرد عليك ان شاء الله نشوف لك شغله المهم بعد مده قال لي ولد عمي اضبط عمرك وحلق وجهك ورتب نفسك بكره بنروح للمكتب وبيختبرونك وبعدها بيشوفون يقبلونك أو لا قلت مو مشكله
المهم رحت على طول للحلاق ورتبت عمري ورحت للسوق على طول واشتريت لي نعال الله يكرمكم وجلست اهوجس في نفسي وقلت بكره بروح مكتب عبدالعزيز بن فهد وبشوف سليمان العيسى وبشوف الوزراء ولازم اشتري لي بشت عشان اصير رسمي ههههههههههههه وبطلع في التلفزيون وبصير مسؤول ويمكن اصير مشهور
المهم في تاريخ 27/6/1421هـ رحت انا وولد جيراننا اسمه خالد بعد كان موظف في المكتب وكان من اللي ساعدوني على التوظيف في مكتب عبدالعزيز بن فهد ورحنا قصر اليمامه بصراحه لما شفت الحرس الملكي ودخلت القصر بصراحه ترددت وخفت شوي وقلت في نفسي يارجال شف لك وظيفه غيره المهم دخلت المكتب وكان مكتبنا اسمه مكتب الامير عبدالعزيز بن فهد للبحوث والدراسات وماشاء الله الباب حق المكتب وبدون مبالغه كان طوله طول عامود الأنارة حقت الشوارع وشفت البلاط والرخام وجلست ادور على الكميرات حقت التلفزيون السعودي على باللي بطلع في الأخبار هههههههههههههههههههههه

ودخلت قسم من اقسام المكتب وقابلت بعض الموظفين وبعدها سألني مدير القسم بالنيابه وكان اسمه محمد وقال لي وش يقرب لك فلان الفلاني اللي مع الأمير قلت له يصير عمي بس للأسف طلع تشابه في الأسماء طلع مايقرب لي وبعدها جاب لي ورقه فيها كلام كثير مدري وش مكتوب فيها وقال لي يلا ابيك تخلص لي هذا الخطاب في دقيقتين بس وانا بصراحه كنت خايف المهم شافني ولد عمي وقال لي ماعليك منه لا تسوي شي ان شاء الله يقبلونك بدون اختبار

معليش اكمل معكم بعدين لأني بنوم وبكره عندي قومه الصباح

وللحديث بقية

محبكم في الله المفصول وسائق الليموزين حالياً / عبرود

eL sEcret0s · 10-09-2007, 09:21 AM

يالله وش صار هات الحلقة الثانيه

والله يشفي امك

بنت الاديب · 10-09-2007, 02:05 PM

اخوي

عبرود

بسرعه انتظر الباقي وش صار معك

الله كريم يشفي امك

عبرود · 10-09-2007, 02:47 PM

بسم الله الرحمن الرحيم

الحلقة الثانية

بعد دخولي للمكتب بعد ساعة تقريباً جاني نائب مدير قسم المحاسبة اللي اصلاً كنت أبشتغل عنده وقال لي ترا بنحطك في قسم شؤون المرضى لين تفهم وتعرف اصول الشغل ، قلت له مو مشكلة انت تامرني أمر ورحت أنا وياه لمدير قسم شؤون المرضى وأسمه عبدالرحمن الله يذكرة بالخير وكان وقتها رجلة مكسورة وكان يمشي بعكازات
المهم قال له محمد نائب مدير قسم المحاسبة ترا بناخذ منك موظف النسخ اللي عندك وكان اسمه منصور الله يذكرة بالخير وبنعطيك عبرود تدربه لنا لين يعرف اصول الشغل
في البداية رفض الاخ عبدالرحمن بس بعد تهديد خاص من الاخ محمد نائب مدير قسم المحاسبة وافق الاخ عبدالرحمن
المهم قال لي الاخ عبدالرحمن ياعبرود رح للاخ علي خله يعلمك على شغلنا في المكتب ، وكان الاخ علي اول موظف اجلس معه وسولف عن الشغل وعن طبيعة وعن قوانينه وكان الا علي الله يذكره بالخير موظف ناسخ في بداية شغله في المكتب وكان يكتب أوامر العلاج اللي يأمر بها الامير عبدالعزيز بن فهد واما الان ما شاء الله صار مدير شؤون المرضى إلى يومنا هذا
وبصراحه كنت في هذه الفترة اسمع عن مدير المكتب وهو الشيخ خالد العساف وكانت سمعته مرعبه مررره وكان مسبب رعب للموظفين والمدراء وبصراحه انا كنت في بداية الأمر مستغرب الشي هذا لأني انا من يوم ولدت وأنا لي علاقة مع بعض الأمراء وكنت اشوفهم عبارة عن ناس عادين بس الشيخ خالد على شخصية هذي بصراحه كان مرعب وبصراحه انا ما جاني الرعب الا بعد ما أخذ جولة على الموظفين في اول اسبوع اشتغلت فيه في المكتب والرعب اللي جاني هذا بصراحه بسبب مديرنا لما شفته يكلم الشيخ خالد وهو خايف قسماً بالله ان سرعتي في الكتابه نزلت من 35 كلمة في الدقيقة إلى 5 او 6 كلمات
المهم صار الشيخ خالد يمر على كل موظف ويسأله عن طبيعة عمله وبعد نص ساعة من دخوله علينا جاني وقال لي وش شغلتك انت
قلت له : طال عمرك انا ناسخ
قال لي : طيب ورنا وشلون تنسخ
والله بعدها قمت اخربط في الكتابة وانواع الرعب وبصراحه بعدها صرت ما الوم الموظفين لما يسكتون اذا جاء الشيخ خالد العساف وانا صرت إذا شفت سواقه الخاص اصير مؤدب ولا اقوم من مكاني مهما صار
ههههههههههههههههه من جد مرعب

المهم جسلت في قسم النسخ لمدة اربعة اشهر تقريباً وبعدها نقلني الاخ عبدالرحمن مدير القسم إلى مكتب ثاني وهو مكتب الاستفسار عشان ابعد عن وجهه لأنني مسبب له القهر عشان ليش انا اتوظف عنده بالقوة
وبصراحه كان مكتب الاستفسار هذا بعيد عن باقي الاقسام وكان عبارة عن قسمين قسم خاص لشؤون المرضى وقسم خاص للمساعدات اللي يأمر بها الامير وكان زميلي اللي في قسم المساعدات اسمه عبدالله وكان موظف لعاب شوي الله يهديه وكان يجي للدوام متأخر ويخليني ادق له كرت الدخول لأني انا بصراحه احب احضر للدوام قبل ما يبدأ بنصف ساعه وهذه العاده معي من إولى ابتدائي ههههههههههه وكان في واحد من الموظفين يستهزء فيني ويقول شكل عبرود معه مفاتيح المكتب وهو اللي يفتحه من الصباح المهم بعدها قال لي خويي عبدالله ياعبرود كل يوم ابيك تدق كرت الدخول حقي بدون ما أقولك ههههههههههه وبعدها بكم اسبوع دقيت كرت الدخول حقه وكان الاخ ماخذ اجازه وبعدها كفشنا مدير شؤون الموظفين وعاقب الاخ عبدالله
وكانت طبيعة عملي في قسم الاستفسار الخاص بشؤون المرضى هو أن ارد على المكالمات الهاتفيه وأستقبال المراجعين وأفيدهم عن معاملاتهم اللي قدموها على سمو الامير وأقول لهم عن حالة معاملاتهم سواءً كانت في العرض او صدر فيها امر او حفظت
وكان المراجعين اللي استقبلهم في المكتب عبارة عن مرافقين الملك الخاصين والعاملين بقصر الملك وبعض ضباط وافراد الحرس الملكي وكان القسم هذا يكوّن لي علاقات القوية مع بعض اللي يشتغلون مع الملك أو الأمير وبصراحه اذكر واحد كان يزعجني كل يومين يجي مره وكان يسأل عن معاملته ومعاملات اخوياه وجيرانه وكل من يعز عليه وكان عسكري في الحرس الملكي اسمه صلاح المطيري الله يشفيه ويفرج همه لأنه اخر مره شفته فيها كان مشلول
المهم جلست في هذا القسم تقريباً ثمنية اشهر وبعدها جاني مدير قسم المساعدات المادية وهو الاستاذ زياد الله يذكره بالخير ويكثر من أمثاله لأنه بصراحه كان مدير يقدر الموظف المجتهد وكان يمزح مع الموظف المجتهد اما الموظف المقصر في شغله كان يعامله معامله غير لائقه المهم قالي الاستاذ زياد
ياعبرود تراني باخذك لقسمي الخاص وبخليك تفيد المراجعين على معاملات الخاصة بالمساعدات المادية فقط وبعدها بصراحه انبسط وفرحت عشاني بنقل عنده لأنه بصراحه يعاملني بنفس طيبه الله يجزاه خير اما مديري السابق كان يعاملني معامله مدري وش تبي بصراحه احس اني مسلفه فلوس وهو يبي يتهرب مني ولا يبي يشوفني
المهم في القسم هذا شفت فيه بعض المواقف الظريفه ومنها أن بعض الناس الله يفرج همّهم كان على بالهم أني اجلس مع الأمير وأشوفه وأكلمه وأنا بصراحه طوال فترة عملي في المكتب وهي خمس سنوات وشهرين ما سلمت على الأمير غير مره واحده فقط ولا اشوفه الا في التلفزيون أو في بعض أوقات الصلاة
ومره من المرات اتصلت علي واحده الله يفرج همّه وكانت تقول لي ياعبرود تكفى ياولدي إذا جلست مع الأمير في الليل وسهرت معه قل له اني انا حرمه محتاجه وفقيره وتكفى لا تخليه الا إذا اعطاك شي
وانا بصراحه كنت إذا كلمت أي احد احب اطيب خاطره باللي اقدر عليه ولا اخليه يقفل المكالمه الا وهو مبسوط لدرجة انه في واحد قال لي مره من المرات والله لو الامير ما يصدر امر على معاملتي يكفيني كلامك الحلو هذا
وبصراحه كان في بعض المراجعين على بالهم أن اوراقهم موجوده عندي على المكتب وانا كنت اشوفه في شاشة الكمبيوتر منسوخة في ارشيف خاص بالكمبيوتر وبعضهم كان يتهمني بأني ما ارفع الاوراق للأمير عشاني كنت اذكر له جميع الأوراق المرفقه في المعامله هههههههههههه
الله يفرج همهم ويرزقهم بإذنه عز وجل

اخ خ خ خ خ خ خ

وللحديث بقية

اخوكم المفصول وسائق الليموزين حالياً / عبرود

@@عليوي@@ · 10-09-2007, 09:05 PM

هع هع ه عهع هع ط

يعني فيييييه كماله للقصة ولا لا

طيب

مثكووووور وما قصرت بس كمل لنا وش صار بيباااي ولي رجعه

خالد اليزيد · 10-09-2007, 10:55 PM

السلام عليكم

يطولي بعمرك أخوي العزيز

عبرود

وابدعت يالغلا في طرحك الرائع

وتقبل تحياتي

سـوالـف لـيـل · 10-09-2007, 10:59 PM

عبرود وللحديث بقيه ..
تابع الله يعطيك العافيه ونحنُ بالانتظار..
تقديري..
سوالف ليل..

عبرود · 11-09-2007, 02:19 AM

الحلقة الثالثة

بصراحه خلال فترة عملي في قسم الأستفسار حصلت لي عدة مواقف طريفه وسوف اذكر منها اثنتان فقط

الموقف الأول: في عام 1421هـ رزق الشيخ خالد العساف بمولود وسماه فيصل وسوا لنا الشيخ خالد حفلة عشاء بهذه المناسبه خاصة بموظفين المكتب فقط وكان حاط لنا عشرة ذبائح على ما أضن وكنت انا جالس على سفرة وكان جالس قدامي مدير شؤون الموظفين اسمه عبدالرحمن الله يهديه وكان ظالم شوي المهم في هذيك الايام كان في مرض منتشر في السعوديه اسمه الوادي المتصدع وكان هذا المرض يصيب لحوم الأغنام والأبقار وسألني مدير شؤون الموظفين انت بتاكل من هذا اللحم ولا لا قلت له هههههههههههههههه بصراحه مافي خروف يدخل قصر الملك الا وسوا فحص بول ودم في مستشفى التخصصي وبعدها ضحك هو مجموعه من الموظفين

اما الموقف الثاني: بصراحه خلال فترة عملي في قسم الأستفسار حصلت على عدة مكافأت تقريباً عددها ثلاث مكافأت ومقدار المكافأه الواحده 5000 ريال وكنت اول موظف يحصل على مكافأه خلال ثمنية اشهر وبعدها جاني بعض الموظفين وقالو لي وشلون حصلت على هذه المكافأه بصراحه أول مره نشوف موظف جديد يحصل عليها خلال فتره قصيره من تعينه ولا في الأصل كان الموظف لازم يمر عليه سنه ونص او اكثر عشان يحصل على هذه المكافأه المهم انا خفت على نفسي من العين وقلت في نفسي خلني اسوي عزيمة عشاء وخلي الناس تشاركني في المكافأة عشان مايحسدوني ورحت سويت عشاء في مطعم بن مهري اللي في طريق جده المدينه وهو عباره عن مطعم متخصص ببيع السمك المقلي والمشوي الطازج وعزمت جميع الموظفين وكان عدد موظفين المكتب في تلك الفتره 50 موظف بس اللي حظر العشاء 16 موظف لأن الباقين كان في بعض منهم منحرج وخجول وفي بعض منهم الله يهديهم فيهم شوفت نفس شوي ههههههههههههههههههه وبصراحه لما تعشينا في مطعم ههههههههههههههههههه وجينا ثاني يوم للعمل اصيب كل واحد فينا بالسهال والمغص الله يكرمكم والله العظيم كل يومي راح في الحمام الله يكرمكم المهم قرأت جريدة عكاظ حقت ثاني يوم اللي اصبنا فيه بالمرض وكان في موضوع يقول يوجد حالة تسمم في مطعم بن مهري حق السمك وبعدها استلموني الموظفين وقالو لي شكلك عازمنا بدون نفس ههههههههههههههههه
بس والله احسن شي صار لي في هذي العزيمه تعرفت على واحد اسمه سلطان الحين هو من اعز اصدقائي لأني بصراحه في بداية الامر كنت اكره ما اشوف هذا الشخص لأنه كان يمر من عندي ولا يسلم علي قلت في نفسي شكله رجال مغرور بس بعد ماجلست معاه في العزيمه وسولفت معه لقيته رجال ينحط على الجرح ويبرا لذا نصيحه لا تحكمون على الواحد الا بعد ماتجلس معه وتسولف وتشوف وش هو من لحيه

معليش بروح اخذ لي غفوه قبل صلاة الفجر لأني بصراحه بديت ادوخ

وللحديث بقيه

محبكم في الله المفصول وسائق الليموزين/ عبرود

عبرود · 14-09-2007, 10:01 AM

الحلقة الرابعة

اذكر في يوم من الأيام قالو لنا السؤولين بأن الأمير عبدالعزيز بن فهد بيسوي جوله تفقديه في المكتب لذا على جميع الموظفين الحضور والأنتظار حتى تنتهي الجوله التفقديه المهم جا يوم الزيارة حقت الأمير وبصراحه انا كنت من الموظفين اللي كل يوم يبخر ويطيب مكتبه بالبخور وبالذات قبل كل صلاة احب اتطيب عشان تصير ريحتي في الصلاة حلوه وبصراحه تخشع وانت تصلي إذا كنت متطيب المهم قالو الأمير بيجي بعد صلاة المغرب وصرنا ننتظر سموه الكريم الله يحفظه لنا حتى اذن العشاء ولا جا وانتظرناه لين انتها فترة العمل ولا جا وأمر المسؤولين بأن ننتظر حتى يأتينا أمر بالأنصراف وألا سوف نعاقب المهم من ضمن المواقف الطريفة التي حصلت في ذلك اليوم ههههههههههه من كثرة الأنتظار خرج الموظفين من مكتبهم بالأحتجاج على انتظارهم كل تلك الفتره هههههههههههه وبصراحه كل ما شفنا نور سيارة زينون قلنا هذا الأمير جا وتشوف الموظفين وهم يدخلون المكتب تقول طلاب مدرسه ينحاشون من المدير وهم يدخلون الفصل المهم الأمير الله يخليه لنا ما جانا الا قبل صلاة الفجر بشوي وأول مكتب دخله هو مكتبي وفي تلك الفتره أول مره وأخر مره اسلم على الأمير كانت عام 1422هـ طول فترة عملي في المكتب وهي خمس سنوات وشهرين المهم بعد ماخلص الأمير من الزيارة قال لنا معليش يا شباب بصراحه كان عندي ضيف ولا طلع الا قبل شوي عشان كذا تأخرت عليكم بس بصراحه ماقصر معنا عوضنا بثلاث روات لكل موظف بسبب التأخير تبون الصراحه كنت اتمنا يتأخر علينا كل مره يجي يزورنا فيها هههههههههههههههههه

بعد انتقالنا لمدينة الرياض جاني نائب مدير القسم وكان اسمه سلطان الله يذكره بالخير ويكثر من امثاله لأنه بصراحه كان موظف مجتهد بمعنا الكلمه وكان يحببك في الشغل والحين هو الله يحفظه مسؤول في مجلس الشورى المهم جاني مره من المرات وكان يشوف طريقة شغلي في قسم الأستفسار وقال لي بصراحه يا اخ عبرود شغلك طيب وحرام تجلس في قسم الاستفسار انا بنقلك إلى قسم الأسكانر وهذا القسم يقوم بحفظ نسخه في الحاسب الألي عن طريق جهاز الأسكانر لإي خطاب يعرض على الامير عبدالعزيز بن فهد ومن بعدها نرسلها إلى جهتها المختصه على حسب التوجيه المكتوب في الجهاز المهم بعد مانقلت إلى هذاك القسم قابلت مسؤول القسم هههههههههه وكنا نعايره بالصيني لأن اشباهه كأنه صينيه وكان اسمه خالد الله يذكره بالخير ويحفظه لأهله وتعرفت على موظف ثاني اسمه فهد وهذا فهد قسماً بالله بدون مبالغه لو عنده ثروه مثل ثروة الوليد بن طلال كان ثلاث أرباع ساكن السعوديه مسلفهم لأنه يحب يساعد الناس وبصراحه مافي احد في المكتب الا وتسلف منه ولا كان يقدر يرد احد لأن الخير يمشي في دمه الله يوفقه وين ماراح وهو الحين عاطل هههههههههههههه وكنّا نعايره بمستر فوجي لأن اشباهه كأنها يابانيه وتعرفت على واحد اسمه عبدالله وكنت اناديه بالزول لأن مواصفاته سودانيه هههههههههههههه لأنه بصراحه عجاز مررررره بس والله كان وما زال من اعز اصدقائي وكان في واحد بعد اسمه ماجد هههههههههههههههه الله يهديه ويوفقه لأنه بصراحه كان متقلب شهر يصير ملتزم ومطوع وشهر يصير زاحف بس بصراحه كان موظف مجتهد مرررررررره وكان مديرنا يعتمد عليه اكثر شي لأنه بصراحه كان فاهم الشغل مرررره وكان قسمنا هذا مكون من قسمين قسم وارد وقسم ادخال اسكانر وبصراحه قسمنا هذا كان من ازحف الأقسام في المكتب كلها إلى ان قفل المكتب عام 1426هـ وبصراحه جلست في هذا القسم تقريباً باقي فترة العمل في المكتب وهي اربع سنوات وشهر تقريباً وفي خلال هذه السنوات الأربع تعرفت على مجموعه طيبه من الموظفين اللي توظفو عندنا في نفس القسم ومن ضمنهم فهد ابو علي الله يذكره بالخير الحين هو شغال في بنك الراجحي ومحمد ابو سليمان الحين عنده محل في القصيم الله يرزقه ويوفقه وين ماراح واحمد ابو حسن الله يوفقه ويخليه لأهله ومحمد ابو مهنا الله يوفقه ويحفظه لأهله وخالد الله يذكره بالخير وين ما راح وهو الحين موظف في السفارة السعوديه في شرق اسيا ومشعل الله يرزقه ويحفظه لأهله وسالمين الله يذكره بالخير والحين هو من اصدقائي الخاصين والعزيزين على قلبي بصراحه هذي المجموعه كانت ازحف مجموعه ههههههههههههههههههه عشت معها فترة عملي في المكتب وصار لنا مع بعض عدة مواقف مضحكه وهذي المواقف يبي لها حلقه كامله

وللحديث بقيه

عن إذنكم بروح أقرأ سورة الكهف يقولون فيه اجر عظيم إذا قرأتها في صباح يوم الجمعة وقبل غروب شمسها

محبكم في الله والمفصول / عبرود

صمتي عذاب · 15-09-2007, 04:36 AM

اول موضوع اخلصه من اوله لااخره تقبل تحيااااتي اخوي

مواضيع ذات صلة
الموضوع	الكاتب	المجلس	المشاركات	المشاركة الأخيرة
هل انت منهم..!!! دعوه لكل موظف..	توتة	المجلس العام	26	10-09-2007 02:40 PM
مذكرات طالبه ماعمرها كتبت تعهد ======= هههههه	مانشستراويه فله	مجلس الصرقعة	27	17-04-2007 06:40 PM
سلسلة مذكرات من ملكات جمال العالم للمثقفين فقط !!!!!	كمان	المجلس العام	2	07-02-2007 08:05 PM
من مذكرات همسة حق !!	همسة حق	عطر القوافي	16	05-02-2007 04:51 AM

أحاسيس ماطرة

للخواطر والقصة القصيرة

مذكرات موظف مفصول

كبريأ الذات لن يدوم

][][§¤°^°¤§][][ العـذر بـدري ][][§¤°^°¤§][][

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق