قصة الطفل البالغ من العمر ثلاثة سنين و الذي عثر عليه مرميا ً في أحدى شوارع مدينة بريدة بعد عيد الفطر 1428 في حال يرثى لها كان يحمل في يده كيس ملابسه الرث وبداخل الملابس عثر على قطعة صغيرة من مجوهرات أمه حيث كان ينتظر أهله طويلا في الشارع من الضحى إلى ما بعد العصر بدون شراب ولا طعام. وللمعلومية أبوه متوفى وأمه متزوجة من رجل على حد قولهم. ولكن الأم مغلوب على أمرها كما يبدو.. ولآن هو في حضانة الرس بالقصيم.وكثيراً ما يتردد على لسان الطفل أسم أمه حصة وخاله ناصر وبناته أمجاد ومرام.
طفل ٍ تنكد ونكـّد في ضحى يوم عيد=يجر صوت البكاء والعالم معيّده
الناس حوله تعيّد بالقماش الجديد=وهو من الجوع ما كن البلاد بلده
من الضحى للعصر ما فيه واحد رشيد=ما ذاق جرعة شراب ولا طعام حمده
واللي يمره يشوفه بالشعور البليد= محد ٍ تنشـّد عن أخباره ولا أحد أنشده
عمره ثلاثة سنين ليا نقص ما يزيد=يا مسوده صبح ذاك اليوم يا مسوده
لقوه في شارع الحاره يصيّح وحيد=يبكي وكيس الملابس ما سكه في يده
ما يملك إلا هذاك الكيس... يا هل الرصيد=ما معه إلا من أمه كسرة قليّده
رماه رجال أمه بالمكان البعيد=وروّح وخلى الصغيّر ينتظر موعده
أضن هذا الطفل معروف ما هو جديد=يا العالم اللي تعرف السوق و الأرصده
اللي أول أسمه سعود وآخر أسمه سعيد=سعيد بالأسم وإلا الأسم ما يسعده
وينك ووين السعادة يا سعود السعيد=تسمعك ناس ٍ تمرك بس متبلده
و المجتمع ما فزعوا لك وأنت توك وليد=إلا عجوز ٍ كبيره مجهده مجهدة
أسال لها الله جنه بعد عمر ٍ مديد=يا الله زد عمرها في خير يا الله زده
فيها من الخير خير ومجد أهلها تليد=لعل ما يشتكي ضيم الليال ولده
جادة عليه بحنان الأم حتى تعيد=عليه بعض الأمان وحاولت تسعده
يوم ٍ شرب العصير وبل حبل الوريد=كني أسمعه يوم يجري داخل الأورده
جته وهو ينتظر حصه وناصر وزيد=وأمجاد ويّا مرام ولا لقاء مقصده
مسكين يا سعود ما جبت الكلام الأكيد=الناس خلوك حتى طحت بالمصيده
وبحضانة الرس عيش العمر عيشة زهيد=المجتمع ما درى والعالم معيده
شعر / عيسى بن فالح الرشيدي
إعلانات منتديات منطقة الرياض
مواضيع ذات صلة
