اخواني الكرام هذه قصتي مع رجل امن (مرور سري)

طبعآ انا معلم واقوم بتدريس مادة التربية الوطنية في المرحلة المتوسطة وعمري 40 سنه ولله الحمد

(ملتحي) ورجل الامن برتبة جندي لم يتجاوز 25 سنه وغير ملتحي

القصة ومافيها كنت في بيتي في حي البديعة جاءني اتصال من اختي ان ابنها (والذي انا خاله) اصيب

بضيق تنفس وهو يلعب مباراة في نادي الرياض الولد عمره 15 سنه (طفل) وعنده ربو ولم يأخذ معه البخاخ

وطبعآ المباراة كانت بين اندية ريفية لايوجد اخصائي علاج ولا هلال احمر ولا اي شيئ من وسائل السلامة

خرجت مسرعآ الى الصيدلية واخذت بخاخ واتجهت مسرعآ عن طريق الجسر المعلق الى نادي الرياض

وكنت مسرعآ امشي 160 حسب كلامه وقبل ان اصل الى كبري مخرج نادي الرياض اوقفني المرور السري

طلعت الكبري واتجهت يسار وتوقفت بعد 100 متر من الكبري نزلت من السيارة

قال رجل المرور : ماشاء الله مسرع وش القصه

قلت : عندي حالة اسعافية طارئة (حياة او موت)

قال : هات الرخصة والاستمارة . واعطيتها له

قلت : خل معك الرخصة والاستمارة وبروح لنادي الرياض (وشرحت له القصه) وبجي وابشر باللي تبي

قال : لا ماتروح

قلت : الله يجزاك خير ضروري تعال معي وشف بنفسك وتأكد

قال : لا ثم قال : كم عمرك ؟ عرفت ان الرجال يبغى يستفزني

قلت : اكبر منك بس الله يرحم والديك خلني اروح

قال : ادري انك اكبر مني بكثير بس واحد كبرك يسرع هالسرعه تعرض نفسك وحياة الناس للخطر

قلت : انا داري اني غلطان وانا (معلم) بس فيه واحد في خطر لازم اروح له

قال : ومعلم بعد . انت ماتصلح تصير معلم لانك تسرع

قلت : والله العظيم مضطر تعال معي وشف وتأكد بنفسك قريب هنا باقي 500 متر على نادي الرياض

قال : وين المفتاح ؟ دورت المفتاح مالقيته مدري وين راح او طاح مني والله مدري المهم دورته مالقيته

رجل المرور اتصل على راعي سطحة دريت ان الرجال ناوي يحجز السيارة اتصلت على سواق النادي

وجاء وخذ مني البخاخ وراح وخذوا الولد للشميسي كل هذا صار قدام رجل المرور

المهم انا اطمأنيت على الولد

وقلت : عساك الحين صدقت ؟

قال : مصدقك بس ماني مخليك تروح وبحجز السيارة

قلت : والله العظيم كنت مضطر وكل شي صار قدامك ما انت مصدقني

قال : الا مصدقك بس ماني مخليك وبحجز السيارة

قلت : طيب انا بجلس في السيارة لين تجي السطحة

قال : لا لا تركب السيارة

قلت : الاستمارة والرخصه معك واعطيتني قسيمة خلاص خلني اجلس واستريح في سيارتي

وجلست في السيارة

جاء ومسكني (بجيبي) وضربني وطلعني من السيارة

قلت : وهو ماسكني (بجيبي) ماهو من حقك تمسكني كذا النظام يقول ماتمسكني ولا تضربني

وقلت والله لروح للمقبل واشتكي عليك

قال : قال لاتروح للمقبل رح للبشر

( المقبل مدير مرور الرياض والبشر مدير المرور بالمملكة)

وفي هذا الموقف رأني احد طلابي والذي كان مع والده وتوقف ثم نزلا وقال : عسى ماشر

قلت لا عادي مافيه شي وراحو

ثم حضر سيارتان من المرور السري وشافوا اني (مبهذل) وقال واحد منهم للجندي عسى ماشر غلط

عليك المواطن

قال الجندي : لا والله ماغط علي وانا مصدقه في كل اللي قال بس ماني مخليه يروح

جاني واحد من رجال المرور وقال وين المفتاح بنظرة عطف وحنان علي ؟ قلت والله مدري كان معي وضاع

قال : تعال اركب السيارة وركبت السيارة قال : دور المفتاح دورناه انا وياه مالقيناه

قال : دور في مخباتك طلعت كل المفاتيح من مخباي ومالقيته

قال : وين اخر خبرك به قلت يوم اطلع الاستمارة من الدرج لان الدرج كان مقفل وجيت افتح الدرج ولقيت

المفتاح على قفل الدرج

وقبل ما القى المفتاح جاء راعي السطحة من الجنسية السورية وقال طلع المفتاح ولا ترى ماني مسؤل

عن القير اذا انكسر وصار هو بعد ينفخ لانه شافني في موقف ضعف (انا سيارتي شبح 98)

المهم قال الجندي : شف انا بحجز السيارة ورح قبل ما اخذك معها اتصل على واحد يجي ياخذك

وانا مهموم اتصل علي شخص ملتزم (زميل ومعلم) وقال عسى ماشر قلت مايجيك الشر

قلت وينك قال قدامك في سيارتي المهم رحت له وقال اصبر اشوف القصه .

راح الرجال وقال لهم الرجال محترم وانا اشهد له وووووووووووووووووووو

ما اقتنع خذني زميلي ووداني لبيتي وانا الان في اجازه وبدون سيارة وسيارتي في الحجز

وماهي طالعه الا الاثنين

الســـــــــــــؤال

لماذا كل هذا ؟

انا بهذا الموقف تذكرت جنود اليهود مع الفلسطينيين

لو كنت انت في هذا الموقف ماذا ستعمل أثناء الموقف ؟

والان ما ذا تنصحوني ان اعمل ؟ هل ادعي عليه ان يتقطع تحت تريله في حادث ؟

لان هذا الدعاء خطر على بالي وانا في اخر ساعه من عصر الجمعة ولكن ؟ استفغر الله

هل سيأخذ مدير المرور حقي ؟ ام سيخلقون له الاعذار وسأصبح كذاب ؟

وهل استحق الغرامه (القسيمة) ؟ وهل ادفع نقل سيارتي بالسطحة ؟

واذا كذبوني ودفعت القسيمة واجار السطحة ؟ ماذا سيكون موقفي تجاه وطني ؟ خصوصآ واني معلم تربية

وطنية

المهم انا لن اخرج سيارتي من الحجز (حجز لبن) الا عندما اراجع مدير المرور يوم الاثنين وسأوافيكم

بالتفاصيل

وهل سينتصر الظلم ام النظام ؟

جميع الاوراق التي تثبت صحة كلامي موجودة معي وسأذهب بها الى العقيد المقبل مدير مرور الرياض

فأنتظروا اخر المستجدات

وشكرآ للجميع