مجلس الرياض

خالد اليزيد · #1

السلام عليكم

حيالله الجميع وعلى البركة المطر والله يجعل في الخير للجميع يارب

والله يا أخوان الموضوع وبكل آسف إلى مته وعاصمتنا الحبية تعاني من الإهمال ؟؟؟

اليوم بعد صلاة الفجر قلت خلني أروح أشوف وادي سلطانه وش صار فيه لما أكنه من ذكرايات له

وأحب أن أستعيدها بعد هطول الأمطار لأن طفولتي في أحد النخيل هناك

المهم وأنا جالس أصور إلا رجال في الخمسين من عمره يخبرني بأن نفق السويدي مليان مويه

ويقول والله حنا إلي جالسين نشر للعالم ولا حولك أحد لا مرور ولا غيره

قلت ما يبيلها وأتوجه على طول وأول ما وصلت قابلتني هالتحويله الله يجزاه بالخير من حط هالمعلم

وهي من إجتهادات بعض أفراد الحي القريب من النفق فجزاهم الله خير

فوقفت سيارتي وقلت باروح أصور السيارة إلي داخل النفق

والله ورايت هذه السيارة داخل النفق

وهذه صورة أخرى للسيارة من الأعلى

وللتنبيه السيارة لونها فضي بس قضاء وقدر صارت بني

قصة أصحاب السيارة يرويها لي صاحب هذه الصورة

والذي ساهم بعد الله في إنقاذ المحتجزين والذين على حد تعبيره شافو الموت

يقول أخونا الكريم أنه قبل صلاة الفجر بنصف ساعة تقريباً دخلت للنفق وأشوف فيه هالسيارة واقفه في النفق

وأخذت أصيح بالصوت فيه أحد يقول والله كل همي أن لا يكونوا عائلة والسائق أجنبي ترك السيارة وأنحاش

وبعد ترديد الصوت أخذ أصحاب السيارة بالضغط على الفرامل يقول علمت أن هناك من هو محتاج للمساعدة

وهو إلي ينزل صاحبي إلي معي في السيارة وقال لي أنا بأسبح لين آصلهم وأحاول أجيب أحد منهم

وبالفعل لما وصل وشفت المياه لكمالها وتزيد أخذت أنادي صاحبي وأقول له إرجع الوضع خطير

وفي رجوعه حضر الدفاع المدني وبكل أسف أنه تصرف إرتجالي من قبل من حضر من الدفاع المدني

نزل حبل وأخذ برفع بنطلونه وأخذ يتجه للسيارة ولكن غزارة المياه وعمقها منعه ومن في السيارة أخذت المياه تداهمهم

بداخلها فصعدوا للأعلى واحد خفيف وبسرعه طلع لأعلى السيارة أما الثاني كان بدين وبالصعوبة تمكن من إخراج نفسه

الحاصل أن الأخوان راوي القصه وصاحبة هم أبطال المسلسل جزاهم الله ألف خير

أخذ صاحبة بحبل الدفاع المدني وصعد للأعلى وأخذ يحاول يرميه عليهم حتى تمكونا من الإمساك بالحبل

ووفر الدفاع المدني وسائد النجاه الخاصة بالمساة وأوصلوها لهم عن طريق الحبل

وبد الإجتهاد من بعض الأفراد وعلى رأسهم صاحب الصورة

الذي قام بلف الحبل على وسطه وربطه بإحكام وساعده صاحب سيارة حمس الله يجاه بالخير

وصاحبة الذي رمى الحبل أخذوا يسحبونهم حتى وصلوا لألمنطقة الأمنة بطريقة محكمة يقولي

والله يوم طلعناهم وجهوهم شاحبة ومبلمين مساكين والله شافوا الموت

وبعد أن قمنا بتغطيتهم ومحاولة التدفئه تبرع أحد المساهمين في عملية الإنقاذ بإيصالهم للمستشفى

فالشكر الجزيل لهم وجعل الله ماقاموا به في موازين أعمالهم

وهذه صورة للنظافة التي ينعم بها نفق السويدي

ويتضح لكم في الصورة حد المياة المتجمعة في النفق

وهذا مشهد متكرر ومألوف لدى سكان المنطقة كل سنة على هالحال والحال ماترضي أحد والله

وهذه صورة تبين لنا إتجاه مياه الحي الشمالي من النفق بأكملها للنفق حيث أنها منطقه مرتفعه وقد

خصص مجرى للمياه يغذي النفق إلي يقال أنه مأمن بمضخات للتصريف

ما أدري والله تصريف مياه أو تصريفنا حنا

الأسألة التي تطرح نفسها

ماهو دور أمانة مدينة الرياض في مثل هذه الأمور ؟؟؟

والتي لم تحضر إلا قرابة الساعة الثامن صباحاً مع العلم أني شاهدت رجل المرور وهو يقوم بالتبليغ

ويقول لي أنه الآن يبلغ الأمانه من قبل مركز العمليات

أين المرور في إحضار ما يلزم لتنبيه المارة بعدم الدخول للنفق ؟؟؟

والله أن التحويله أصبحت أيضاً إجتهادات فردية والعالم الله يجزاها بالخير ماغير بهالشمغ تشر للقادمين

وتنبههم بأن النزول فيه الخطر والصورة الأولى خير شاهد

الدفاع المدني لا يبعد المركز أكثر من 3 دقائق عن موقع الحدث ولم يكن له الحضور المبكر التي تشفع له

وبالتجهيزات اللآزمه لمثل هذه الأمور

أين أنتم يامن سخرتم لهذه الأمور يارجال الدفاع المدني ؟؟؟

المرور حضر وأنصرف وطلبت منه أن يقف في أول النفق فقال لي أبشر

وبعدها غابت شمسه !!!!!

يمكن موعد تسليمه

الوضع جداً خطير وعاصمتنا الحبيه والله تعاني من سوء التصريف

وسوف أرفق لكم بعض الصور وأنا أرفقتها لكي لا نثقل على الموضوع أكثر بزيادة الصور

وأيضا مقاطع فيديوا قصيرة

خالد اليزيد من قلب الحدث ومتابعة أخر الأحداث

وتقبلوا تحياتي

ابو مهند · 25-02-2005, 05:35 PM

الغالي ابو خالد / قبل كل شي مبروك الامطار جعلها الله امطار خير وبركه ؛

واشكر جهودك .. ونقدك اللي في محله لاثار السيول .. وماتخلفها من مآسي .. عندنا فقط .. وبالاضافه لما ذكرت يالغالي

حبيت اضيف .. ان العله في المقاولين وامانة مدينة الرياض .. من حيث الاهمال الواضح في انشاء الانفاق .. وعدم وجود غرف لتصريف المياه .. وان وجدت فهي لاتتحمل كمية الامطار .. يالغالي اللي صورت كان في ليله واحده .. اجل كيف بيكون الوضع لو استمر المطر .. اكثر من ليله ؛

اكيد اغلبنا سافر خارج المملكه .. وشاف الامطار على مدار 24 ساعه .. ومع ذلك تقوم الصباح وتلقى الشوارع ناشفه ؛

تساؤلات كثيره تدور في ذهن المواطن .. من المسؤول؟؟
واين دور غرفة العمليات والطواريء في الامانه ( ان وجدت )!

شاكر ومقدر جهدك استاذي ابو خالد .. على نقدك البناء .. وعسى احد المسؤلين في الامانه يمر على الموضوع .. ولا تحده الظروف ويمر في نفق السويدي .. او مخرج 13 ,

الزعيم · 25-02-2005, 06:37 PM

.
.
.
الله يعطيك العافيه يا ابو خالد

و الأسئله كثيره

و المشكله تتكرر في كل عام

بس الامانه فالحين في زرع الحدايق و إعادة رصف الشوارع و تاركين المشاكل الحقيقيه تتكرر و احنى بدورنا نكرر ( يا ليل ما اطولك )

.
.
.

تحياتي

م ـحـمـد · 25-02-2005, 08:33 PM

يالله حسن الخاتمه بس

وهـ لملايين الي تنصرف مشاريع ومدري ايش وتطوير وين راحت؟ كلاها الفار وهم نايمين؟

والله الحكومه ماتقصر كلن البلاء من هـ لهوامير الكبار ماكلين الرطب واليابس على حساب المواطن والدوله

يعطيك العافيه اخوي خالد على هـ تغطيه

طيّب الفال · 25-02-2005, 09:22 PM

الله يثيبك اخوي الغالي خالد

والله الحدث مؤســـــتتف

لكن هاللي في الصورة ماهو غريب علي!!

كنه اللي مرشح نفسه

حسن المهدي

لكن يخلق من الشبه مايشاء

مشكووووور وماقصرت

معانق الليل · 25-02-2005, 09:28 PM

نسأل الله السلامه ..

والحمد الله علي سلامة الناجين .. ياابو خالد يالغالى للأسف هذا المكان ليس الوحيد الذي قمت بتصويرهـ الذي يعاني من مشاكل التصريف والتجمع بالسيول ..

ومهما قلنا لن يتحرك المسؤولين !!!

لا هنت يا أبو خالد وبيض الله وجهكــ ..

©{« عاشق نجد »}© · 25-02-2005, 10:34 PM

لا حول ولاقوه الا بالله

أكيييييييييييييييييييييد المسئؤلين مايمروا مع هالنفق ....!!

حسبى الله والنعم الوكيل

والله الاهمال مصيبتنا وأرواح الناس صارت رخيصه للأسف الشديد ...!!

الله يعافيك يالغالى

ويجعل هالاعمال فى موازين أعمالك الصالحه

تحيتى وكل تقديرى

لمني · 25-02-2005, 11:11 PM

يارحمااااااان الله يلطف سبحانه ........وش ذا

مانقول الا الله يصحي ضمائر المسؤلين

وتشكر ياخالد على التغطية كفيت وفيت ياغالي

اجمل تحياتي

V I P · 26-02-2005, 12:10 AM

الله يعطيك العافيه يالغالي

على التغطيه الاكثر من رائعه

والله يجعل هذي الامطار امطار خير وبركة

وانا يالغالي اردد واقول ان هذه الامطار تكشف الخفايا

وتخرج فضائح لم نشهدها من قبل

والله يالغالي ماعندك احد لادفاع مدني ولا غيره الى ماندر من الرجال

ولا المفروض مثل هذا الامر يكون معهم قوارب الي يستخدمونها في المستنقعات

لكن يالغالي اين المسؤلين من هذا الامر وهل هم على علم بذلك

يعني مثل هذي الصور المفروض تنشر في الجرائد حتى تصل الى كبار المسؤلين

فالمال ولله الحمد متوفر وبلدنا بلد بترولي فأين الميزانية المخصصه لهذا القطاع

واهم شي في جميع البلدان تصريف السيول ؟

لكن هنا المهم ماهو يناسب المسؤلين للاسف

الله يعطيك العافيه

تحياتي لك

][المـؤيـد الهـادي][ · 26-02-2005, 12:22 AM

مشكور على متابعة الاحداث ونقلها اول باول!
وين خطط وبرامج عمل تصريف مياه الامطار والسيول؟ ولا كلام على ورق!
تحياتي لكـ،ـ،؟

مجلس الرياض

خاص بالمواضيع المتعلقة بمدينة الرياض

والله بغو يموتون في نفق السويدي تغطيه ( صور )

" سعودية" تؤدب " يمني" أمام الجمهور!

شلالات الــريــاض

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق