لعنبو جد السوالف يـوم قالـت سالفتهـا
كنها نبض القصيد وذكرياتـي والطفولـه

تزرع وتسقي وتقطف مـن ورود ٍ رتبتهـا
تأمر وتأخذ وتعطي في محاجرها الكسولـه

تحكي وتسمع وتطرب والسوالف ناظمتهـا
تنزح اشعار وسوالف لاحكت بنت الحموله

كنها تعسف قصايد نـادره فـي قافيتهـا
تدخل أحساس القلوب وتلعب ادوارالبطوله

ان بغت عقل النصاحه والفصاحـه نوّرتهـا
وان بغت بهبال تلعب قلت هالبنت مهبولـه

مع حنان الصوت جتني والمعاليـق نزلتهـا
مانقصها عن دروب المرجله كود الرجولـه

اسحرتني في حلاها يـوم عينـي ناظرتهـا
لين صالت في خفوقي واخذت صوله وجوله

وسألتني يـوم عينـي بالغـلا مافارقتهـا
تحتضني شوق والا كل نظراتك ذهولـه ؟

قلت يابنت اسحرتني قالت اسكت خابرتها
نظرتي يمكن طبيعه والصحيح أني خجولـه

والعذوبه في كلامي من عيونـك راويتهـا
قلت ياعل السوالف دون همساتك ملولـه

وحل مع نغم العبايـر كلمتينـن سددتهـا
لين صابت في حشايا رمية البنت القتولـه

ماتفيق احلوم عيني ليـن دمعاتـي نثرتهـا
ولا نبهت الا وعيني تنثر الدمـع بسهولـه

باعثرتبي كل عـرق ٍ ليـن حالـي بعثرتهـا
وانثرت في وسط قلبي حبها عرضه وطولـه

وقالت اكتبّي قصيده واكتب انـي قايلتهـا
قلت ياحلم القصايد والشعر واللي يقولـه

لعنبو جد القصايد كـان مايـوم احتوتهـا
ولعنبـو قلـب ٍ تولـع مايلّقيهـا قبولـه