الى متى تخطين واصنع لك اعذار = الى متى تخطين وقلبي الضحيه

صار الحطب قلبي وجرحك لي النار = ياليتني ماشفت منك الخطيه

حطيت لك بالقلب وديان وانهار = وشفتك ملك.. وكل المشاعر رعيه

قتلتي اشواقي بحساس وافكار = وبعد الغياب الظلم منك الهديه

كان الغلا فينا سواليف واشعار = همسك زهر والقلب له مزهريه

كانت مشاعرنا نفل بين الاقفار = و غيمة هوانا مزنتن عقربيه

كنا وكان الحب فارس ومغوار = ماتثني عزومه شطون المنيه

ياخوفي الفرحه تعود لتذكار = وتصير منه قلوبنا جرهديه

الحب يورق بالوفا مثل الازهار = ويموت لا كبرت عليه البليه

ماتنبت الزهره على صم الاحجار = ولا يسقي الضامي سراب البريه