السلام عليكم ...

استقبلوها كما هي... عسى ان تلامس ذائقتكم الشعريه..

يالطلح مامرك مع الصبح صافي=طيرٍ غدا لي امس والشمس حيه
اتلى العهد به راح يطرد مقافي=خبري به اوما في جناحه هنيه
ورد الطلح
لاوالله الا مرنا العصر وافي=كنه غلامٍ مستغير بهيه
اقبل علينا ثم اخذ بانحرافي=يوم الحباري وقعن له سويه
قال الشاعر
يالطلح قل لي عل مابه خلافي=البارحه برد وشمالٍ قويه
كانه تعشى قلت عله عوافي =والحي يجمعه الولي مع خويه
ورد الطلح
لاوالله الا صاد خرب متعافي=واخذ عليه من الثنادي شويه
لامفلسٍ مره ولاقال كافي =يوم اخلفنه عن عشاه حقبيه
قال الشاعر
خابره والله قاطعٍ مايخافي =دايم على الصيده تجي له حميه
انشدك باللي منبتك بالسوافي=عساه في خيرٍ ولافيه سيه
رد الطلح
خبري به اقرش في سبوقه خلافي=مابه بلا وامرح على هالحصيه
والفجر شخّص بالنواظر وشافي=طلعه بعيد ويمته ساحليه
قال الشاعر
يالطلح ذا حبه ولاهو بخافي=متعادلٍ حبه بحب البنيه((يقصد ابنته)
بعض الطيور ان راح قلنا عوافي=لاشك هذا وين ابلقى حليه
رد الطلح
اتعب عليه وعادت الحر يافي=اضرب سهلها والوعر والشقيه
يجيبه اللي رازقٍ هالعجافي= بهايمٍ تمشي على غير نيه
قال الشاعر
يالطلح لك مني يابو غصن ضافي=لاجابه الله وكل نيه مطيه
لاجيك انا في موتر القش هافي=واسقيك هاللي باقي بتانكيه
وآطا على رملة سوافيك حافي=وكلٍ على ماقيل يذكر خويه

وسلامتكم..
الشاعر .. حمد السعيد..

مع تحياتي.. الفكهي..