بسم الله الرحمــن الرحيم

وبالله أستعيــن

أعزائي عزيزاتــي...

كتبت هذه القصيده عند موت خالة أبوي يعني (خالتي)

وكانت وفاتها في نهاية رمضان

والعيد طبعا اختلف كليّا عن كل عيد

وفي لحظه تذكّرتها وعمري مانسيتها

كنت إذا جلست عندها ماكانت تناديني بإسمي لا كانت تقول لي يا

(الذّويبه) يعني تصغير الذّيبه

وكانت الله يرحمها ماترضى أحد يقول فيني شي أو يتكلّم أحد عليّ

و كتبت هالقصيده وكلّي ألم وحزن على مفارقتها بدون وداع

أخلّيكم مع القصيدهــ



.


.


.


يالله يافــارج همـوم عبادك ومجلّـيها ***يا منزّل على خير البشر آياتك والقرآن

ياعالم بالنفـوس وكاشف كل خافـيـها**تغفر لمن ماتت بإثنين وعشرين رمضان

راحت منـيـره وعيون الكون تـبكيها******توارت تحت رمل الثرى شيخة قحطـان

وَدَّعَت( الذّويـبـه) عجوزٍ كانت تغليها****وَدّعْـتها بسـكون والدمع حاير بالأعيان

ياليتهم صـلّوا عليّ قبل أصـلّي عليها***آآآه ياوجـدي على روحٍ بها الحب مليان

حسبي على الوجع حرمني بوس أياديها**قبل ترحل مني روحها للباري المنّــان

طاهرة النفس بالطــيب ربّي مبدّيـها***سمحة الوجه رحومه هي ساس الحـنان

المرض خذا مني عجوزٍ ربّي محلّيـها****أمانة وردّت لخالقها سبحانه الرحــمان

بعيوني فرحة العيد والحــزن مالـيها***عزّي لحالي من كثير الحزن كانه أشقان

ترثـيها أبياتـي من آخرها لباديــها****وتهلّ من مزنة حروفي دموعٍ كما الهتّان

أتصبّر وأزود الجـلادة حين طـاريها****أجامل ربعي وبوسط الضلوع موقدةٍٍ نيران

يالعــنبو قصـيدٍ أبيـاته ماترثيـها********مير كثر الـتوجّد والبـكا عليها ماكـفان


.

.

وسلامتكمــ

واعذروني إذا قصّرت بالوزن أو القافيه



العذر والسموحه إذا كدّرتكم بهذه القصيده الحزينه


تحياتي وتقديري للجميع


كتكوتة الرياض