لاتحسبين العرس توفـي وكتكـات = ولا تحسبينه توكـس والا بونتـي

ولا تحسبين العر س كيكة وطرطات = وصلـة قطعتيهـا ووصلـة بلعتـي

ولاتحسبين العرس تصفيق واصوات = وانتي على صوت الغطاريف همتـي

ولاتحسبين العرس كوشة ولمبـات = وانتي كما الطاووس فيهـا جلستـي

ولاتحسبين العرس احلام في الشات = يامـا بنيتيهـا ويـامـا هدمـتـي

ولا تحسبين العرس روحة وجيـات = اقضبي بيتك عسـى مانهبلتـي

ليلة سعيدة وانت احلـى الجميـلات = تشخص عيون الناس اذا حضرتـي

(واللاينر)حطيـه بــلا زيــادات = لا يخـرب المكيـاج اذا دمعـتـي

(والمسكرة)تحتاج لطـف ومـدارات =حتـى يبـان ازيـن اذا غمضتـي

(والاسبريه )رشيه حتى البصيـلات = ينسك شعرك زين ولو كان زدتـي

وترى(المحدد)فن يحتـاج رسمـات = يبـان رسمـه زيـن اذا ابتسمتـي

العـرس يابنيـة ماهـو شعـارات = تفنـى مراسيمـه وتبقيـن انتـي

ويبقى شريك العمر راعي الطويلات = هذا هو العرس الحقيقـي عرفتـي؟

اول نصيحة لـك حفـظ الصلـوات = صلي العشا والفجر في كـل وقتـي

وفي ليلة العرس الموفـق وبالـذات = ادعـي الكـريـم الله اذاسجـدتـي

والتعري لاترضين عند الكوفيـرات = ولبسك يملـي العيـن اذا لبستـي

واللي على زوجك تحرضك مـرات = ارجـوك شوتيهـا شوتـت بلنتـي

والصبر في العشرة حتى على فتات = ياماحـلا فعلتـك يومـك صبرتـي

واذا حفظت السـر مـع المـدارات = زوجك ترى في عيونه انت كبرتـي

والسوق يعني هاه وقت الضرورات = والاتـرى زوجـك يـدور لمفتـي

زيدي الغطاية وكثري في العبايـات = والله يرضـى عنـك اذا ستـرتـي

اوصيك بالكبسـة وكثـر اليدامـات = حتى لوانـك مـن سببهـا متنتـي

وخلي الرجيم اللي فشلت في مـرات = سويـه مـرة واحـدة لا ولـدتـي

اوراق بنيه ترسل ازكـى التحيـات = خصيهـا بالـدعـوة اذا دعـوتـي