الحمد لله صـاب العبـد مـا صابـه=واللي يجي من عظيم الشان خيرٍ لـه
المعطي اللي سبق عفوه على عقابه=والماخذ اللـي عطانـا خيرنـا كلـه
سبحـان رب عطانـا محكـم كتابـه=فيه الهدى والتقى دقـه علـى جلـه
مرحوم ياللـي نهـارك دوم تقرابـه=وفي الثلث الاخر دموعك جات منهله
يارب ناجاك عبـدك وانتـه ادرابـه=وانت الغفور الرحيم الغافـر الزلـه
المذنب اليوم نفسـه جتـك توابـه=عقب التكبـر تجيـك اليـوم منذلـه
ذل على طاعـة الرحمـن مرحابـه=ذل لنا فيه عـز ليـت نفطـن لـه
ياعل شـي يسبـب ضيقـة ثيابـه=تمحى به السيئات السـود يـا علـه
يالله ثباتك ليا مـن صبـوا ترابـه=عقب ادخلوه اللحد ثم قيل بسـم الله
يالله على ملة المبعـوث واصحابـه=وهالو عليه التراب عيـال عـمٍ لـه
العود شفت الحزن وشلون سوابه؟؟=واخوانه اللي بكوا وعيال خـالٍ لـه
عزوا بعض ربعه الوافيـن واقرابـه=وفي داخل البيت يبكنه خـواتٍ لـه
وعجوزه اللي لها يوميـن مرتابـه=ما علموها عسـى يالله تغفـر لـه
يارب تجعـل يمينـه تاخـذ كتابـه=واجعل حسابه يسـار وحاجبـه فلـه
وصلوا على الهادي المدفون في طابه=عداد ما ساقوا الفنجـال مـن دلـه