بالله تركد وامسك القاع لا تطيـر=فلاح لـو تسمـح وتقعـد دقايـق
انا شريتـك للفلـس والمخاسيـر=وانته تبي المطيار بايـة طرايـق
ما جاك من صوبي مذلة وتقصير=وهذي الحقايق كان تبغى الحقايـق
قد قالها قبلـي رفيـق المناعيـر=اثنين لا تركـي عليهـم رفايـق
هذي المره والثانيه خـوة الطيـر=فلاح من فعلك ترى الصدر ضايق
اعشق لشوفك في طوال المشاوير=وقت الهداد بصافي الجـو لايـق

ان كان شوقك راح مع هدة الطير=فاخذ الكلام اللي عليـه الوثايـق
كله ولع ما خاشره طاري الخيـر=للوقـت بـواق وللمـال بـايـق
ياليت شوقك راح يـم المغاتيـر=اللي ذكرهن رب كـل الخلايـق
لا صفت الزينات صف الطوابير=بين الخزامى والنفـل والحدايـق
في دار ابن وطبان مع ربعه مطير=ديرة رجال دونها السيف عايـق
ماهيب ديرة بوش او طوني بلير=تكرم عن ديـار الخنـا واللفايـق
هذاك شوقي ما عشقت الغناديـر=مع انهـن شبـن بقلبـي حرايـق
وفلاح ياليته كفخ صوب خرخير=كان اصبح الخفاق مرتاح رايـق