ياحي البحه اللي كنها صوت الوتر والناي = ياحي البحه اللي من نغمها يطرب العصفور
هلا يا بحتٍ تفرد حجاجيني وتهز اعضاي = وتـشرح صدري الضايق و تجبر خــاطري المكسور
صباح الـخـير من ثـغـرك تـلـون بالــزهـر دنـيـاي = مع النسمة وشعاع الشمس لي تنثر رحيق عطور
وش النسمة وش النغمة وش الورقه وخـريـر الماي = إلا ذوبتي المبحوح في سمعي حروف شعور
ليا منه رشف سمعي حروفك يرتوي مضماي = ويخضر الهشيم وتصبح ضلوعي غصون زهور
واحس ان الخزامى والنفل بسمك تبوس شفاي = وجسمي كنه الروض اللي توه بالوسم ممطور
حروفك في شتاء عروقي تـتـل البرد من اقـصـاي = وكل مافي الجسد من عرق من دافي دماي يفور
حروفك صبح ما اسمعها تبعثر هاجسي ضوضاي = واضيع بزحمة الأصوات وصوتي يكشف المستور
وأنادي بسمك المقفي على دربي وأنادي الجاي = ويرجع لي صدى صوت أمس كني الشارع المهجور
واحس الروح بردانه وشرياني جمد بدماي = واشوف الناس من حولي نصايب والبيوت قبور
حروفك هي عناويني بها اعرف دربي ومعناي = بها نبضي بها انفاسي وشرب وقوة وظل ونور