بعض الأوادم في مماته خسارات = من عقبه العيشه تصبح مريره
يموت في موته سعاده بلحظات = وتموت كل أفراح كانت صغيره
في موتته تخنقنا ألفين عبرات = وتخنقنا هموم الحزن من هجيره
مرحوم ياللي ماعرف يوم زلات = ندعي لك اللي كلنا نستجيره
يرحمك ربي عد ماهل قطرات = وأعداد جود الله علينا بخيره
فاض الحزن فيض السدود الكبيرات = من فيضها ماعاد صارت كبيره
كلن يهل الدمع ويعيد مافات = ويبكي على موته ودموعه غزيره
يامسرع الدنيا وياسرع الأوقات = نلعب ونلهو وكل لحظه خطيره
ماندري إن الموت يآخذ بسكرات = كيف مايبي يآخذ ولا يستشيره
يقطعك يادنيا الفنا والملذات = ويقطعك يادنيا بعيني حقيره
إن إبتسمنا قلتي هيهات هيهات = لازم أخلي كل فرحه قصيره
ماهيب مره واحده ولاهيب مرات = كم إنفجعنا بموت ناسن كثيره
ناسن لها في كل طاري هيبات = يهتاب منها كل مجلس وأميره
يفز قلب اللي أعتلا بالطويلات = فزة خفوقن مشتعل فيه حيره
لكن يموت الشهم وتبقى الدجاجات = والكل منا يعرف إن ذا مصيره
أما الردي لاراح فيها مسرات = لامات قالوا علها ألف خيره
ياكم واحد بآخر الليل مايبات = منه وخوفه ملتهب من سعيره
يدعي عليه يروح من دون رجعات = يجيه طاعون المرض ومحدن يجيره
وياكم واحد من المخاليق قد مات = مات النبي ويلحقه مليار غيره
وآخر قصيدي بكل مجلس وأبيات = أدعوا لموتا الناس برحمه كبيره
وصلوا على محمد كثير الصلاوات = نبينا اللي نتبع اليوم سيره

الله يعطيك العافيه اخوي خلف

وشرفني ردك وحظورك في بداية القصيده

أدام الله الود بين الجميع

والله لا يهينك

لك مني عظيم التقدير

اخوي فيصل جزاك الله خير ورحم الله موتانا وموتى جميع المسلمين

وصح بدنك والله يعطيك العافيه على ردك وتشريفك لقصيدتي .

وتقبل تحياتي

الله يعظم أجر جميع المسلمين أخوي السبع الأربع ورحم الله موتى جميع المسلمين وغفر لهم واسكنهم فسيح جِنانه .


وصح بدنك اخوي وشاكر لك على هالإطراء

وتقبل تحياتي وتقديري

اللهم آمين وجزاك الله خير اختي كتكوتة الرياض وعظم الله اجر جميع المسلمين

وصح بدنك وشرفني حظورك بهالقصيده .

تقبلي تحياتي وتقديري