ونا جنبك حياتي يا حياتي لونها وردي
شقاوتها حلاوتها .. جميله مذهله تسحر

بعيني .. الجمال انتي وغيرك ظِل تكوينك
ولو جابوا الحسن كله بجنبك شي لا يذكر

(عيونك آخر آمالي ) عبادي قالها قبلي
وقلبي ردد يغني : احبك لو تبي تهجر

أحبك موت يا روحي عساني فدوة عيونك
عسى يومي قبل يومك ولا أبكيك يا أسمر

عسانا نجتمع روحين.. نحيا في جسد واحد
أحاسيسي أحاسيسك . . وما تشعر أنا أشعر

أحبك يا نظر عيني وكلي عاشق ٍ مغرم
(أحبك ليه انا مدري) ولا يمكن بعد أذكر

ولا يمكن أنا أقدر أوصّف خافي شعوري
ولا يمكن بيوت الشعر عن حبي لك تعبر

سكن حبك وسط قلبي بنى في داخله موقع
تمكـّن من شراييني و في جسمي سرى أنهر

أنا من شافتك عيني وقلبي ما عشق غيرك
تملكت الغلا وحدك فلا أبيض ولا أشقر

ولو فارقتني ساعه حياتي تصبح صعيبه
تصدّق إنه أسهل لي .. أموتُ ولا إلك أخسر

ولو عسعس علي ليلي سرى طيفك علي زاير
يناديني .. يصحّيني ويأمرني بما يأمر

ألاقيني أرحب به .. هلا يا مرحبا والله
صباح الخير يا عمري .. صباحك (يـ) الغلا سكر