السلام عليكم ورحمة الله وبركاته

هذه القصيدة كتبتها قبل يومين تحكي موقف معين يمر بي . ولم اكن انوي بنشرها ولكن لطلب زوجتى قمت بنشرها هنا .



مايعذربك الكبر .. وأنـت مـن صغـرك كبيـر ***** والله انـه مايهـز بهيبـتـك قــدر شـعـره


أنا عصاك اللـي تعكزهـا ليـا هبـة عصيـر ***** وأنا حذاك اللي تـدوس بهـا الظـلام وتدحـره

أنا ابنك اللي في حضورك كأنه الطيـر الكسيـر ***** وسيف تشيله في يمينك في اللـزوم وتشهـره

والله انك لو بغيت المستحيل لهامتك سهل ليصير ***** والله إنـي لأقـدره .. ثـم والله إنـي لأقـدره

هذا أنا فارش لك يديني على الرمضاء حصيـر ***** وهـذا أنـا غطيتـك بجفـن تعنـا بسـهـره

ليت كان العمر يهدى مثـل مانهـدي الحريـر ***** أو ياليت المـوت مثـل الذنـب تقـدر تحـذره

كان أنا مهديك عمري من وأنـا طفـل صغيـر ***** العـزاء فـي حكمـة الله مابـيـدي مـقـدره

ويل عينـي كـل ماشفتـه علـى ذاك السريـر ***** كأن من يطعن في ظهري طعن وأدمـى خنجـره

ويـل عينـي لاذكرتـه شايـل حمـل البعيـر ***** وويـل عينـي لالمحـت أفعالـه اللـي تذكـره

يحسب انه في مرضه العاجـز الكهـل الفقيـر ***** ناسـي تاريخـه اللـي كـل عـزه تشـكـره

هذا أنا في ليلة الوحشـه وأنـا جفنـي سهيـر ***** جعـل عينـك مـن هناهـا مزملـه ومـدثـره

والله ان القـرم قـرم ومثلـه يخـلـد أمـيـر ***** وانشـد العـراف ينبونـك بفعـلـه وخـبـره

لاتعاتبنـي ياشاكـر وأنـت بعتـابـك تثـيـر ***** مابقـى للحـزن يابـن أبـوي ثـوب يستـره

لاتعاتبنـي ياشاكـر والمقـدر لــه سفـيـر ***** دنيتـك ماهـي علـى طـول الليالـي مسفـره

وأحمد الله مابكيـت لجـرح سلطـان وسميـر *****ولابكـت عينـي معـاذ الله مـن فرقـا مـره

أبكي العله في أبويه .. جعـل ماعمـره قصيـر ***** لامك الله كان لمـت أخـوك فـي مـا يقهـره

والله ان الإبره اللي فـي يـده مثـل الشطيـر ***** كأنها في ضلع مـن صـدري بعنـف مسمـره

ياليتها فينـي وأبتبسـم وأقـول الأمـر خيـر ***** لكنها فـي مـن يمينـه هـي يميـن الميسـره

آآآآآآه ياليت المرض كاسه وأنا أشرب منه بير ***** بـس لامنـي شربتـه مايـلامـس خنـصـره

والله انه لو طلب روحي لأقـول لـه مايضيـر ***** والعمر لـو يطلبـه مـن عنـد رجلـه لأنثـره

وأنت يادكتـور عـارف ماتـرد أمـر عسيـر ***** والحبـال معلقـه فـي الله يـقـدر ينـصـره

يالله وأنـا طالبـك عبـدك لايضـام ولا يحيـر ***** يـارب قلبـه بالسلامـه والكـرامـه تعـمـره

يارب فرج كربته وأنت الولـي وأنـت البصيـر ***** يارب كن عونـه علـى بلـواه وفيهـا تأجـره

يارب وأنت الحي يارب السمـا وأنـت الخبيـر ***** يارب مـده بالعوافـي طـول عمـره واستـره