جعل يسقا زمان عشت به يوم القلوب أبخير = زمانن فيه طربه ما تلاشت منه طرباته

صباحه غير وسمرات الرفاقه لا تلاقوا غير = على كبدي مثل طعم العسل ليله وسمراته

وطبع الناس سماحه ولاتطرد ورا التقصير = ولاهي بعلى من حدته دنياه شماته

رجالن تحتمي من دون سمعة ربعها وتغير = وإذا طاح الشلي من بينهم يبكون طيحاته

يحبون المواصل حب تغلب كلها للزير = لما حمي الوغا ثم هيب الشجعين طعناته

ألا ياسعد عينك بالفضا وقت الزعل ياطير = لما عاف الكريم الي يفك الضيق مبياته

تحير إدموع عيني وقتها من ضيقتي وتحير = وسط جوفي شوارد نادرات الشعر وأبياته

وجودي كل ما هب النسيم الي يهب أعصير = ومال إظلال سدرن مزهرن في نهج ميلاته

وقفت واردات الماء بعد ما شح جم البير = ضوامي ما جزت والعد هد اليبس طياته

وجودي وجد معلولن تعب مافاده التقرير = وحده باب بيته من هوى باله ومشهاته

يهوجس طول ليله شاردن في عالم التفكير = شجاعن غط من تحت الضلوع العوج ضيقاته

على وقتن مضالي عشت به يوم القلوب أبخير = زمانن فيه لذه ما تلاشت منه لذاته

وعلى ولما وليفن كل ماصبح علي بالخير = تعانقي سعاده والضمير يهد كدراته

صغيرن عند ربعه لاكن إن له عندنا تقدير = تشرفنا زياراته وروحاته وجياته

يتل القلب تل أهل الدلي لامن بدا بالسير = نحيف الخصر ريان الطرف يلعب بخطواته

يقابلني بنفسن طيبه ما يصنع التبرير = يعانقني بلهفة خاطره وبطيب هقواته

صداقات نقيه ما لحقها الشك والتصوير = محبينن يشوشنا بكاء الغالي ودمعاته

نموت ولانمارس لو جفاء محبوبنا التشهير = يموت السر في غب الضمير وغب عطفاته

سلايل روس قومن في اللقاء ما تعشق التأخير = لما صف العدو في حدهم شاجع جماعاته

على ضمر الخيول الي على صوت الطبول أتغير = عليها كل فارس لوحت بنته لفزعاته

وإلا منا ضجرنا ما نمارس لعبة التضجير = تنومسنا سعادات الصديق وشوف ضحكاته

حزين وضايقن جدا ولا طاوعت قول أمشير = عنيد وخاطري من عادته يشتاق سجاته

أسوق الرجل لين أبدي على نايف قصور أسدير = وهي حدي شمال وبعدها لشرق نياته

ومني عد ما نسنس على روس الطوال اعصير = نسانيس المخال وشاقني نسناس نسماته

سلام الله على ربعي وديرتنا مرب الخير = سلام الله على من نهتدي من نور دعواته




وسلامتكم



راشد اليامي