لا..لا..تدور ياقليبي على أسباب=كنّي أشوفك شايل العذر شيلة
بعض الغلا مايحتمل لوم وعتاب=يالله على صبر القلوب العليلة
أدري مقصّر يابعد كل الأصحاب=يامن يساوي في حياتي قبيلة
لكن عزاي...إنك ليا غبت ماغااب=طيفك..أشوفه كل يومٍ وليلة


الرد الأول:
الظرف ذيبٍ غارز الضرس والناب=حمى على صدر المواصل مليله
ينهك بميلاته طويلين الأشناب=وغروٍ طفولي توّ ما لبس شيلة
والا انت لك من بين ربعي والأحباب=ناموس عزٍ لك تقادح فتيله
لو غبت عن ضلع الغلا عنك ماغاب=هجسٍ يسلّي خاطري كل ليلة


الرد الثاني:

بعض العرب تسأل ولا نفتح الباب=وبعض العرب غطّى على كل جيله
والحمدلله كل شيٍ له أسباب=والحب غاية ما يدور وسيلة
لاغبت عني قمت أهوجس ومرتاب=مثل الغريب اللي يدور دليله
وش هي حياتي ما تدور على احباب=وش حيلتي لا صار ما فيك حيلة؟؟