يالغايب اللي كبلتني مراسيك

................... نورس حنيني عاف كل المواني

الا ليالي معتبرها موانيك

.................. كانت تصب الصبح في زعفراني

ومفجوعةِ كانت اتراقب مساريك

.................. من موقها شفها تهل الثواني

استسرقك واسمع تغنج خطاويك

.................. واحاول احبس ماسمعته ف ذاني

واهذي احاول في صميمي احاكيك

................... ويهز صمتك في صميمي كياني

واطش حزني صرخةِ في حواريك

................... ويلمني حزن السكك والمباني

حتى ستاير غرفتك والشبابيك

.................. من غيبتك شفها كئيبه اتعاني

وذيك المرايا والهدايا تناديك

.................. والطاوله والمحبره والمعاني

في مخدعك ذابت ملامح معاليك

................ على التحف في مرسمك والاواني

مو بس انا اللي مفتقد لك وراجيك

................ شف كيف ذبلت هالشُرف والاماني

وسمي وصالك تفتقد له اراضيك

................. عامين ماسيل حضورك مكاني

في غيبتك حافظ ف صدري مماليك

................. ترفض تطيح بكف منهو غزاني

لحضات افكر من غيابك اعاديك

................. واتوب ولعن شيطنة هالاناني

واتلعثمك بحضورهم وارجع انفيك

................. واعن واسرج في غيابك حصاني

انت الشمال اللي ضلوعي محاريك

............... شف كل ماتنبض توجه بناني

مادرهم الخفاق الا سوانيك

................ وانا عطشتك ياحنين السواني

يحق لك تزعل وتزعل ورضيك

................ ليش الغياب وانت نبض المحاني

اتذكرك واذكر فضول الصعاليك

................. لامال خصرك طاح حظ الغواني

كنك ذهب مصبوب فوق المساويك

.................. رح علم الصواغ صب اللياني

ما احسد الا باب بيتك ف كفيك

.................. يامعلم الاعياد طعم التهاني

الدرب ينبت من تدوسه خطاويك

.................. شف شارعك ورده يفوح بأغاني

اتصدق اني من كثر ماني اطريك

.................. خايف حروفك تنطبع في لساني

محمد الوبير ..



والقصيدة عذبة وأنصفها الجمهور قبل إنصاف الناقد الكبير علي المسعودي ..



وحياك الله بين إخوانك في مجالس الرياض ..

وبانتظار كل ما هو جديد ..

تحية وتقدير السبع الاربع ..