يا صاحبي ..
أوّل طريقك حلم ..
& آخره الهلاك
ما بين حلمك
والهلاك اللي ذكرته ..
"جيّتك"
طبعاً ولا يخفى عليك
إني بغيتْ أمشي
معاك
لولا إن ربّي شاء
وأظهر لي
خفايا "نيّتك"

كان الوله
من كل حدب وصوب
يتعذّر "خطاك"
وما كنت أحس
وأشعر وأسمع ..
سوى غنيّتك
أخطيت في حقّي
&
دارت دونما أدري
"رحاك"
ثم اطحنت
حب الزعل كله
وضاعتْ سيّتك

دقّيت ..
ردّيت ..
وسمعتك قلت
خلودي وراك ؟
خلودي مين ؟
الله يرحم قلبي
وعفويّتك

أقنعتني ..
باسلوبك الساحر
وطيبتك ووفاك
وأظهرتلي ..
وحشيّة الناس
ومدى انسانيّتك
مدّيت لي قلبك
مشاعر
من هناك
ليا هناك
حتى اصبحت نفسيّتي
تتأثر بنفسيّتك
ماجا على بالي
تجيني منك
في فوضى جفاك
"كلمة"
تبيّن لي مدى
إتقانك لشخصيّتك
أتقنتها فعلاً ..
وأنا اشهد ما به
بقلبي سواك
&
اللي حصل درس
ووعيته زين
عن نوعيّتك
أدري زعلت
إني هجرتك
دونما
أي اشتباك
لكن ترى اللي صار
ما تستوعبه
عقليّتك
أشياء كثيرة
ما تخليني
أدوّر عن رضاك
من ضمنها كذبك ..
دناءة نفسك ..
وسطحيّتك
لا صار في إمكان
أي إنسان
يسبح في فضاك
فمن الطبيعي
"أهجرك" ..
وأهجر بعد
حنيّتك
أكبر غلط سوّيته
إني كنت "أسرِف"
في هواك
وأكبر نِعم ربي ..
هي إظهاره
خفايا نيّتك
والحين ..
ما والله أبيلك حلم
ولا أبيلك هلاك
فارِق ..
وسلّملي على
ذاك الطريق
&
جيّتك