الشوق معلن وسط قلبي طواري
مَره يهدّي القلب ، مَره يشطـّه

والحب ما تارك بجسمي حواري
وسط المحاني باني ٍ له محطـّه

يرسل له الأشواق عاجل وطاري
من غير أي تشفير لقطه بلقطه

يطبع ملامحها على الخد واري
مشهد صريح ٍ بين حرفٍ ونقطه

ما أخفي الأشواق عنه واداري
أو جيت له بالحب خلسه و سطـّه

جيته غصب وعناد .. بايع و شاري
غصب ٍ على الحاسد ومن ليه سلطه

يا غالي الأثمان يا نور داري
شعري لاجل عينك بدمي أخطـّه

منك عصافيري ومنك كناري
يا مالك احساسي ونبضي وضغطه

لا من لفاني ريح ألقاك صاري
والقاك سيف ٍ ( ع ) المعادي تسلطه

يا أوفى خلان ٍ تحدد لي مساري
واول دروب العشق وآخر محطـّه

أهواك واحبك وهذا قراري
اللي أخذته نهج سيري وخطـّه

غيرك على قلبي لا مر ساري
وانته جهات القلب تسكن ووسطه

**

ومنكم السموحه

صباحكم سكر

***