أحدٍ ليـا جيتـه بيرفـع راسـك=وأحدٍ تمـوت ولا تقـرّب بابـه
وان كان قدرك ما عرفه احساسك=قلّه ترى عنـدي تسـاوي لابـة
أنا رماحك في اللقـا وأقواسـك=عـدوك الهافـي تحـكّ أشنابـه
حنّا حمـاك ...وكلنـا حراسـك=مـا ننثني..حرّابـةٍ ...حـرّابـة
شراوك شيـخٍ عارفيـنٍ باسـك=حـرٍ يدسّـم شاربـه مخـلابـه
الطيب ثوبـك والقيـاس قياسـك=والعزّ ما ياتـي لغيـر أصحابـه
وماهي غريبة..دامها من ساسـك=العمّ ذيبٍ..و( الخوااااااال ) ذيابة

يالليـل لـو جفـن السهـد لباسـك=ما تهـزع اللـي ساهـرٍ لاحبابـه
أشعـر بحرمانـك وحـر أنفاسـك=واصبر على بردك وقـوّ اعصابـه
تجلى من الغبشة نجـوم اغلاسـك=يوم الفجـر يسـدل عليـك ثيابـه
والهجس جاني قبل وقـع نعاسـك=من قبـل موقـي ينهـزم لاهدابـه
ارحب00وعلمك سابـقٍ نوماسـك=ياللي عقب ما ابطـى يفـلّ كتابـه
دقت على روس الغياب اجراسـك=والقرم غالـي لـو يطـول غيابـه
العز في ضلـع الحشـا متماسـك=وسطوة عقاب الصيد فـي مرقابـه
لا شـبّ بـارود الغـوى مقباسـك=شرهتك في اللي ما اعتصب بعصابة
حن نابك الدامي وحـدّ اضراسـك=والذيـب يزبـن فريتـه فـي نابـه
الجذع موته لا صـدع بـه فاسـك=والسيف مـا يفتـك بـدون نصابـه
وان مات في لون الدهـم نبراسـك=والعـد همّـج وانسـقـم شـرابـه
حنا خوالك وسمنـا فـي راااسـك=من دونك اخشوم الكنـد شبااااابـة