سر يمنا لدبي يامرحبا السـاع = دبي تحفظ للبنادم وقاره

لا تنتظر ياخوي تحسين الأوضاع = ماطولك ياليلٍ بعيدٍ نهاره

يا عل قاع مشبّعة بطن من جاع = من بيرق التوحيد تاخذ خضاره

قاعٍ شبرناها زمان التِقِطّاع = يوم الجمل ينزع لظاها فقاره

عشنا بها والراس ما ذاق الإخضاع = يموت عز ولا تشوف انكساره

واليوم عشناها بعد خيرها شاع = ولا فيه شعبٍ ما شكرنا مطاره

الفضل لله غيثنا عم الأصقاع = نعلن ورا الأخرى على الفقر غاره

تجبر كسر شبر الفقر مدة ذراع = ونملى يمين اللي طلب مع يساره

واللي قصير ذراع حنا له الباع = يعني على نهج الرسول ومساره

وإن كانها ضاقت على الشعب الأوضاع = ما ضاق تقدير الوطن واعتباره

وتسلم يابو متعب معا كل ذعذاع = لا يا عمار اللي تجلّى دماره

لك موقفٍ يذكر ويشكر وينذاع = ومع ميلة عقالك تميل البشارة

مير البلا حق المساكين ما ضاع = إلا من رجال العمل والتجارة

تشوفهم واحد على زول ( طماع )= وإن رحت تشكيهم فقدت الوزارة

والا الوطن نجمع على حبه إجماع = ونفوسنا لفداه فيها جسارة

منبع رسل مهبط وحي طاهر القاع = رمله سكينه والمهابه بحاره

نفداه لو عشنا تحت قيظه جياع = يكفي فخر توحيد ربي شعاره