للحزن في قلبي بعد نايف اسراب = تجمعت من عام واحد وعشرين

شهر ثلاثه والشفق تو ما غاب = على الطريق الدايري عصر الاثنين

كنا مشاعر واحدة يوم الالعاب = الروح وحده ما تقولون روحين

صغار ما نعرف مشاريه وعتاب = وتجهل طفولتنا خداع الكبيرين

كنت انت راسي يا بعد كل الاقراب = توقف معي يوم البشر لي معادين

كنت السند كنت الظهر كنت الاعجاب = كنت الفخر كنت العطر والرياحين

كنت الوطن في ساعة يسود الاغراب = كنت البساطة في قلوب المساكين

كنت المعزة في زمن ذل الارقاب = كنت المهابة في عروش السلاطين

واليوم شفني يا بعد كل الاحباب = وحيد لو إني من يسار ويمين

تصكني قومٍ ليا كشّر الناب = القا بهم عز ومعزة وتمكين

وحيد قلبي من لظى غيبتك ذاب = محتاج اشوفك وش لي بشوف ثانين ؟

بعد رحيلك والحزن يفتح ابواب = بعد رحيلك وين انا والفرح وين

بعد رحيلك طيّب الحال ما طاب = بعد رحيلك شفت انا كسرة العين

ياليت ربي يوم قدر لك اسباب = موتك جعل مع موتتك موتتي دين

لا يا بعد كل الحبايب والاقراب = تركتني ضيقة ودمعه وجرحين

تركتني والعالم اغراب واجناب = تركتني طيرٍ كسير الجناحين

واللي جعل صيتك مثل ريح الاطياب = ما اقسى من فراقك سوى عصر الاثنين