عشقت الشعر من صغري ولا لي في الغزل دعوه= وكان أكبر همومي القاف ووزن البيت وإملائي

أكسّـر معظم أبياتي واطلّـع بينهم نقوه= ولا كنت أعرف "المنظوم" وأقول إنه "من انشائي"

وأطير من الفرح لامن صديقي قال لي : حلوه=رح انشرها .. وأقول : اصبر ..! أبيهم يسمعوا القائي

أبا القيها على الشلّـه واسوي بينهم ندوه= وبشرح كل دوافعها .. وأبرر ظلمة اجوائي

خذاني الهاجس وصغري .. وخذتني فرحه ونشوه= وغرتني الحياه وزاد همي وزادت اعبائي

أشوف الناس تتطوّر وأنا باقي معي بلوه= أشكّـل في قصيدي ثمّـن أتمسّـك بآرائي

وإذا قالوا : كسر في البيت .. أقول : اللي حصل سهوه= أكابر في خطاي ولا ألملم باقي أشلائي

ويوم إني عرفتك صار شعري بالهوى غنوه= أدندنها على المسحوب واهيجن "حائي" و "بائي"

غرامك صار عنواني وفي نبضي غدى سلوه=وصرت أهوى جميع الناس وحتى أكبر اعدائي

وصرت الشاعر اللي في غرامك قد رمى دلوه=يبي ينهل حنانك يا حناني وزادي ومائي

أطرز لك من أبيات الهوى يا سيدي صفوه= ولا أبخل باحاسيسي وانافس حاتم الطائي

وأقرّب لك مشاعر حل فيها بغيبتك فجوه= لأنك مالكه كلي وأنا اللي يصعب اغرائي

وصرت أكتب غزل فيك وغرامك ما غدى نزوه= وصرت أنت الهوى والما واسمك يختم اهدائي

وأنا أهدي لك أشعاري وعشقي وشوقي وهقوه= على انك دايم تراعي شعوري وتدمح اخطائي