الشوق يكوي خافقي كيّ في كيّ = والناس تبكي من غلا حيّ للحي
والروح لو راحت بعد روحها روح = مير البلا ياحمود ماعارضه شيّ
ياحمود انا الذكرى تخليني ارتاح = واختص بالذكرى مقولة ( بعد حيّ )
والناس لو قالت عن الناس اجناس = مصيرها تغتاب وتلاحق الغيّ
ياهيه جنب واترك الناس ياهيه = وان وافقوا وافق ولا جنّبت عيّ
وخلك على ماقيل واحد له اسلوب = استاذ في سبك المثايل على الحيّ
يحتاج يلعب في قلوب الملايين = يسلب بعض رهف المشاعر لو شويّ
يلعب عليها بإحترامه مع الناس = ولو شاف غيره ضامي (ن) كان له ميّ
ولو شاف غيره ضايق(ن) مايخليه = يحويه في نفسه مثل ميلة الفيّ
ياحمود عمري ماتهنيت بإحساس = طفل(ن) يتيم وشاعر اغراني الزيّ
اتهندم الهندام والراس مرفوع = والضيقه اللي داخلي جاتني هيّ
ياحمود انا جمهوري اليوم محموم = واحس فيه اليا تَنهّض وانا اجيّ
وان جيتهم ياحمود افخر بهم زود = هم عزوتي هم لابتي يابعد حيّ
ياجّمعة الجمهور ياأطيب الناس = انتم لكم قلبي على إحساس لاهيّ
وانا لي التصفيق يعطيني شعور = طير(ن) غدا في محجر النو للضيّ