المجلس العام

ahm 1 · #1

يا حول ذاك الشرطي .. مدري جندي أو جندي أول ..
المهم واقف عند إحدى الإشارات الطويلة .. في مدينة الرياض ..
لبس اسدرية لونها فسفوري .. ولا معه أي شيء من الأدوات ..
لا جهاز إرسال ولا مسدس عسكري ولا دفتر قسايم ..
ولادباب مرور حتى الصفيرة ما معه لو للتسلية ..
مسكين يسحب رجليه رايح جاي .. بس يردد عبارة ( لو سمحت ألبس الحزام ..
قلت : خل اسولف معه مادام الإشارة تبى تطول..
سألته عن طريقة تأمين الرخصة ..
أثره ما يدري عن التامين .. طيب كيف استخراج أوراق التصليح..
ولاه ما يدري وين موقع تقدير الحوادث..
قلت: وش أعلى قسيمة واقل قسيمة .. ما يدري إلا عن قسا يم معينه ..
نظام المرور في المواقف الخاصة والعامة .. الأخ ما يعرف من المرور إلا اسمه ..
ليه واقف هنا قال : لتنظيم السير قلت : الإشارة تقوم بذلك قال: اسأل النقيب ..
يا حضرت العسكري مرتاح في الوقفة هذى .. لا طبعا حر غبار عوادم سيارات ضوضاء..
وين مرتاح تصدق إني أبى ماء اشرب ..بس البقالة بعيدة وأخاف أروح أجيب ماء..
أتأخر ويمر النقيب وخذ جزء بسبب ترك الموقع..
ممكن تتحرك الإشارة ولعت .. طيب مع السلامة وجزاك الله خير ..
قلت : الضعيف لو واحد قطع الإشارة .. أو فحط اوحتي تفل بوجهه وشلون بيلحقه ..
وذا شاف أحد يعرفه يبي يضحك عليه وعلى وضعه المؤسف.. رجل مرور وعسكري سير ..
امحق الظاهر انه محطوط للتخويف بس .. وإلا وش الفايدة من وجوده بلا نفع..
أو مثل اغلب الوظائف ترزز على الفاضي .. ذر بالعيون حتى يقال: يعمل الموظفون ..
آه يا مجتمع يدور الظاهر ويترك الجوهر ..تبون الصدق زين اللي عندنا رجال مرور ..
احسن من لا شيء .. هذا العراق بلشين من دون مرور ..
عجز ينظم دبابات الجيش الأمريكي والبريطاني..
وعربات الأكراد والتركمان والشيعة والسنة ..

ابو مهند · 26-03-2006, 09:28 PM

هلا بك اخوي اهم واحد ..

يكفي ان يكون مع الشرطي دفتر وقلم يسجل المخالفات ..

دمت بود..

خالد اليزيد · 26-03-2006, 10:15 PM

السلام عليكم

يطولي بعمرك أخوي العزيز

بالنسبة لهالمشكلة والله بكل أسف يفتقد جهاز المرور

على الألية في إختيار منهم الأكفء في مقابلة الجمهور

والمصيبة أنهم يضعون شباب يفتقدون للخبرة حديثي التخرج في الشوارع

وعند الاشارات

وياليت يكون معهم أحد فاهم

يالغالي من يكلفون بالدورات المتخصصة في مجال الميدان

يعودون ويباشرون العمل في المكاتب

لأن لديه واسطه

وهذا لا يعني أن هناك رجال مرور على لباقة عاليه وفهم للعمل المروري

مشكور أخوي

وتقبل تحياتي

أبيض قلب · 26-03-2006, 10:59 PM

اهم واااحد ..
والله كنت أفكر بهالموضوع ..
والله قمة المؤاااساءة ..
تجي تساله مايدري عن شئ بالمرررة ..
حصلت معي كثيررر ..
ويجونك شبااااب يارب لك الحمد والشكر ..
والله العظيييم أذكر لك شئ ماتصدقه يمكن مني ..
وقفت عند إشااارة وتوها صااارت حمراااء وقفت وكنت في المقدمة مع الساائق ..
المهم ولعت خضراااء ومشينا وإلا العسكري جاء بوسط الشااارع ووقفني ..
قلت عسى خير بس

نزل السائق .. قاله هات الرخصة والإستماارة قال ليش
قال قطعت إشااارة
ايششش
شوف الناس باقيه تمشي وشلووون قطعت الأشااارة تمزح أنت ..

إي والله جااااء الساائق عندي مو مصدق قال يقول قاطعين الإشااارة شوف كلمه أنت يمكن يسمع منك ..
قلت خذ الاستمااارة وهذي الرخصة وقوله أكتب القسيمة بسرعة عشااان نمشي قال أيش تقول أنت بعد
قلت ما عليك .. كلمه طيب .. قلت لا تكلمه ولا أكلمه خله يكتب القسيمة وبس

وهذا اللي حصل فعلا .. لإني أعلم النقاااش معه مابيجيب نتيجة فليش أتعب نفسي وأذل نفسي ...

كتب القسمة واخذتها وشلتها من وقتها حتى لا تتسجل علي وبس ..

يعني شوف ببالله تتوقع يصير كدا مع أحد .. قطع اشااارة والإشااارة خضراااء كانت يعني تكذب عينك وتصدق المرور ... مأسااااءة والله ..

الله المستعااان ويعدل حالهم بس

شكرااا لطرحك أخي
تحيتي

ahm 1 · 26-03-2006, 11:57 PM

شكراً على هذا المرور والتعليق أخواني...
ابومهند
خالد اليزيد
أبيض قلب
والله يكون بعونك على هذه المأساة فأحياناً إشارة المرور تقوم بدوره وأحسن منه ...
لماذا ؟
لأنه يحمق ويزعل وهي الاشارة اعقل منه ما تقول: لحد شيء..

... عندي موضوع آخر مع صديق حصل لي ومع الشرطه والحراميه

لعلي في وقت آخر أتطرق له

أرجو أن لايزعل أحد من حدة كلامي أحياناً لأني أرى أنه هذا هو الواقع الملموس عندنا .

دمتم بود وأحاء ..