قصتي مع سائق الليموزين

بسم الله الرحمن الرحيم

قبل ما ابدأ بالقصه احب ان اعتذر على اسلوب نشري للقصه باللغة العامية لأني بصراحه لا افقه اللغه العربيه الفصحه وارجو من الاعضاء الاعزاء بعدم التدقيق في الاخطاء الأملائيه


قبل اسبوع تقريباً كنت طالع انا وعيال عمي وكنّّا رايحين نتعشا في مطعم عراقي المهم بعد ماخصلنا من العشا قال ولد عمي وش رايكم نروح لمقهى ونشرب لنا شاهي اخضر عشان نهضم العشا اللي كليناه قلنا له مو مشكله رح ، المهم وحنا في الطريق دق على جوالي ولد خالتي وهو من سكان جده وقال لي انت وينك فيه قالت له سم امرني وش بغيت قال لي انا الحين في الرياض وابي اشوفك واسلم عليك ، لأننا من زمان ماشفنا بعض قلت له طيب انت وينك فيه قال انا جالس مع اخوياي في مقهى اسمه (وقت القهوة) اللي في شارع التحليه قلت له طيب الحين بجيك
المهم خليت عيال عمي ينزلوني عنده ويروحون وانا بجي معاه بعدين ، وبعد ماتقابلنا وجلسنا مع بعض اكتشفت انه جاي مع اخوياه وسيارتهم ماتكفي ان اجي معهم وبعد ما صارت الساعه 12 ليلاً سرينا من المقهى وقال لي انت معك سياره قلت له ايه بصراحه ما ابي احرجه مع اخوياه ولا ابي اضايقهم في السياره وبعدها جلست امشي على رصيف الممشى حق شارع التحليه وبعد نص ساعه وقفت لي لموزين
وقلت له: كيالهي
قال لي : تيكي
وشفت الباكستاني مبسوط ومستانس
وبعدها جتني فكره حلوه بصراحه لاتلوموني من قوة العطاله مدري وش اسوي
قلت له : صدق انت في اليوم لازم كم جمع فلوس
قال لي: لازم جمع اقل شي 240ريال
قلت له : طيب انا بعطيك 60 ريال بس شرط انا ابي اتمشا في رياز وابي ادور في شارع تحليه وفي شارع تخصصي وفي شارع اوليا وابي اروه حي الديره عند قصر مصمك
قال لي : مافي مشكله
المهم ركبت معاه بس ركبت ورا عشان احس اني سائح ههههههههه وبعد ماشينا اسرع بي الباكستاني وقلت له ياصديق شوي شوي انا قلت نبي نتمشا مو ابي اسابق العالم قال لي مافي مشكله المهم وانا راكب ورا وقفنا عند اشاره في شارع التحليه وكان في شباب راكبين جمس سوبربان وجالسين يطالعون فيني ويضحكون على بالهم اني راكب تكسي من تكاسي لندن او تكاسي امريكا الصفراء
هههههههههههههههههههه
وبعد مامشينا شوي جلست اسولف مع الباكستاني عن باكستان وعن حياتهم وعاداتهم هناك وبصراحه لفت نظري الباكستاني بشي
وقال لي : صديق انت من فين
قلت له : انا من الرياض
قال لي: انا مافي صدق
قلت له : ليش ؟
قال لي : انت مافي من رياز
قلت له : طيب ليش؟
قال لي : انت اخلاق مرره هلو ومرره كويس
قلت له: بصراحه انا اول في ولد في جده وادرس هناك وبعد ماتقاعد ابوي نقلنا للرياض قبل سنتين
قال لي : اها شفت انت مافي عيش في رياز من اول
هههههههههههههه مسكين الباكستاني شكله طاح له في ناس راعين مشاكل من حقين النسيم او حي النضيم عشان كذا ماخذ موقف من اهل الرياض
وبصراحه ما الومه لأن اهل الرياض تعاملهم مع الاجنبي فيه شوي دفاشه وشوي قلق اما سكان جده بصراحه حبيبين مع الاجانب
وبعدها صارت الساعه 3ليلاً وقلت له خلاص صديق ودني حي الملز بيتنا هناك
لأن بصراحه باقي نص ساعه على صلاة الفجر
وبصراحه انصحكم تاخذون جوله مع راعي لموزين في اخر الليل لأن بصراحه الرياض في أخر الليل لها طعم خااااص
بس بشرط لازم يكون راعي اللموزين وسيع صدر ومبسوط

هههههههههههههههههههه



هذا والسلام عليكم ورحمة الله وبركاته


محبكم في الله والرايق/ عبرود