المجلس العام

تعبك راحه · 23-04-2008, 06:26 PM

الله يصلح احوال المسلمين ويفتح لك الزرق ياعبرووووووووووووووووود امين

مقهوي البل · 24-04-2008, 04:34 AM

حبيت اسلم عليك ياعبرود

انا كنت من زملاءك في العمل السابق الله يذكر ذيك الأيام بالخير

بصراحة اسلوبك وقصصك روووووووووووووووووووووعه

وذكرتني بموقف صار لي من حوالي 12 سنة تقريباً بدايات السواقه,,

كنت مركب ثنين من (اصدقاني) وكنا تونا مبزره ههههههههه

المهم مريت من عند مستوصف حكومي في حي الزهرة إلا ذيك العجوز اللي تأشر لي

وقفت اشوف وش تبي

قالت: ابي اروح لبيتي !!!!

قلت: خلاص بشوفلك ليموزين لأني ما توقعت انها بتركب معنا لأن فيه واحد راكب ورى !!!!!

قالت: طيب وصلني عند الإشارة علشان القى هناك تكسي

قلت الله يحيك وانا مستغرب وشلون بتركب جنب خويي ،،،

- طبعاً في ذاك الوقت كانت اكبر من جدتي الله يرحمها -

المهم
بعد ماركبت وصكت الباب قالت ترى البيت عند نادي النصر
هههههههههههههههه

جلست أضحك واطالع في خويي اللي ورى وكان مرتبك وخايف خخخخخخ

لأنها -الله يمدها بالصحة والعافية إن كانت عايشة والله يسكنها فسيح جناته ان كانها ماتت- كانت قصيرة ونحيفة مررررة

وبعد ما وصلنا عند نادي النصر انقلب راسها شوي دخلتنا كذا شارع بالغلط

بصراحة كنت مبسوط اني مسوي فيها خير وخايف لأني ما توقعت انها بتعرف الطريق

بس مشاء الله عليها وقفتنا عند الباب ،،،،،،

لكن !!!!!

لما وقفت وهي تنزل من السيارة طلع واحد من البيت

وكان جسمه كبير وقلت في نفسي بس رحنا فيها

وكان جاي مع جهتي وتوقعت أنه بيسحبني مع الدريشة وبعدها

هههههههههه

ويوم وصل عند الباب سلم علي وتأسف مني!!!!!!!!!!!!!!! وقال :

الله يهديك يا جدتي فشلتينا كل يوم جايه مع واحد

هههههههههههههههههههههههههه

آسف على الإطالة

تحياتي عبرود الله يوفقك ويفتح لك أبواب رزقه

صديق عبرود · 27-04-2008, 12:04 PM

عبروووود ...

سلام عليكم ...

مساء الخير ...

يا زين سوالفك ... بس اشوفك ما تكلمت عن طلعتنا قبل يومين ..

محبك / صديق عبرود (( ابو ذعار ))

ايمان التميمي · 27-04-2008, 02:37 PM

السلام عليكم والرحمه

مااقول الا ...

الله يوفقك يارب العالمين ...

اتمنى لك كل خير تتمناه لنفسك

تحيتي ..

\

شواقه · 02-05-2008, 10:49 AM

السلام
عبرود انا من قريت يومياتك قريتهن لين خلصت وسجلت
قول امين
جعل ربي يرزقك من حيث لا تحتسب

عبرود · 04-05-2008, 04:08 PM

قبل أن ابدأ أحب أن أشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد

نبدأ بالحلقة

الحلقة الثلاثون والأخيرة

الموقف الأول

يقول الرسول صلى الله عليه وسلم
(لعن الله الراشي والمرتشي والرائش الذي يمشي بينهما)

مره من المرات كنت امشي في حي السلام وبالقرب من مركز الدفاع المدني وفجأة أشوف رجال سعودي باين من لبسه أنه رجل برستيج وشبعان

المهم

كان يتناقش مع راعي لليموزين بخصوص سعر المشوار
وبعدين رفض ان يركب معه وبعدها جيت انا ووقفت قدامه
وقال لي : بكم توصلني لمستشفى العسكري ؟
قلت له : بـ 20 ريال
قال لي : والله ابرك من اللي قبلك
قلت له : ليش كم طلب منك ؟
قال لي : طلب مني 25 ريال ومع هذا سيارته ريحتها شينه أما انت لو تطلب 25 بوافق على طول عشان ريحت سيارتك تجذب ما شاء الله عليك

وبعدها ركب وبدأ النقاش بيننا في الطريق وكان بداية نقاشنا عن زحمة الرياض وعن شغل الليموزين وعن النظام سير المرور في المملكه العربيه السعودية
وقال لي : والله لو كل واحد فينا طبق أنظمة المرور بحذافيرها كان ما شفت الزحمه هذي
قلت له : والله انك صادق لانه بصراحه في دبي والبحرين تشوف الزحمه اكثر من عندنا بس تمشي تنتهي بسرعه لانهم يطبقون النظام على أصوله

المهم

وحنا في الزحمه جلسنا نسولف عن بعض الفساد الأداري اللي يصير في بعض الوزاراة وطعباً بقول لكم سالفه وحده ومختصره من ضمن السواليف اللي قالها لي

قال لي : يارجال عندك بعض الجهات الحكومية رايحه فيها من فوق لتحت
قلت له : وشلون ؟
قال لي : انا قبل اربع سنوات اجريت عملية زراعة كلية في الفلبين وعلى حسابي الخاص وانا في المستشفى جاني موظف من السفارة السعودية
وقال لي : كم خسرت على نفسك من أول ما وصلت للفلبين إلى اليوم
قلت له : بصراحه كلفتني الرحله من إلى بـ 280 ألف ريال
قال لي : طيب اكتب خطاب للدولة بتعوض المصاريف اللي دفعتها يمكن يكتب الله رزق منهم لانه المفروض الدولة تعالجك على حسابها الخاص
قلت له : طيب وش الإجراءات
قال لي : اكتب خطاب وأرفق معه صور من التقارير الطبية وصور من الفواتير المستشفى والسكن اللي انت ساكن فيه وصورة أثباتك أو صورة جواز السفر حقك وعطنيها وحنا من عندنا بنرسلها لوزارة الصحة
وأنت بعدها راجع الوزارة في السعودية وشف وش يصير معك
بعدها
لما رجعت للرياض جلست ثلاث شهور وبعدين راجعت الوزارة اللي فرعها بالقرب من سوق السمك اللي في حي المربع

وقلت لهم : ودي اشوف وش صار على معاملتي الخاصة بالتعويض
قال لي الموظف : يبي لها ثلاث شهور عشان تخلص
قلت له : يصير خير
وبعد ثلاث شهور راجعتهم وسألت عنها وبعدها
قال لي الموظف : بصراحه المعاملة ضاعت
قلت له : وشلون تضيع ياخي مايصير وش الأهمال هذا
بعدها
قال لي : عطني جوالك وإن شاء الله بحاول احصلها لك
ولما طلعت من عنده أتصل علي نفس الموظف اللي أخذ جوالي
وقال لي : بصراحة يالشيخ المعاملة موجودة عند بعض الموظفين وهي واقفه عليهم وعشان تمشي المعاملة لازم يبيلها شوي دعم
قلت له : وش تقصد بالدعم ؟
قال لي : بصراحه وعلى بلاطه يبيلها اقل شي 10ألاف دولار عشان نوزعها على بعضنا وبعدها تتحول للماليه عشان تاخذ فلوسك وأعتقد 10الاف دولار بنسبه لك مبلغ بسيط وانت بتاخذ شيك بـ 280 ألف ريال
بعدها فكرة الموضوع
وقلت له : خلاص مو مشكله بس متى تبي اعطيك الفلوس
قال لي : انا اتصل عليك ونتفق على الموعد
وبعدها اتصل علي
وقال لي : بجي لبيتك عشان ناخذ منك المبلغ
قلت له : خلاص أوكيه
بعدها جاني ومعه ورقه مكتوب أني انا تسلفت من المذكور مبلغ وقدره عشرة الاف دولار وها أنا اسدد الملبغ المستحق
وبعدين وقعت على الورقه وعطيته الملبغ وبعد اسبوع صدر الشيك من وزارة الماليه
بعدين انا
قلت له : طيب ما رحت تشتكي للمباحث الأدارية
قال لي : بصراحه كلمت واحد من أخوياي وهو نقيب في المباحث
وقال لي : يارجال احمد ربك ان المعاملة خلصت وهذا النظام عشان يمشي شغلك لازم تدهن السير
سبحان الله حاميها حراميها
بعدها
قلت له : طيب ياخالي هذي رشوه وشلون تقبلها على نفسك
قال لي : وش اسوي لازم أسوي كذا عشان امشي أموري

أخ خ خ خ خ خ بصراحه شي يقهر
وما ضيعنا غير الأشكال هذي
أسأل الله القدير بأن يغفر ذنب صاحب هذا الموقف إنه غفور رحيم

الموقف الثاني والأخير

مره من المرات كنت أمشي في حي السليمانية وبالقرب من ملاهي الخيمة وفجأة أشر لي شاب لابس لبس محترم وملامح وجهه تحس انه ملامح واحد أمير بس سبحان الله الشكل من جهه وهو من جهه ثانية

المهم

قال لي : تكفى ابيك توصلني لسوق الفيصلية بكم ؟
قلت له : بـ 15 ريال
قال لي : والله العظيم ما معي غير 3 ريال
قلت له : معقوله كل هذا اللبس وهالشخصية ومعك 3 ريال طيب مو مشكله تفضل أركب
وبعدها وانا في الطريق جلست اطالع فيه بنص عين وأقول في خاطري وش اللي حدك تروح للفيصلية وأنت ما معك غير 3ريال

المهم

لما جاء ينزل للسوق عطاني 3ريال
قلت له : خلها لك يمكن تحتاج تشتري شي من الفيصلية بس أبيك تدعيلي
قال لي : بذمتك ما تبي تاخذها ؟
هههههههههههههههههههههه

قلت له : ايه
قال لي : الله يخليك ويوفقك يارب مشكور
بعدها انا جلست اطالع فيه وانا فيني شوي ضحكه ومستغرب من شكله لانه بصراحه ما صدق لما قلت له خل الفلوس لك
أسأل الله له الهدايه وان يصلح من شأنه إنه سميع مجيب

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ

وفي الختام

ما يدوم الا وجه الله سبحانه وتعالى
بدأت اكتب فيه هذا الموضوع في نهاية شهر رمضان عام 1428هـ وأنتيهت منه في شهر ربيع الثاني عام 1429هـ
ياما وياما جتني رسائل مكتوب فيها متى الحلقة الأخيرة ياعبرود وها أنا أرد على أصحاب الرسائل هذي وأقول لهم هذي الحلقة الأخيرة يلا أنبسطو
هههههههههههههههههههههههه

وبصراحه أنا من أول حلقه كتبتها ومن أول ما فكرت في كتابة الموضوع كنت متفق مع نفسي بأني اكتب ثلاثين حلقة فقط
لان المواقف كثيره جداً وأنا كتبت بعض منها واللي فيها فائده بإذن الله لانه بصراحه في بعض المواقف ما اقدر اذكرها لأن المثل يقول
(وما خفي كان أعظم)
وبصراحه لو الكراسي اللي في الليموزين تتكلم وتكتب كان قالت أشياء وكتبت أشياء يشيب لها الجبين بس نسأل الله الستر والعافية

بيني وبينكم الموضوع هذا استفدت منه أشياء كثيره وإن شاء الله تكونون وجدتم فيه الفائده أيضاً

أما بنسبة لي من أهم الفوائد اللي استفدت منها أني تعرفت على ناس كثير ومن مدن ودول كثيره وبألأخص أهل الأمارات وعلى رأسهم أبوعلي من أمارة دبي وراشد(ظبياني) من أمارة ابوظبي
وكذلك تعرفت على ناس من دولة الكويت وعلى رأسهم الكاتب حلم من منتدى بناء وأبوخالد من عاصمة الكويت وأبوناصر من منطقة الأحمدي
وكذلك تعرفت على بعض الطلاب اللي مبتعثين في كندا وعلى رأسهم عبدالله من منتدى الزعيم
وكذلك بعض المبتعثين في أستراليا وعلى رأسهم عبدالرحمن (صقار) وعبدالله ابوسامي
أسأل الله بأن ينجحهم في دراستهم ويرجعهم لأرض الوطن في أسرع وقت وهم سالمين وغانمين

وأما في السعودية فحدث ولا حرج بصراحه تشرفت بمعرفت ناس كثير ومن مدن كثيره لا استطيع ذكر أسمائهم بسبب كثرتهم وأتمنا من أي واحد وجد مني كلام جارح سواء عن طريق رسائل ألإيميل أو عن طريق الماسنجر بأن يسامحني وبالأخص الأخ اللي ساكن في حي الواحه

وقبل ما أنهي الحلقة ودي اقول نصائح للزبائن ونصائح لسائقين الليموزين

أولاً نصائح خاصة بزبائن الليموزين

1/ نصيحه لبعض النساء والعوائل لا تسولفون مع سائق الليموزين بكثره سواء كان اجنبي أو سعودي فقط تكلمي معه بخصوص العنوان اللي تبون توصلون له لانه بصراحه كثرة الكلام مع رجل غير محرم لك حرام وقد يدخل الشيطان بينكم ويصل الحديث بينكم إلى تبادل بأرقام الجوالات

2/ لاتستحقرون سائق الليموزين ولا تتكبرون عليه لانه عنده أحساس وهذا الشيء يخليه ينقهر لذى نصيحه احسنو التعامل معهم لانه بصراحه فيه بعض الناس أخلاقهم قذره مع احترامي الشديد لزبائن الليموزين وينظرون لسائق الليموزين بنظرت كائن غريب

3/ لاتركبون مع الليموزينات اللي توقف أمام الاسواق الا إذا كانه رجل كبير في السن فما يمنع لانهم بصراحه سواقين الليموزينات اللي يقفون أمام الاسواق يطلبون مبالغ كبيره ومبالغ فيها

ثانياً نصائح خاصة بسائق الليموزين

1/ دايماً حط أعصابك في ثلاجة وخلها بارده ولا تهتم من كلام الناس اللي تصرخ عليك في الشارع أو يستحقرونك وانت واقف عند الاشارات

2/ دايماً خلك مبتسم مع الزبون وخلك بشوش عشان يرتاح لك وكمل جميل في المشوار وأحسن تعاملك معه سواء كان الزبون سعودي أو اجنبي ولا تستحقر الأجانب وبالأخص الهنود والفلبينيين والبنغلاديشيين

3/ وإذا ركب معك زبون اتبع الحكمه اللي تقول
لا أرى لا اسمع لا اتكلم وأكتم اسرار زبونك ولا تنشرها بين الناس لان الدنيا دواره يمكن يجي يوم وبتقابل الزبون ويوصل له الكلام اللي قاله لك عن طريق ناس ثانيه

4/ خل سيارتك دايم نظيفه وعطرها وانت بعد خلك دايم نظيف ومرتب عشان الزباين ترتاح لك وتطلب رقمك وتخليك توصلهم دايماً

5/ راعي ضروف بعض الزبائن في قيمة المشوار وبالأخص طلاب المدارس العوائل الفقيره والرجل الطاعن في السن

آ ه ه ه ه ه ه ه ه أخيراً خلصت

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
من أهم الحلقات التي كتبتها هي كما يلي

الحلقة الثانية
الحلقة السادسة
الحلقة التاسعة
الحلقة الثانية عشرة
الحلقة الخامسة عشرة
الحلقة السابعة عشرة
الحلقة الثالثة والعشرون
الحلقة الرابعة والعشرون
الحلقة الخامسة والعشرون
الحلقة السادسة والعشرون
الحلقة السابعة والعشرون
الحلقة الأخيرة

وإن شاء الله انتظروني في موضوع جديد وشيق بإذن الله

أسأل الله بأن يفرج هم كل من قرأ هذا الموضوع وأن لا يدع له ذنباً إلا وغفر له ولا ديّناً إلا وقضاه له ولا مريضاً إلا وشفاه له إنه سميع مجيب

هذا والصلاة والسلام على اشرف الأنبياء والمرسلين سيدنا ونبينا محمد صلى الله عليه وسلم وعلى آله وصحبه أجمعين

والسلام عليكم ورحمة الله وبركاته

محبكم في الله وسائق الليموزين / عبرود

شواقه · 04-05-2008, 05:21 PM

لييييييييييييييييييييييييييييييييييييييييييييييييي يييييييييييييييييييييييييييه ؟؟
انت تركت الميزين ؟
لاتنهي حلقاتك لانها مستمره بستمراااااااااااااااااااااااااره ارجوك

تعبك راحه · 04-05-2008, 05:21 PM

حلقات حلوووووووووووووووووووووووووووه وممتعه تمنيت انها ماهي الحلقه الاخيره بس انشاء الله جديدك مايطول

عبرووووووووووووود

جزاك الله خير واااااااااااااااااااااااااااااااااااااالف شكر اخوي

رماد أنثى · 04-05-2008, 08:40 PM

حياك الله أخي الفاضل عبرود..
كم هي رائعة تلك الحلقات تمنيت أنك لم تُنهِهَا فهي تجمع بين بساطة الأسلوب وِسُمو المضمون..
مليئة بالفوائد..مليئة بالنقد الهادف..
أخي الكريم أسأل الله لك التوفيق في الدارين..
وبانتظار جديدك..
وتقبل مني وافر التحايا وفائق الإحترام..

مناير · 05-05-2008, 02:27 PM

اقتباس

الكاتب : عبرود [عزيزي الزائر يتوجب عليك التسجيل لمشاهدة الرابط للتسجيل اضغط هنا]


	الحلقة الأخيرة وإن شاء الله انتظروني في موضوع جديد وشيق بإذن الله أسأل الله بأن يفرج هم كل من قرأ هذا الموضوع وأن لا يدع له ذنباً إلا وغفر له ولا ديّناً إلا وقضاه له ولا مريضاً إلا وشفاه له إنه سميع مجيب هذا والصلاة والسلام على اشرف الأنبياء والمرسلين سيدنا ونبينا محمد صلى الله عليه وسلم وعلى آله وصحبه أجمعين والسلام عليكم ورحمة الله وبركاته محبكم في الله وسائق الليموزين / عبرود

: )

عبروود"

انـــــــاا وحدة من متـــــــاابعينك بس.. " بصمت

ماافيه ولاا حلقة من حلقااتك فـــــــااتتنــــــــي..

الموضووع كله على بعضه " بطل..

موااقفك وطريقت تعاملك مع هالموااقف..

تعلمنــاا منهــاا اشيااء كثيرة..

ابدعت بالموضووع..

وبطريقت السرررد و الاسلووب

ماا كاان ودّي اشووف هالكلمة " الحلقة الاخيرة "

بس داام هااذي رغبتك.. فــ خلااص.. زي ماا تحب : )

تمنيـــــــااتي لك بالتوفيق دااائمــاا.. وابداا

والله يرزقك على قد نيتك..

وعقبــاال ماا تفرحنــاا بخبر زوااجك : )

واكيد بإنتظـــــــاار موضووعك الجديد بكل شغف..

موفق مرة ثاانيــة..

مواضيع ذات صلة
الموضوع	الكاتب	المجلس	المشاركات	المشاركة الأخيرة
..::....::..المميز في مجلس الرياض..::....::..	توتة	مجلس الرياض	24	12-03-2008 12:04 PM
رابطة زعيم آسيا نادي الهلال السعودي	هلالي ودمي ازرق	عالم الرياضة	1689	15-11-2007 07:13 PM
ألعاب نارية.. مسرحيات.. مسابقات.. عروض شيقة.. برامج ثقافية في مواقع مختلفة في مدينة الرياض	$MAJED$	مجلس الرياض	12	19-10-2007 10:30 PM
التقرير الشامل لحفل مجالس منطقة الرياض	خالد اليزيد	مجلس المواضيع المتميزه	58	07-08-2007 04:42 PM
أرشيف.. حملة الرياض بلا حرائــــــــــــق	توتة	مجلس الرياض	0	04-08-2007 03:20 AM

المجلس العام

مناقشة جميع المواضيع الجادة والهادفة وأمور المحافظات

يوميات عبرود في شوارع الرياض

عود نفسك

إذا وضعت أو وضعتي في موقف خطبة مع شريك شديد الجمال ولكنه .... ماذا ستفعـل !!

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 2 (0 عضو و 2 ضيف)

أدوات الموضوع
عرض صفحة الطباعة إرسال هذه الصفحة إلى صديق