المجلس العام

فجر السعودية · 19-12-2007, 01:19 AM

وصلت للحلقة الخامسه
لي عودة لإكمال البقية بإذن الله

قبل ماانسى
اسلوبك سلس
لما تفك ما حتسك : )

عبرود · 20-12-2007, 06:40 AM

الحلقة الرابعة عشرة

قبل ما أبدأ بالمواقف اللي تصير لي مع الزبائن بعلمكم عن حي اسمه على ما اعتقد حي الواحه ويقع خلف قصور العويضه اللي على طريق الملك عدبالله
المهم
قبل أجازة الحج خذيت لي طالب من جامعة الامير سلطان بن عبدالعزيز اللي على طريق الملك عبدالله وبصراحه الولد ما شاء الله عليه شكله ولد نعمه باين من ريحته ولبسه المرتب
المهم
قال لي : ابيك توصلني قدام على طريقك
قلت له : أبشر
وكان موقع بيته في حي الواحه على ما اضن وبصراحه نزلته عند بيت ما شاء الله تبارك الله مرررره روعه وبصراحه المشوار قيمته خمسة ريال وعطاني عشرة ريال من قوة الكاش اللي معه الله لا يضرّه
وبعدها جلست ادور في الحارة واتفرج على البيوت اللي هناك قسماً بالله ثم قسماً بالله ثم قسماً بالله لو معي مثل ثروة الوليد بن طلال وخيروني بقصر أو ببيت مثل هذي البيوت والله ما اشتري الا مثل هذي البيوت اللي هناك وابي مثل مساحتها وهي على ما اعتقد مساحتها على 900 متر أو 1000 متر والله العظيم في بيوت في هذا الحي عليها تصاميم تخليك غصب تجلس تتفرج عليها من روعة التصميم وبصراحه احس اللي مصمم البيوت هذي واحد حشاش والعياذ بالله لذا انصحكم تاخذون لفه في هذاك الحي وبعدها ما تلوموني اذا شفتو تصاميم البيوت ما شاء الله تبارك الله

نرجع لمواقفنا مع الكستمر اقصد الزبائن اللي اوصلهم

الموقف الأول

كنت امشي عند سوق الزل اللي في شارع الثميري واشر لي رجال كبير في السن على ما اعتقد عمره 60 سنه بس مواصفاته ما شاء الله عليه 40 من قوة الصحه اللي هو فيها ما شاء الله عليه
المهم
قال لي : ابيك توصلني حي النظيم
قلت له : ابشر
قال لي : بكم ؟
قلت له : بـ 30 ريال
قال لي : تستاهل
وبعدها ركب معي وكان معه كيس فيه 7 عقل (جمع عقال) وسبع طواقي (جمع طاقية) وسبع علب شماغ بروجيه بس مدري كم مقاساتها وبعدين سألته
قلت له : ماشاء الله شكلك تبيع شمغ وعقل وطواقي
وبعدها جلس يضحك علي
وقال لي : انت متزوج ؟
قلت له : لا والله باقي ما تزوجت
قال لي : اهااا اجل اذا تزوجت بقول لك وش اسوي بالعقل والشمغ والطواقي
ههههههههههههههه
قلت له : افااا ليش ؟
قال لي : هذي العقل والشمغ والطواقي شاريها لعيالي عشان عندنا عرس بعد أسبوع وابيهم يلبسونها
قلت له : ما شاء الله كم عندك ولد ؟
قال لي : عندي 12 ولد
قلت له : طيب معقوله ما يقدرون يشترون لهم شمغ وطواقي وعقل بنفسهم
قال لي : لا انا ما خلي احد يطلع برا البيت ولا يروح محل الا وانا معه
قلت له : ليش كم اعمارهم ؟
قال لي : اصغر واحد فيهم عمره 4 سنوات والأوسط عمره 16 سنه
قلت له : ما شاء الله تبارك الله طيب اللي عمره 16 سنه ليش ما يشتري له بنفسه
قال لي : برضو ما اخليه يطلع برا البيت ياويل اللي ما القاه في البيت
قلت له : حتى الحاره ما يطلع لها ؟
قال لي : ايه حتى الحاره ما يطلع لها بس وقت الصلاة يمشون قدامي ويرجعون قدامي
المهم
لما وصلنا عند حارتهم
ههههههههههههههههههههههههههههههههههههههه
كانو عياله واقفين ومجتمعين عند باب البيت وسبحان الله كأنهم حاسين ان اللي راكب الليموزين ابوهم والله في خلال جزء من الثانيه تشوفهم يدخلون البيت بسرعه كانهم جرابيع يبون يدخلون الجحر
هههههههههههههههههههههههه
وبعدها جلس يقول : اوريك فيهم الحيوانات
قلت له : ليش ياخالي مافيها شي اذا جلسو عند باب البيت
قال لي : انا ماعندي بزارين يجلسون عند البيبان
قلت له : ترا ياخالي كذا بتخليهم يتعقدون منك
قال لي : طز فيهم
بصراحه بعدها انا سكت قلت هو حر في عياله
بس تبون الصراحه الشيء هذا غلط

لأن المثل يقول
الشيء إذا زاد عن حده ينقلب ضده
يعني لما الواحد يشد على عياله بزياده على اللزوم بعدها لما يكبرون والله العظيم أي شي تافه قدامهم يشوفونه يجلسون يناظرون فيه ببجاحه ويمكن يوصل الأمر إلى تكسيره وتخريبه
لذى نصيحه لكل أب أسره بأن يربي عياله مثل صيد السمك بالسناره
وهو بأن يرخي الحبل شوي ويشد عليه شوي ولا يشده مررره ولا بعدين بينقطع الحبل في اخر المطاف

الموقف الثاني

طبعاً هذا الموقف صار في يوم عرفه أي قبل العيد
كنت ماشي من عند سوق الرياض مول وأشر لي واحد من أهل الجنوب وكان معه شنطه وأكياس فيها ملابس جديده وكيس فيه حلاوة سنيكرز وكيكه وعلبة لبن وقارورة ماء
وكان الوقت قبل صلاة المغرب بـ عشر دقايق لانه كان صايم صيام يوم عرفه
المهم
قال لي : ابيك توصلني حي الروضه عند خياط ناخذ ملابسي من هناك وبعدين تطلعني المطار
قلت له : أبشر
قال لي : بكم ؟
قلت له : الروضه بـ 15 ريال والمطار بـ 50 ريال
بعدها ركب معي
وقال لي : الللله ياخرجنا
قلت له : عسى ما شر وش فيك ؟
قال لي : ياخي انا اسافر للخارج بعض الاوقات وأروح للبنان ومصر وماليزيا والمغرب وأشوف حريم بدون عبايات ومع هذا محترمات اما هنا في هذا السوق تشوفهم لابسين عبايات وتغطيات ولكن للأسف لبسهم ضيق ومخصر ويجلسون يطالعون في الشباب ويتحارشون معهم والله شي يقهر يارجل
قلت له : يارجال وما خفيه فهو أعظم الله يستر على محارمنا بس
وبعدها دق جواله ورد عليه
وجلس يقول : هلا بعمري هلا بقلبي انا افدى هالصوت ياروحي ياشيخه

بعدها انا ضاق صدري قلت في خاطري هذا ما يستحي على وجهه وكان على بالي انه يكلم خويته او صديقته
وبعدين لما قفل الخط
قلت له : ما شاء الله شكلك راعي غزل وكنت ابي اشوف ردت فعله
قال لي : لا يارجل عيب عليك
قلت له : اجل جالس تكلم مين قبل شوي
قال لي : هذي عمري وقلبي ونور عيوني زوجتي اللللله يحفظها
هههههههههههههههههههههههههههه
قلت له : الله يخليها لك ان شا ءالله
وبعدين قلت له : ياخي شكلك عزوبي مو باين عليك انك متزوج
قال لي : ياخي انا موظف في شركة الاتصالات ومتزوج قبل شهرين وزوجتي عايشه في الجنوب وتشتغل مدرسه ولا لقيت لها نقل للرياض وبصراحه فقدت زوجتي ولي عنها الحين شهر بالضبط وابي اروح للمطار عشان اسافر لخميس مشيط واشوفها هناك
قلت له : اجل متحمس على الاجازه
قال لي : استناها بفارغ الصبر بس الله يخارجنا
وبعدين جلسنا نسولف عن حياته في الرياض
قلت له : طيب انت عايش مع مين هنا ؟
قال لي : انا عايش لوحدي
قلت له : اجل تجتمع مع اخوياك في الليل
قال لي : تبي الصراحه بس ما ابيك تزعل
قلت له : لا عادي خذ راحتك
قال لي : بصراحه انا اكثر اخوياي من اهل الرياض وبصراحه شباب الرياض مع احترامي لك فيهم شوي غرور وفيهم شوي تكبر ياخي اذا طلعنا مع بعض لازم ترسم وتشخص كانك بتروح لعرس او عزيمه مهمه وبعدين اذا جلست معهم يجلسو يترقون علي كاني مو سعودي
وبصراحه صرت اجلس مع اليماني والهندي حق المغسله واجلس اسولف معهم كل يوم ونشتري غدا وعشى مع بعض وبصراحه جلستي معهم احسن من ان اجلس مع اخوياي حقين العمل
قلت له : الله يعينك
وبعدين سكت شوي
وقال لي : ياخي والله العظيم عندنا في الجنوب تجار ما شاء الله عليهم الواحد يملك ثروه بستطاعته يشتري نص الرياض ومع هذا تشوفه متواضع جداً ويلبس لبس عادي وعياله تشوفهم محترمين واخلاقهم عاليه اما انتم ياحقين الرياض للاسف ولا تزعل مني مغرورين شوي
على إيش مدري
هههههههههههههههههههههههههههه
وبعدين وحنا في الطريق للمطار جلس يرقص
ويقول : ياخي انا اليوم مبسوط مررره
قلت له : جعله دوم ان شاء الله
قال لي : اخ خ خ خ والله مشتاق للأهل ولزوجتي
وبعدها نزلته المطار
المهم
تبون الصراحه كلامه عن بعض اهل الرياض صحيح الا من رحم الله وهو ان فيهم شوي غرور وتكبر على بعض الناس وهذا الشيء للأسف اشوفه في بعض أقاربي
بس ما اقول الا الله يهدي الجميع

الموقف الثالث
وهو اغرب مشوار واغرب موقف صار لي من يوم اشتريت الليموزين

وهو موقف الجثه اللي وصلتها من مخرج 15 إلى نهاية مخرج 16 بحي السلي وبالقرب من عند بوابة سكن الحرس الوطني

المهم

وانا ماشي في طريق الـ 100 من عند مخرج 15 أشر لي هذاك الرجال اللي لابس ثوب كله بقع دم وكان واقف في الشارع الثاني بحي السلام ولفيت له وفتحت الدريشه وكان ثوبه مثل ماقلت لكم فيه بقع دم
وقال لي : معي جثه ابيك توصلها لي نهاية طريق مخرج 16 بحي السلي عند سوبرماركت روم
وانا بصراحه كنت خايف شوي
قلت له : ابشر
قال لي : بكم ؟
قلت له : بـ 15 ريال
قال لي : انا بعطيك 20 ريال بس ابيك توصلها بسرعه
قلت له : ابشر
وبعدين جاب الجثه وكان حاطها في كيس زباله كبير اسود وهو شايلها كانت ثقيله شوي وكانت فيه نقط دم تنقط من الكيس
قلت له : لحضه الله يخليك خلني اجيب شي افرش فيه الشنطه عشان ما تبقع الشنطه لي تكفى
وبعدين شفت لي كرتونين فاضيات وشقيتهم من النصف وفرشت فيهم الشنطه وبعدها شلنا انا والرجال الجثه وركبناها وكانت ثقيله مرره وكان وزنها على ما اعتقد 120
وانا بصراحه كنت خايف شوي
وبعدين وصف لي الرجال العنوان وعطاني رقم جوال الرجال اللي بياخذ مني الجثه عشان اسلمها له اذا وصلت هناك طبعاً الرجال ما ركب معي بس عطانياها وقال لي وصلها هناك
قلت له : طيب ليش ما تركب معي
قال لي : انت شكلك ثقه ومنت مسوي فيها شي وانا بصراحه مشغول شوي
المهم
وانا في الطريق جلست افكر وش اسوي في الجثه هل اخذ الجثه وأسلمها للجهات المختصه ولا لا وبعدين قلت في خاطري يارجال المره هذي مشيها
وبعدين لما وصلت للعنوان اللي وصفه لي الرجال دقيت على الرجال للي بيستلم الجثه مني وسلمته الجثه وبعدها مشيت من عندهم بسرعه عشان ما احد يشوفني

÷
÷
÷
÷
÷
÷
تدرون وش هي الجثه

الجثه عباره عن ذبيحة حاشي كامله مع راسها
هههههههههههههههههههه
بس الغريب انه ما كان معي راكب فقط الذبيحه اوصلها من فرع لملمحة لحوم إلى فرع ثاني في حي السلي
والجهه المختصه اللي كنت ابي ابلغ عن الذبيحه عندها هي البلديه
بس قلت يارجال والله محد مسوي لك شي في البلديه
لانه بصراحه نقل الذبيحه بدون ثلاجه شي مقرف بس الشكوه لله

وأخيراً خلصت
وللحديث بقيه مع مواقفي مع زبائن الليموزين

محبكم في الله وسائق الليموزين / عبرود

نوره القشرا · 21-12-2007, 11:22 PM

يمكن اول مره ارد على مواضيعك اخوي عبرود بس اني متابعه ..

صراحه ماشاء الله عليك ربي يحفظك ويخليك لاهلك ان شاء الله ويشفي الوالده ..

تسلم اخوي مره ثانيه ربي يعطيك العافيه ..

اختك : نوره القشرا ..

$MAJED$ · 22-12-2007, 02:07 AM

السلام عليكم

عبرود كمل ....

موضووعك ولله يبيله تشييك كل يوم ..

حلقات وقصص بعضها ماقد سمعناها

واصل

بانتظار الحلقه القادمه

تحياتي

نفسي عزيزة · 22-12-2007, 08:45 AM

من الأن إلى أخر لحظة أنا متابعه لك

قد أكن تاخرت وذلك لتأخري بالأنظمام معكم

أدخلتنا جواء أتممت جميع الحلقات وسأصبح متابعه لك أخي الكريم

وفقك الله ...... وحفظك لأهلك ولوالدتك .... وشفاها الله لكم

دمت بخير

فتـــــــMـــــــو · 22-12-2007, 06:22 PM

عبرود

والله انك فناااااااان ياشيخ

والله يرزقكك ويعطيك على قد نيتك وكدك وتعبك

ياماوياما من المواقف اللي بتمر فيها

بس بسالك تركب هنود معك

والسؤال الثاني

كم تجلس تمشور في شوارع الرياض كم ساعه يعني

والسؤال الثالث

الله لايهينك ورى ماتجي تسدحلنا موضوع بالصرقعه ولا مطلقنا بعد انت

عبروووود تسللللللم على الموضوع

:.:مهره:.: · 22-12-2007, 07:39 PM

مشكوور على القصص الحلوه

ومواقفك فيها المحزن والمفرح

تصدق اتمنى اني ادور الرياض شارع شارع ...احس كل حي له عالمه

واخوي نفس الشي حتى انه يفكر يركب خط البلده ((ابو ريالين))عشان يدور ع الرياض

ع العموم انا من المتابعين للمواقف والى الاماااااام اخوي عبرود

ملك بدون مملكة · 23-12-2007, 04:17 PM

و ربي بطل

يعطيك العافية

<< متابع بشكل يومي

الــســــيــف · 24-12-2007, 08:30 AM

عبرود من كم يوم بعيد عنك وعن القاريين سويت حادث فوق بأربعين الربوة وسيارتي لها كم يوم بالورشة

واليوم أول يوم دوام لي ،،

طلعت الصباح من البيت ادور ليموزين ،، وتذكرتكـ ،،،

قلت يا ليــت يمـــر عبـــرود وينقذنااا من هالبـــــرد ـخخخخخخخخخخخخخخخخـ

فديتك والله ،،،، والله يعطيــك العافيــــه

ســــلامي ،،

زاحف بس من الحب ناحف ^_^ · 24-12-2007, 11:46 PM

ههههههههههههههههههههه
والله من اليوم وانا اقرء اقسم بالله ضحك بس والله تسلم على الموضوع

مواضيع ذات صلة
الموضوع	الكاتب	المجلس	المشاركات	المشاركة الأخيرة
..::....::..المميز في مجلس الرياض..::....::..	توتة	مجلس الرياض	24	12-03-2008 12:04 PM
رابطة زعيم آسيا نادي الهلال السعودي	هلالي ودمي ازرق	عالم الرياضة	1689	15-11-2007 07:13 PM
ألعاب نارية.. مسرحيات.. مسابقات.. عروض شيقة.. برامج ثقافية في مواقع مختلفة في مدينة الرياض	$MAJED$	مجلس الرياض	12	19-10-2007 10:30 PM
التقرير الشامل لحفل مجالس منطقة الرياض	خالد اليزيد	مجلس المواضيع المتميزه	58	07-08-2007 04:42 PM
أرشيف.. حملة الرياض بلا حرائــــــــــــق	توتة	مجلس الرياض	0	04-08-2007 03:20 AM

المجلس العام

مناقشة جميع المواضيع الجادة والهادفة وأمور المحافظات

يوميات عبرود في شوارع الرياض

نداء الى مساهمى ظلال جده السويدانى بشأن ارسال برقيات - - وبعض ما تم انجازه حتى الان

°l||l° ((المتميزون)) لهذا الأسبوع °l||l°

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 2 (1 عضو و 1 ضيف)
المـجروح

أدوات الموضوع
عرض صفحة الطباعة إرسال هذه الصفحة إلى صديق