| الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور | |
|
|
|
|
|||||||
| الانتساب | تعليمات س - ج | قائمة الأعضاء | المفكرة | إشارة الأقسام مقروءة |
المجلس العاممناقشة جميع المواضيع الجادة والهادفة وأمور المحافظات |
إعلانات منتديات منطقة الرياض
|
|||||||||||||||
|
|||||||||||||||
 |
|
|
LinkBack | أدوات الموضوع |
|
#1
|
||||
|
||||
|
إجازة عبرود
بسم الله الرحمن الرحيم السلام عليكم ورحمة الله وبركاته أما بعد قبل أن أبدأ أحب أن أعتذر على كتابة الموضوع باللغة العامية لأني بصراحه ما اعرف أكتبه بالفصحى كل يوم أثنين في وسط الاسبوع اجتمع مع بعض الشباب في استراحه في حي السلي وهم شباب ينشرون بالذهب بسبب أخلاقهم العالية وأحسن مافيهم انهم ما يشربون الدخان وأسوء مافيهم انهم يزعجونا بالبلايستيشن وعددهم 9 أفراد منهم المدرس ومنهم الضابط ومنهم الموظف الأهلي ومنهم الموظف الحكومي وطبعاً وأنا معهم سائق لليموزين المهم وفي يوم من أيام الاجتماع اللي هو يوم الاثنين بتاريخ 1/4/1429هـ وبعد ماخلصنا من العشاء جلسنا نسولف مع بعضنا ونشرب شاهي أخضر عشان نهضم العشاء وبعدها قلت للشباب : ياشباب الاسبوع الجاي أجازه دراسية لمدة اسبوع وش رايكم نروح لمدينة حقل اللي عند منطقة تبوك ونتجول على الحدود الشماليه وننزل من هناك على حائل وبعدين نرجع للرياض بعدها جلسو العيال يتشاورون مع بعضهم وأنا جالس ازن على روسهم وبعدها رد علي واحد فيهم وقال لي : طيب وشغلك على الليموزين وش بتسوي فيه قلت له : يارجال ما عليك هذي اجازه من عندي عشان اكثر الزبائن معطلين ومسافرين برا الرياض وقلت في نفسي خلنا نرتاح شوي من غثا الليموزين بعدها قالو لي : والله ما ندري بنشوف وضعنا مع اهلنا و اذا صار شي اتصلنا عليك ويوم جاء يوم الجمعة في الليل أتصل علي واحد فيهم يقال له أبو يوسف وهو من اعز أخوياي الله يذكره بالخير وقال لي : هلا ابوسعد ها تخاوينا قلت له : ها اخيراً اتفقتو ؟ قال لي : بصراحه اتفقت انا وأثنين من الشباب بس أما باقي الشباب مشغولين مع اهاليهم قلت له : ما يخالف بس اهم شي نطلع من الرياض بصراحه انا بتجيني حموضه إذا ما طلعت برا الرياض هههههههههههههههههههههه وبعدها قال لي : بصراحهة بنغيّر خطة السفر قلت له : وش خطتكم ؟ قال لي : بصراحه نبي نروح للمدنية المنوره ونجلس فيها يومين وبعدين نروح لينبع البحر ونتمشا كم يوم ونرجع للمدينه المنورة وبعدين نرجع للرياض قلت له : أي شي تبون تسوونه انا مستعد بس اهم شي نطلع من الرياض وبيني وبينك أنا من زمان ما رحت للمدينة المنورة بصراحه فرصة طيبة أننا نروح لها وبعد فكرة ينبع البحر فكرة طيبه خلنا نكتشف وش في بنبع البحر وتبون الصراحه انا اخر مره رحت للمدينة المنورة من زماااااان قبل التوسعة حقت خادم الحرمين الشريفين الملك فهد "رحمه الله" المهم اتفقنا بأن يكون السفر يوم الاثنين الموافق 8/4/ 1429هـ بعد صلاة العصر ولما جاء اليوم الموعود طلعت انا وثلاث من الشباب وهم على النحو التالي أبويوسف هو صاحب السيارة وموظف أهلي ورجال يحب الترتيب ويحب النظافه وبرستيجه عالي ومدمن على العطورات مثلي ابوعبدالله ضابط برتبة ملازم أول في احدى القطاعات العسكرية ورجال يرفع الضغط ومزحه كثير وجسمه كبر جسم الممثل يوسف الجراح وبصراحه هو اللي يحرسنا من شر الاعداء ههههههههههههههههههههههههه أبوعقيلي رجال موظف حكومي وللأسف مشجع نصراوي ومتعصب وجريء وفيه ووجه مغسول بمرقه وأي شيء ما يعجبه يقوله في وجه الواحد ولا يستحي وانا سائق لليموزين واحب الوناسة واحب السفر والاكتشافات في السفر واحب انوم في السياره اذا كنت ماسك خط واحب التطعيس المهم طبعاً الاخوة الصعايدة متفق معهم بأن وقت السفر بعد صلاة العصر مباشره بس ابوعبدالله الله يصلحه اخرنا عشان يشتري كيس سمنت لبيت أهله ههههههههههههههههههههههه المهم اول شي اكتشفته قبل ما نمسك الخط ان ابوعبدالله الله يوفقه اصغر مني بأربع سنوات لاني اعرفه من ثلاث سنوات وكان على بالي اكبر مني في العمر لانه ما شاء الله عليه مثل ما قلت لكم جسمه كبير ولما جاء وقت السفر قال لي : ابوسعد اركب قدام قلت له: لا والله انت اللي اركب قدام انت اكبر مني وبعدها جلس يضحك علي وقال لي : ياغبي انا اصغر منك بأربع سنوات قلت له : وشلون اصغر منّي ليش انت مواليد كم ؟ قال لي : انا مواليد 1401هـ قلت له : ايشششششششششش بعدها ركبت قدام وأنا مقهور وجلست اتذكر الثلاث سنوات اللي كنت احترمه فيها واخليه يدخل قبلي وياكل قبلي ويشرب القهوه قبلي المهم مشينا قبل المغرب بساعة طبعاً رحنا مع طريق القصيم وحنا في الطريق الرياض القصيم كان الجو كله غيوم ولما تعدينا الرياض بـ 200 كيلو جانا مطر وخير ولله الحمد حتى وصلنا القصيم وبعدين وقفنا في احد محطات القصيم وصلينا المغرب والعشاء مع بعض جمع تقصير وبعدها دخلنا البقاله واشترينا بساكيت وحركتات وعبينا زمزمية الشاهي من البوفيه اللي في المحطه وبعدها كملنا طريقنا للمدينة المنورة وحنا في الخط جلسنا نستمع على بعض اشرطة المحاضرات وبعض اشرطة القصائد الشعرية وبعدها جلسنا نسولف مع بعض عن مواقفنا اللي صارت لنا في الماضي وحنا مسافرين وعن روحاتنا وجياتنا وعن مواقفنا اللي تصير في عمل كل واحد فينا تبون الصراحه اللي قهرني في الخط ان العيال الله يصلحهم ما خلوني انوم لي شوي لانه بصراحه كنت تعبان مررره بس ابوعبدالله الله يصلحه جلس يستهبل علي ويدخل المناديل في اذني ويطفشني لين وصلنا المدينه المنوره وكانت الساعة على ما اعتقد 12 ليلاً وأول شي سويناه قبل ما نستاجر شقة هههههههههههههههههههههههههههههه رحنا نبحث عن مطعم البيك عشان نتعشا والله اللي يشوفنا يقول ما عمرنا كلينا بروستد في حياتنا بس لا تلومونا لانه بصراحه بروستد البيك غطّا على كل الحضور ومع احترامي الشديد لمطاعم البروستد في الرياض فااااااشلة ما عدا مطعم الكوخ اللي في طريق الملك عبدالعزيز في حي المرسلات طعمه مقبول شوي المهم وبعد ما خلصنا من البيك جلسنا ندور على شقه مفروشة أو فندق بالقرب من الحرم النبوي بس للاسف ما لقينا شي كلها مستأجره ومحجوزه وبعدها رحنا لشقق مفروشه بعيده شوي عن الحرم بس وحنا في الشقه نشوف منارات الحرم النبوي من بعيد وبعدها تبطحنا على السرر اللي في الشقه ونمنا الساعة الواحده ليلاً وصحينا قبل اذان الفجر بربع ساعة وبعدها رحنا للحرم وصلينا الفجر وبعد صلاة الفجر كل واحد فينا مسك له زاويه وجلسنا ندعي ربنا باللي في خاطرنا وأبشركم صليت ركعتين في روضة المسجد اللي تكلم عنها الرسول صلى الله عليه وسلم وجلست ادعي لكم وقلت اللهم فرج هم كل مسلم واغفر ذنب كل مسلم واصلح شأن كل مسلم طبعاً عشان انتم مسلمين المهم بعد ما شق النور وطلعت الشمس خذينا جوله في الحرم النبوي ورحنا على جهة قبر الرسول بس كان فيه زحمه غير طبيعية وبعدها طلعت انا قبل العيال من الحرم ومشيت في ساحات المسجد الحرام وجلست ما بين قبر الرسول ومقبرة البقيع وجلست اتخيل كلام كان مكتوب في احدى الكتب اللي قرأتها واللي تتكلم عن السيره النبوية وهو كتاب اسمه (الرحيق المختوم) وكان الكتاب يقول بأن الرسول صلى الله عليه وسلم قبل ما يموت راح لمقبرة البقيع يستغفر للصحابة وبعدين رجع للبيت وتعب شوي وبعدها القا خطبة من بعد صلاة الفجر وبعدها مات صلى الله عليه وسلم ودفن محل ما مات وانا اتذكر احداث القصه جلست اتخيل المدينة بدون عمائر وبدون بيوت واتخيل الرسول وهو يمشي قدامي مثل ما كتب في القصة وبيني وبينكم والله اللي فيه هموم الدنيا كلها ومتضايق ويجلس في الحرم النبوي قسماً بالله ان حالته النفسية تتحسن وينشرح صدره بدون أي تكلف اخ خ خ خ خ خ خ يالمدينة المهم بعدها طلعنا من الحرم وحنا دايخين نبي ننام بس ابويوسف الله يوفقه قال لنا لازم نفطر وبعدها نزلنا للشقه وراح جاب لنا فول وتميس وبعدها دقينا في النعمه وبعد ما خلصنا كل واحد فينا طب على سريره وهاتك ياشخير هههههههههههههههههههههههههههههههه وبعدين صحينا قبل الظهر وتوضينا ورحنا للحرم وصلينا الظهر وبعد الصلاة جلس كل واحد فينا بزاويه وخذ من ذا الدعاء اللي يحبه قلبك إلى ان صارت الساعه 2 الظهر وبعدها طلعنا ورحنا لشارع في المدينه ما شاء الله كله مطاعم مندي وسمك وتغدينا وبعدها قررنا بأن ناخذ ملابسنا من الشقه ونروح نصلي العصر في مسجد قباء وبعدين نروح لمدينة ينبع البحر وقبل ما نسافر من المدينة خذينا لنا جوله في المدينة المنوره ورحنا عند جبل أحد وجلسنا نتأمل فيه ونتذكر الاحداث اللي صارت عند هذا الجبل وسبحان الله حجمه كبير ولونه اسود وبعدين وصلنا عنده ورحنا لبوفيه قريب من الجبل وعبيّنا زمزمية الشاهي وسافرنا لينبع البحر طبعاً المسافه بين ينبع البحر والمدينة المنورة 200 كلم تقريباً مدينة ينبع البحر انا اخترعت اسم لمدينة ينبع البحر وهو المدينة البرتقالية بسبب كثرة أنارة المصانع والشركات وهي مُناره بأنوار برتقالية اللون وبصراحه لوتشوفون منظر المصانع الشركات البترولية وأعمدة الشعلة وهي تطلع منها النار شكلها مررره جميل طبعاً أول ما وصلنا رحنا ندوّر على شقق مفروشة بس للاسف تحطمنا نفسياً ومعنوياً تدرون ليش عشان جميع الشقق المفروشه في ينبع البحر خاصة بالعوائل فقط ومن القهر استأجرنا غرفتين في فندق هوليد إن ينبع لمدة يومين والمشكله انه غالي شوي بس وش نسوي مجبورين وكلفتنا الغرفة الواحده 585 ريال مع 15% خدمة انا ما يقهرني الا اذا قالو مع 15% ليش ما يعطونا قيمة الغرفة نهائياً ليش لازم يسدون نفسنا بكلمة 15% أخ خ خ خ خ خ بس حسبي الله على الدشير اللي خلو الشقق المفروشة للعوائل فقط طبعاً حنّا أستأجرنا الساعة 10 في الليل وبعدها كل واحد فينا دخل دورة المياة الله يكرمكم وغيرنا ملابسنا ووتنظفنا عاد المضحك في الرحلة كلها ان لبسنا كلها بجامات وجلابيات هههههههههههههههههههههههههههههههه ما عدا ثوب واحد خاص بالصلاة بالمسجد المهم أول ما طلعنا من الفندق اتصلت على واحد من أهل ينبع بس انه عايش في جده وهو زميل دراسة سابقاً وسألته وقلت له : ها يابو فلان وين نتمشا في ينبع قال لي : لا يفوتكم مطعم البيك قلت له : في بيك في ينبع ؟ قال لي : ايه فيه بس ما اعرف مكانه بعدها جلسنا نسأل الناس في الشارع عن مطعم البيك حق مدينة ينبع ومثل ما قلت لكم اللي يشوفنا يقول ما عمرنا كلينا بروستد ههههههههههههههههههههههههههه انا ودي بس اعرف من اللي مانع ان يفتح فرع في الرياض والله احس الموضوع فيه حسد او عباطه ما علينا المهم اشترينا لنا عشاء من البيك ورحنا لشاطئ عندهم اسمه شاطئ الهيئة الملكيه وهو عباره عن مسطحات خضراء على البحر وجلسات وملاهي للاطفال وبعدين جلسنا نتعشا وبعد ما خلصنا من العشاء جلسنا نشرب شاهي بالحبق ونسولف وبصراحه الجلسة على البحر فيها سعة صدر ووناسه مررره بس عيبها انه في بعض الشباب الله يصلحهم ازعجونا بالصوت المسجل والقهر انه رافع الصوت ولا يقدر يسمع زين بس يبي يسمع عباد الله ومايدري الغبي انه يكسب ذنب الله يصلحهم بس المهم في اليوم الثاني طلعنا من الفندق من بعد صلاة الظهر وحنا طالعين من الفندق سألت رجال الامن حقين الفندق وقلت لهم ياخي نبي اماكن حلوه في ينبع وين تنصحونه له وبعدين نبي مطاعم زينه تدلونا عليها ورد علي واحد فيهم وقال لي : روحو كلو سمك ورز صيادية ترا السمك في بنبع له طعم خاااص قلت له : وين احسن مطعم سمك في ينبع قال لي : في مجموعة مطاعم قريبة من بلدية ينبع وبصراحه شغلهم مررره طيب بعدها طلعنا للمكان اللي وصفه لنا ولما وصلنا للموقع تفاجأنا بشكل المطاعم بصراحه المطعم شكله كانه بنشر أو ورشة بس عليهم سمك مقلي ورز صيادية قسماً بالله في الصميم بصراحه وانا اكتب لكم المطعم سعابيلي قامت تقطر هههههههههههههههههههههههههههه لذا نصيحه أي احد يسافر لمدينة غير المدينة اللي عايش فيها انصحه بأن ياكل من الاكل المشهور فيه المدينة عشان يحس بأنه سافر بصراحه انا انقهر من بعض الناس اللي يسافر للخارج الدوله او خارج المدينه اللي يعيش فيها وياكل من كودو أو كنتاكي أو بيتزا هت أو رز بخاري لازم الواحد يغير في كل شي حتى اكله لازم يغيره عشان يحس بمتعت السفر المهم بعد ما خلصنا من الغدا رحنا وتمشينا على بحر ينبع وبعدين وقفنا عند احدى الشواطئ وجلسنا نتفرج على البحر وبعد صلاة العصر رحنا عند محل القوارب وأستأجرنا قارب لمدة ساعة بـ 200ريال من واحد اسمه ابوعبدالله الله يرزقه وهو رجال عمره في الاربعين وله ثلاثين سنه يسوق قوارب سبحان مقسم الارزقا واحد رزقه في البحر وواحد رزقه في الجو وواحد رزقه في البر المهم لما مشينا بالقارب جلس يسولف لنا عن البحر وعن محاسنه وعن مشاكله وبعدين رحنا منطقة بعيده عن الشواطئ وصرنا نشوف بنبع من بعيد وفجأه وقف في وسط البحر وقفل المحركات وقلت له : سلامت وش فيك ياعم قال لنا : اصبر شوي بوريكم شي وبعد خمس دقائق تقريباً ولما هدأت المياه قال لنا : هيا شوفو المناظر اللي تحت سبحان الله والله عالم ثاني قسماً بالله مناظر ولا في الخيال جلسنا نشوف الشعب المرجانيه والاسماك بأحجام مختلفه وأشكال وألوان ومنظر السمك وهو يدخل بين الشعب المرجانيه وبعدين تحرك القارب شوي وصرنا في منطقة عميقه جداً مانشوف غير سواد تحتنا بس والله العظيم شيء خيااااالي عالم ثاني تحت البحر وبعدين قال لنا : ها تبون شوي مغامرات قلت له : وشلون مغامرات ؟ قال لي : نمشي بين الامواج بسرعه خفيفه بعدها الشباب الله يصلحهم قالو له : ايه تكفى نبي نطامر ونقلع وسط البحر بعدها جلس يمشي بسرعه جنونيه شوي وكل ما مرينا من عند موجه ارتفع القارب عن البحر وهاتك ياصراخ قسماً بالله جلست احضن ابويوسف وانا ميّت من الضحك بصراحه جوله خنفشاريه هههههههههههههههههههههههههههههههه وأحسن شي في الجوله حقت القارب هو منظر الشمس وقت الغروب وهي تنزل في البحر قسماً بالله منظر يشرح الصدر آ ه ه ه ه ه ه ه ه بس المهم لما قرب وقت صلاة المغرب رحنا للفندق وخذينا لنا غفوه لين قبل العشاء وبعدها صلينا العشاء وجلسنا نخطط وين نروح له في الليل وكان اهم شي في الخطه كلها هو مطعم البيك هههههههههههههههههههههههههههههههههههههههههههه المهم لما صحينا اليوم الثاني دفعنا مصاريف الفندق وطلعنا من الفندق الساعة 2 بعد الظهر ورحنا وختمناها بمطعم سمك من المطاعم اللي تكلمت عنها وقلت ان منظرها من الخارج مثل البنشر أو الورشه بس والله العظيم عليهم سمك ورز صياديه في حياتي ما كليت مثله ما شاء الله تبارك الله من جد طعمه لذيذ لذى نصيحه اللي يروح لينبع البحر يجرب المطاعم هذي المهم رجعنا للمدينة المنوره ووصلنا على وقت العصر ورحنا لمسجد قباء وكان الأمام الشيخ صالح بن عواد المغامسي وهو شيخ معروف وله اشرطه ومحاضرات طيبه وبصراحه أول مره اشوفه على الطبيعه اما في الماضي كنت اسمتع له فقط ولما صلينا العصر كان الشيخ المغامسي يلقي درس على بعض طلبة العلم عن فضل الصيام المهم طلعنا من المسجد وراحو الشباب يشترون تمر العجوه المشهور عنه في المدنية وهو من تمور المدنية وكل واحد خذا له كميه لأهله وبعدين مسكنا الخط ووصلنا للقصيم على الساعة 9 مساءً ودخلنا عنيزة وتعشينا في مطعم تـــم تـــــم وبعدها كملنا الطريق ووصلنا للرياض على الساعة 12:30 وكان الجو مرررره غبار وبعدين قبل ما ينزلون الشباب للبيوتهم خليت كل واحد فيهم يكتب اسمه وتوقيعه على الفاتوره حقت الفندق وكتبت تاريخ الرحله واسماء المدن اللي رحناها وبعدها تفارقنا وكل واحد فينا يتذكر الرحله من أول يوم سافرنا فيه إلى ان رجعنا وكان مدتها ثلاث أيام بس بصراحه انبسطنا مررره ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،، الهدف من الموضوع انا ودي من كل عضو وكل قارء يستخرج معصيه واحده سويناها في اجازتنا هذه وفي رحلتنا هذه ولمدة ثلاث أيام وبصراحه هدفي من كتابة الموضوع هو ان فيه بعض الشباب وبعض العوائل هداهم الله يستغل الأجازه في البحث عن المعاصي والفتن المشكلة إذا قلت للواحد سافرنا ورحنا المتحف الفلاني ورحنا الشاطئ الفلاني ورحنا الموقع التاريخي الفلاني طالع فيك وقال لك ياخي رحلتكم فاااشله أما اذا قلت له رحنا المرقص الفلاني ورحنا السوق الفلاني ورحنا المنتزه الفلاني وغازلنا البنات وعطيناهم ارقامنا ورقصنا في الشارع الفلاني قال لك بصراحه رحلتكم رهيبه وفلّه اخ خ خ خ خ خ خ خ بس والله انا احزن على الشباب إذا سافر للخارج وضيّع عمره ووقته في المسخره والكلام الفاضي وراح يطارد ولا المراقص والفتن وما يدري هو بيعيش تلك اللحضه او بيقبض روحه ملك الموت وكذالك بعض العوائل هداهم الله وهم يتجولون في الاسواق وفي المولات والمراكز التجاريه والقهر يدخلون السوق ولا يشترون شي بس كل همّهم انهم يستعرضون بأجسامهم قدام الشباب وما يدرون ان في رب العالمين يراقبهم من فوق ويدري عن نواياهم الخبيثه وبصراحه في ظاهره انتشرت بين بعض الشباب الخبيث والحقير في نفس الوقت وهي انه ياخذ اخوه او اخته الصغيره في العمر ويدّعي بأنه يلعبها في الملاهي او يدخل بها المراكز التجاريه لكي تلعب في السوق وهدفه الأول هو الغزل والترقيم وليس اسعاد الطفل والمشكله انه يلعب الطفل لمدة خمس دقائق وبعدها يجلس يتمشا في السوق وعلى باله ان الناس أغبياء مثله وإذا سألته وقلت له وش عنده هنا يالشيخ قال لك : بصراحه جاي امشي اختي او اخوي أو ابني وهو نصاب في وجهه وهدفه الرئيسي معاكسة البنات يا أخوان اتقو الله وتوبو إليه قبل أن يأتي أجلكم يقول الشاعر قبورنا تبنا ونحن ما تبنا ياليتنا تبنا قبل أن تبنا أسأل الله بأن يهدي عباده الضالين عن طريق الحق وأن يفرج همومهم وأن يغفر ذنوبهم إنه سميع مجيب الدعاء هذا والسلام عليكم ورحمة الله وبركاته محبكم في الله وسائق الليموزين / عبرود
آخر تعديل ذوق وفن يوم 23-04-2008 في 07:51 AM
السبب: إساءه
|
21-04-2008, 06:37 PM
|
#2 | |
|
مراقبة كنوز الإبداع
   |
رد : إجازة عبرود
ماشاء الله عليك عليك اسلوب مشوق اول مره اقرى موضوع طويل من اوله الى آخره من جد المدينه فيها راحه نفسيه عجيبه سبحان الله واحلى شئ المغامرات وناااسه  بصراحه ماشفت معصيه الله يجزاكم كل خير يارب ويكثر من امثالكم بس عليكم ملاحظه صغيره استاثمتو بالبروستد  فشلتونا عند البيك< برا يعطيك العافيه يارب
|
|
|
|
|
21-04-2008, 07:03 PM
|
#3 | |
|
مشرف عام مطرود من الاكادميه
~*¤*~واســطـهــ~*¤*~  |
رد : إجازة عبرود
ما زلت تحمل في كلماتك الكثير من البساطة الرائعه... أهنيك بصراحه... من جد استمتعت برحلتكم وكأني معكم!! واحلى شي البيك والصياديه<<<أهم شي بطنه  وبالفعل اتفق معك فيما ذكرته في نهاية موضوعك  والله يهدينا جميعا... مشكور يالغالي وبإنتظار جديدك... تقبل تحياتي...
|
|
|
|
|
|
21-04-2008, 07:43 PM
|
#4 | |
|
عضو جديد
 |
رد : إجازة عبرود
اخوي عبرود الله يعطيك العافية على الموضوع بس لي تحفظ على بعض النقاط الله يصلحك ويهدييك ولا عمرك تعيدة ....  بس عندي سئوال وش اخر موقف طريف حصل لك  800 
آخر تعديل camry414 يوم 21-04-2008 في 07:47 PM
|
|
|
|
|
|
21-04-2008, 07:44 PM
|
#5 | |
|
عضو مؤسس
 |
رد : إجازة عبرود
اخي الكريم اشكرك بجد استمتعت باالرحله ودي اني معكم ... شوقتني ازور ينبع اتفق معك في المدينه جو عجيب من الروحانيه والراحه جزااك الله خير اخي الفاضل واكثر من امثالك بصدق رحله تكسب فيها المتعه والاجر افضل الف مره من رحله ممتعه بدون اجر بل على العكس تكون مكسب للذنوب بارك الله فيك وفي صحبك واكثر من امثالكم تقبل ودي ومروري دمتم بخير وبحب وسعاده وراحه ... وسعة صدر
|
|
|
|
|
|
23-04-2008, 07:54 AM
|
#6 | |
|
مراقبة المجلس العام
|
رد : إجازة عبرود
رحله رائعه وصلت من خلالها رسالتك بكل بساطه . . دمت بكل خير وعافيه مع أجمل تحياتي
|
|
|
|
|
|
23-04-2008, 08:06 AM
|
#7 | |
|
عضو فعال
 |
رد : إجازة عبرود
((والمدينة خير لهم لوكانوا يعلمون )) وصف رائع خالي من التعقيد ..! أختياركم موفق لمكان الرحــلة ..! لكن واضح ان مطعم البيك..هو الهدف الثاني من الرحلة ..!! استمتعنا بسولافة جميلة ..!
|
|
|
|
|
|
23-04-2008, 09:12 AM
|
#8 | |
|
عضو جديد
|
رد : إجازة عبرود
|
|
|
|
|
|
23-04-2008, 11:48 AM
|
#9 | |
|
لا بريق ولا هم يحزنون !!
 |
رد : إجازة عبرود
رحلة موفقة وتكفي النية الحسنة سبحان الله اسلوبك بسيط وتتكلم على طبيعتك والقصة تجيبها تفصيلياً بصراحة يعجبني الي يجيب السالفة على قولتهم من طء طء لسلامو عليكو اكيد حريم يحبن اللقافة خخخخخ  كل شي في رحلتكم زين اللهم سالفة السفر بالسياره ياربيه مقدر مقدر  بصراحه استفدت من موضوعك كثير خصوصاً سالفة انك تاكل من الأكل الي تشتهر به المدينة الي بتسافر لها يعني لو أحد يروح لشرق آسيا عادي ناكل ضفادع..!  << براا ياقرف يعطيك العافية جداً استمتعت بقراءتي لموضوعك دخيلك واصل نبي بعد قصص غيرها 
|
|
|
|
|
|
23-04-2008, 01:01 PM
|
#10 | |
|
عضو مؤسس
 |
رد : إجازة عبرود
|
|
|
|
|
| زوار هذا الموضوع الآن : 1 (0 عضو و 1 ضيف) | |
| أدوات الموضوع | |
|
|
مواضيع ذات صلة
|
||||
| الموضوع | الكاتب | المجلس | المشاركات | المشاركة الأخيرة |
| يوميات عبرود في شوارع الرياض | عبرود | المجلس العام | 179 | 12-07-2008 09:31 AM |
| سؤال مهم جدآآ ماهو شعور الفتاه عندما يراها الخاطب ثم يقول انها لاتعجبني ؟ | مهندس الأحلام | المجلس العام | 83 | 28-04-2008 02:42 PM |
| ضيف .. استبيان وآمل الجميع أن يشارك | خالد اليزيد | المجلس العام | 32 | 25-04-2008 04:14 AM |
| أهم سؤال في نظر عبرود وقت الزواج | عبرود | المجلس العام | 21 | 07-04-2008 08:04 PM |
| لاتفوتكم نغمة عبرود | عبرود | المجلس العام | 17 | 23-03-2008 02:35 PM |
|
Powered by: vBulletin® Version 3.6.10 Copyright ©2000-2008, Jelsoft Enterprises Ltd.
SEO by vBSEO 3.1.0 Translated By vBulletin®Club©2002-2008 |
