خارج السرب

ac2006 · #1

بسم الله الرحمن الرحيم

نادي عطلات السعودية اسم كبير في النصب والدجل

مندوبين منتشرين في المجعات التجارية والمنتزهات في المنطقة الشرقية على كورنيش الدمام في (الحكير) و (المخازن الكبرى) في الخبر. وعلى علمي بان لهم مندوبين كذلك في مدينة جده ومدينة الرياض يجوبون الاسواق ويختالون ويحتالون على الناس ........

واليكم قصتي معهم في احد الأيام نزلت أنا وعائلتي في مدينة الحكير الترفيهية على كورنيش الدمام وأثناء تجولي دعاني موظف لابس لبس محترم ولديه طاولة وقام يشرحلي عن السياحية ويعطيني كوبون ويقول مسابقة سجل بياناتك سيكون هناك سحب على جوائز قيمة فعلا سجلت البيانات . وانتهى( المشهد الأول).

بعد عدت أيام جاني اتصال من عطلات السعودية ويقول مبروك لقد فزت في السحب وهي ليالي مجانية في شاليهات وليلتين اقامة بمكة المكرمة نريد نرتب معك موعد للحضور أنت والعائلة لاستلام الجائزة لأن هناك طاولة محجوزة لكم والمكان عمارة المنتزه طريق الظهران واذا وصلت اسأل عن الموظف (جبران) وفرحت لأن عمري مافزت بجائزة وكان الموعد الساعة الخامسة مساء . وانتهى (المشهد الثاني).

وذهبت للموعد وأنا مكشخ ومعي العائلة وصلت وسألت عن (جبران) وفعلا وجدته في استقبالي وجلسنا في الجلسة المحجوزة وباشرو علينا بالعصير وقام يشرح لنا عن برامجهم السياحية (منتزهات في نصف القمر .. وفي الدمام وفي جده والرياض وعسير ونقوم بالترتيب والحجز لك في جيع المدن المذكورة بمجرد اتصال على الرقم الجاني ولدينا منتزه لافنتين في نصف القمر فية مسابح للرجال والاطفال ونادي للسيدات ونوادي صحية و مشاهدة المباريات المشفرة في شاشات عملاقة.......الخ ) ونعطيك بطاقة عضوية تدخل هذه المنتزهات متى تشاء وبطاقة تخفيض في محلات تجارية كثيرة . وهذا العرض بـ(10000)ريال ولكن لك خصم خاص وأخيرا صار المبلغ (3750) ريال وانت مخير بين القبول والرفض
وصدقت وقلت فرصة العمر وجت لين عندي ودفعت المبلغ وأخذت البطاقات ورجعت البيت فرحان . وانتهى (المشهد الثالث) .

وفي اليوم التالي اتجهنا عصرية الى العالم الجديد وقلت لأم العيال نبدأ بمنتزه (لافنتين) بشاطي نصف القمر وصلنا المنتزه ودخلنا بعد استقبال سئ ورجا وتوسل (البطاقة ماتخولني بالدخول). مشتاق للسباحة وكانت صدمة حوش حوالي (20مX15م) مزحوم حوش بيتي بالديرة والله أكبر بكثير وبركه (3مX3م) فيها اكثر من 4رجال و5 اطفال .
جلست أواسي نفسي وأقول استفيد من الحجوزات لاني كثير التنقل والصيفية على الأبواب وفعلا اشد عفشي وأسافر وهات اتصال على رقمهم المجاني مايرد عليك احد غير جهاز ومسج حفظته غيب (عطلات السعودية ترحب بكم جميع الموظفين مشغولين ..عروض لافنتين الصيفية أحجز ليلتين وليلة مجانا أحجز خمس ليالي وليلتين مجانا.......) وانتهت الصيفية ماأستفدت شي حتى بطاقة التخفيض ولا محل قبلها . وأنتهى (المشهد الرابع) .

وضاعت فلوسي بوعود كاذبة وعملية نصب ودجل ... نادي عطلات الحرامية . وماعرفت لمين أشتكي . ولكن حسبي الله ونعم الوكيل .

قروش · 07-06-2006, 01:35 PM

والمشكله إذا ذهبت لتقديم شكوى الى إدارة حماية المستهلك شف كم طلب يطلبونه منك لترفع شكواك
وإذغ رفعت الشكوى يأتي دور (راجعنا) وإذا خلصت خذ هذه ورقه قدمها للمشتكي عليه للحضور
وهاك تمطيل وروحات وجيات الى أن تطفش وشوى وأنت!!!!؟؟!!!!!!!!!!!!!!

ابو عبدالله · 07-06-2006, 03:59 PM

ياكثر ما اقابلهم في كل مكان .. وخاصه في دبي ..
بس عجيب تكاثرهم بالسعوديه !!

عموما هذا مايسمونه بالتايم شير .. انا ما اؤيد هذي البرامج وافضل الحجز من المكاتب في المطار مباشره
لما تنزل ماليزيا احجز هناك على طول في المطار طبعا في اوقات من دون مواسم الصيفيه
الله لايهينك دبر امورك من هنا قبل ما تمشي .. واذا رحت هناك خذ رقم اي مكتب في المطار والمره الجايه
تبي تسافر لنفس المنطقة اتصل عليهم مباشره وتاخذ اسعار مغريه . افضل من عروض النصابين ..

والله يعوضك انت تحصلها من وين والا من وين .. وضاعت عليك فلوسك ياصابر !!

ac2006 · 25-08-2006, 01:30 PM

مشكوووووووووووورين على المرووووووووور الكريم

FAHAD_AA2005 · 26-08-2006, 01:19 PM

شباب ليش لما يقابلونكم ترفع صوتك وتكلمهم بطريقة محترمة مثل ، انتم شركتكم ماتحترم كلامها ومن هذا الكلام الجوائر المزيفة اللي تقولون عنها الان

ac2006 · 11-12-2006, 06:52 PM

نادي عطلات السعودية = نادي عطلات الحرامية

أبــو فيصــل · 11-12-2006, 07:24 PM

أقوووول يمدحووون لبنــــــــان ....
بلا عطلات السعودية وبــلا خرابيـــط ..

*A7M* · 29-08-2007, 01:28 PM

السلام عليكم ورحمة الله وبركاته

والله ماسجلت غير عشان ارد على هذا الموضوع

انا كنت أحد موظفي هذي الشركه بالكول سنتر ..وخويي كان معاي موظف أيضاً..
يا حبيبي إذا مافي اهتمام بالموظفيـن.. تتوقع بيكون فيه اهتمام بالعملاء؟؟
نحنا من الساعه 8 الصبح لين 5 العصـر أتصال ورا اتصال بدون بريك غير أن الغدا نرسل واحد من الشباب يجيبه..

انا اقولك نظام الشركه .. أستقبل أكبر قدر من المكالمات هذا المهم عندهم
بعدين قوم بالحجوزات.. وفيه ناس كثير أنظلموا لأن نحنى إلي بالكول سنتر .. نقول أبشر بيتم الحجز.. وقابلني إذا حجزناله
وفـيـه ناس ماتفكر صراحه.. على فكره .. الأسعار هي نفسها لو تروح وتحجز بنفسك..
بس هم يكحلوها لك بالجوائز والعروض.. وعاد قابلني متى يعطونك جوائز وعروض
بعدين استغرب الكوبون الواحد قيمته 50 ريال يعني 50 نقطه
والله في ناس احصل بحسابهم أكثر من 6000 كوبون يعني طبعاً هذا الي تجيه العروض
يعني لو بحسابك نقول 50 كوبون قابلني إذا شميت ريحة العروض..
عن نفسي بطلت من الشغل عندهم لأن شغل هشك بشك مافيه اي تنظيم ولا شيء
ويآكثر إلي يتصلوا ويشتكوا مع أن وظيفتي كول سنتر حجوزات .. تخيل أن وحده تتصل تقولي انت ماتخاف ربك وانا مالي أي دخل بالموضوع
يعني من الاخر شركه خايسه ومانصحكم فيهآ أبداً أبداً أبداً

ودمتم بود

السيده الاولى · 01-09-2007, 08:13 AM

الله يعوض عليك اخوي

وبس والله انا لو مكانك اروح احوسهم والله واروح لنفس الشخص الي تكلم معاي اقل شي

ولا اسكت على الضلم وروح اشتكي واجلس وراهم انت وش عندك
وماضاع حق وراه مطالب مع انهم بيطلعون عينك بس على الاقل تحاول

الله يساعدك ويوقف لك عيال الحلال الي يساعدونك

rever · 18-06-2008, 06:12 PM

بسم الله الرحمن الرحيم

نحن ايضاً من ضحايا هذه الشركة الفاشلة والدجاله
نصبت علينا وحنا كليناها عدل لما سافرنا هالمرة والله مثل ما ذكر الاخ كاتب الموضوع
في البداية اغرتنا بعروض وامتيازات طلعت كاذبه ومزيفة ما شفنا منها شي
وغير كذا لما تحجز يخصمو من رصيدك اكثر من سعر المنتجع او الفندق لليلة وانت يا غافلين لكم الله

مثل في البداية كنا بنحجز لنا فندق بالمدينة فكلمناهم علشان يرتبو الحجز لنا اخذنا جناح وكان سعر الجناح لليلة 450ريال لليلة وكان قريب من الحرم ولما وصلنا ودخلنا الفندق رحنا للجناح اللي حاجزين وعينكم ما تشوف الا النور من ذاك الجناح الخايس اللي ما اعطيه حتى 100 ريال لليلة
المهم ما قدرنا نقعد في المكان وظلينا بتصالات وياهم علشان نغير الحجز ونحجز في مكان ثاني وعسى يكون انظف
المهم حجزنا في مكان ثاني بس بعد شنو اضطرينا ان حنا ننام في ذاك الجناح ليلة لان ما انتهينا معهم علشان يكملو اجرآتهم المهم بعد يوم حجزو لنا في مكان ثاني واخذنا جناح ملكي قلنا يمكن اذا طلبنا جناح ملكي بنضمن انه بيكون نظيف وقلنا هي فلوسنا خلاص رايحه رايحه ما لنا عوض فيها بس والله لو احنا بأنفسنا نروح ونحجز على كيفنا وفي الفندق اللي نبيه راح نشوف مكان نظيف وبسعر هم مناسب ..
اكمل سالفتنا ظلينا في المدينة سبع ايام انخصم من رصيدنا والله سعر مو شوي
بعد كذا حجزنا لنا منتجع في عسير .. حجزنا لنا في موتيل يطل على بحيرة ابها .. على فكره قبل ما نروح حنا اخذنا رقم المنتجع واتصلنا عليهم شخصياً وسألناهم عن سعر الموتيل في الليلة فقالوا لنا انه سعره لليلة 150 ريال .. وهالشركة النصابه حاجزته لنا بـ 240 لليلة يعني شوف كم انخصم من الرصيد
وصلنا المنتجع ولما شفنا الموتيل .. آه بس آه وش اقولكم موتيل وش الوصف اللي ممكن اقوله لكم عن ذاك الموتيل الوصخ
انا اقوول اصلاً شكلهم ما ينظفو الغرف بس موظفين عما عالفاضي في هالمنتجع .. اسم بس منتجع
هم ما قدرنا نجلس فيه .. وغير كذا نفستنا صارت مثل الزفت .. رايحين نريح ما شفنا الراحه منهم
ظلينا ندور منتجع ثاني في ابها شفنا عندهم بالكتلوج منتجع السودة قلنا خلينا حنا نروح نشوف بأنفسنا قبل ما نتصل عليهم علشان يحجزو لنا .. المهم وحنا ندور بابها شفناه دخلناه كان احسن من اللي قبل وفرق على الاقل نظيف وفي مكان حلو على الاقل سألنا عامل الاستقبال عن سعره لليلة قال لنا 250 اذا كان في اوقات غير المواسم اما في المواسم يتغير السعر يوصل الى 600 قلنا حلو ا لان كنا رايحين في وقت ما كان وقت مواسم .. اتصلنا عليهم علشان يحجزوا لنا قال لنا عامل الحجوزات الحجز بـ 610 .. يعني شفتو النذاله شلون .. قلنا لهم حنا سأينهم قبل ما نتصل عليكم وقال لنا السعر ب250 رد علينا قال انا اتصل و واتأكد المهم ظلينا ننتظر يتأكد بعدين ردوا علينا قالوا لنا خلاص اتأكد الحجز بس الليله بـ 350 لليلة .. خلاص حنا قفلت معانا ما ناقشناهم اكثر لأن من جد تعبنا معهم ونفسيتنا صارت مثل الزفت قلنا هي رايحه رايحه خلاص بس شفتوا شلون في البداية لو ما حنا سائلين عن السعر كان مشاها لنا بـ 610 وهات خصم من الرصيد

انصحكم لا حد يشترك معاهم .. ومع انه كان رصيدنا فوق الـ 6000 ومع كذا ما شفنا لا عروض ولا يحزنون

وما نقول الا حسبي الله عليهم ونعم الوكيل
الله لا يوفقهم لا دنيا ولا آخره