مجلس ملتقى الأصدقاء

مـآرد الشمــآل · 09-02-2008, 12:41 AM

شكراً للجميع ،، وربي يسلمكم من كل شر ،،

واللي يبي هديه يبشر بها ،، ومن هالعين قبل هالعين ،،

واللي يقول وش لك بالزحمه ،، ما يدري عن مواووويلي

اصلا امووت بالزحمة انا ..

وانزلوا تحت شوفوا يوميات اليوم الثاني ..

مـآرد الشمــآل · 09-02-2008, 01:24 AM

## اليووم الثاني ##

كنت قد نمت الساعه 7.30 صباحاً ،، بعد سهرة جميله امام شاشة الكمبيوتر

،،

بالتأكيد كانت سحبة على صلاة الجمعه (( ادعوا لي ربي يغفر لي )) ،، وصليت الظهر والعصر جمعاً

وقصراً جمع تأخير ،،

لبست ثوبي الرصاصي مع الجاكيت الأسود وكندرتي السوداء ولم البس شماغ ،، مشطت شعري

وحطيت جل ولبست النظارة ماركة غووتشي ،،

طلعت من الشقه والقى بوجهي اثنين شباب شكلهم يقول انهم من الغربيه ،، تعرفون سوالف جنز

طيحني اللي ودك تصدق على راعيه عشان يستر نفسه بين العربان ،،

المهم نزلت تحت وانا ميت جوووع ،، واشوف ذاك المطعم على يميني ،، واسمه (( الطعم اللذيذ ))

قلت بس هذا الشغل ولا بلاش ،، والله وامشي يمه وقاعد افكر وش اطلب ياربي وش اطلب ،،

دخلت المطعم ،، ويقابلني شايب يمني هو المحاسب ،، سلمت وقلت له وش عندكم غداء ؟؟

قال تقصد عشاء .. وانا انصفق على وجهي ومدري وش اقوول ،، قلت ايه ايه وش عندكم ؟؟

قام يعدد لي من هالأكلات وانا اقاطعه واقول له عندك رز بخاري ؟؟

حسيت انه وده يصفقني ،، المهم قال فيه وعطاني الطلب ،، اخذته ولفيت ابي اطلع من المطعم

صوت لي اليمني يابو الشباب قلت هلا ،، قال ما ودك تحاسب ؟؟ ولا ليكون تحسبنا جمعيه خيريه ؟؟

دفعت الحساب وانا احلف بنفسي اني ما عاد امشي مع هالشارع ابد ،،

رجعت الشقه ،، تغديت وغسلت وطلعت اتمشى بالأسواق ،، وانا ماشي شفت لكم شوووفه ،،

إنما ايه ،، شفت 3 بنات لبنانيات كل وحده تقول للثانيه ضفي وجهك انا احلى منك ،،

ومصرقع تضيع علوومه ،، وادخل محل النظارات اللي دخلنه ،، وهن يسكتن ينتظرني اخلص شغلي ،،

وانا اتوورط وقلت يا ولد انت ذيب دبر لك سالفه منا ولا منا ،، يعني بالعربي كذبه بس بيضاء ،،

المهم وانا اصووت له : صديق ،، طبعا اللي يشتغل فلبيني ،، ويوم ناديته صديق كان وده تجيه جلطه

ويفتك من هالحياه ،،

قلت له صديق انا ابغى اقيس النظر ،، قال اووكي ،، تفضل هنا ،، جاء يبي يوديني غرفه ثانيه

قلت له لا ابي هنا ،، قال ما يقدر هذا جهاز غرفه ثاني ،، قلت خلاص اجل ابغى نظارة شمسيه ،،

قال ما فيه ،، جيت ابدعي عليه بالعمى لكن شفت ان الرجال مو ناقص بروحه هو يالله يشوف ،،

المهم قعدت اتميلح واللبنانيات يطالعن النظارات وانا قلبي يقول طربق طربق ،،

قررت اني اصير رجال واخربها ،، يا تصيب يا تخييب ،، طبعا اللبنانيات كانن يطالعن في نظاره

ويتشاورن عليها ،، فنطيت انا بلقافه وقلت : النظاره عليكي انتي احلى من خويتك ،،

تبسمت وما ردت ،، وانا استانس قلت بس البنيه حبتني ،، ولما شفتها قررت تشتريها

قلت اكيد البنيه خرخرت عندي ،،

وانا الحقها لما طلعت ولبست النظاره وقلت : واااااااااااو شمسين بوقت واحد ما يصير ،،

قالت : شو بدك ؟؟ قلت ايووه بدينا بالحكي اللي مش مزبووط ،، ابد سلامتك بس حبيت

اسلم ،، مشت وما ردت علي ،،

رجعت مع طريقي وانا اجر اذيال الخيبه ،، وكان وقت صلاة العشاء قد دخل ،،

صليت العشاء مع المغرب جمع ،، وانطلقت لمشاهدة المباراة بين الهلال والنصر في احدى الكوفيات

بجانب شقتي ،، اتصلت قبل المباراه بقليل على صقيقي رومنصي وكلمته عن توقعاته للمباراه وكان

متشائم وقال لي ان الهلال بيخسر ،، شجعته وطيبت خاطره وقلت يله الدنيا فووز وخسااره ،،

<<== طبعا المباراه للحين ما بدت ..

شفت الشوط الاول ،، والشوط الثاني لين جاب القحطاني الهدف الثاني ،، عاد انا قلت اكيد الهلال

بيفوز ،، ومشيت بعد ان دفعت 12 ريال ثمن كوب هوت شوكليت من الحجم الكبير ،،

توجهت إلى الواجهة البحريه بالخبر ،، وكانت الساعه تقريبا العاشرة ومدري كم دقيقه ،،

فرفرت بالواجهه ،، وكانت فاضيه نوعاً ما ،، لين ما جتني رساله من رومنصي اللي يبدو لي انه

طلع لسانه على قولتهم بعد الفوز ،، وكان يقول فيها :

(( من فوائد ان يكون صديقك نصراوي ...

1- العظه والعبرة .

2- توسع صدرك عليه بأي وقت . ))

ضحكت وقلت الله يوم اني كلمتك قبل المباراه صوتك يالله يطلع والحين ترسل رسااايل ..

مشيت ورحت عند جسر المشاة اللي قدام مكدونالدز ،، ووقفت فووقه عشات اتفرج على الزفه

اللي كانت حااصله بمناسبة خسارة النصر ،، وتفاجأت بأن جمهور النصر هم اللي يزفون ورافعين

اعلام النصر ،، وفيه بالزاوية بعيييييد شووي عن الزحمة شلة من الشباب ذوي البشرة السوداء

وكانوا يتمايلون طرباً على انغام قصيدة .. ياهلال يا هلال زعيم والله زعيم ..

توجهت بعدها إلى شقتي ،، وانا بطريقي اذ بي اصادف امرأه لا تلبس العبايه ولابسه جنز وجاكيت

ابيض وشعرها مجعدته وكانت في قمة الجمال وبدون اي مكياج ،، مو مثل ربعنا المكياج طبقات ويبي

لك سنه تغسل بالمكياج عشان تنصدم بالأخير بالوجه الحقيقي ،، المهم واضح ان المرأه لبنانيه او سوريه

وكانت جالسه في سياره يبدو لي ان زوجها كان تاركها ونازل عند السوبر ماركت ،، قلت بنفسي زوجها

هذا دلخ والا قسم بالله حتى للدوام غير تداوم معي ..

المهم تميلحت شووي وسلمت عليها ،، ردت السلام وسألتها لو سمحتي من وين طريق السويكت ؟؟

ادري سؤالي مثل وجهي ،، بس مالقيت غيره عشان اسولف معها ،،

قالت والله مابعرف ،، بس هلئ يجي جوزي واسأله ،، انا سمعت جوزي وانا اقمط العافيه ،،

قلت لا يا ألبي مشكوره كتيييير ،، ومشيت من عندها وانا اغني اغنية الفنان عدوية اللي يقول فيها :

زحمة يا دنيا زحمة .. ،،

مدري ليه تذكرت هالأغنية بذاك الوقت ،، بس شكله من حالة الرومنسيه اللي كنت اعيشها ..

اخيراً رجعت الشقه ،، وغيرت ملابسي ،، واخذت لي دوووش منتاااااااااااااز ،،

وفتحت اللاب تووب وقعدت اكتب لكم يومياتي ..

## انتهت اليومياااااااااااااااات ##

وترقبوا يوميات غداً ،، فهي حافله بالسوالف ،، لأني بروح الراشد وجيان والواجهه بعد ..

تابعوووووووووووووووووووووونا ..

eL sEcret0s · 09-02-2008, 02:08 AM

اش عندك بالشرقيه!!!
ليه تركت الرياض

والا استعدادا لخساره النصر

<<هذي اللي بتنطق الحين

مـآرد الشمــآل · 09-02-2008, 02:15 AM

وش الرياااااااااااااااااااااااااااااض ؟

انا ماني من اهل الرياض ،، انا من الشمال ،،

وبعدين قسم بالله ماني نصرااوي ،، انا اتحادي ..

هههههههههههههههههه

كنكولوجن · 23-02-2008, 12:36 AM

هههههههههههههههههههههههه

طيب بسيييييييير عليييييك

هههههههههههههههههههههه

الله يسعدك دوووووووووم

بنت الاديب · 23-02-2008, 10:25 PM

نورت الشرقيه بوجودك فيها

سلملي عليها ذرة ذرة

وشارع شارع

واذا رحت للراشد سلملي على الدور الثالث

ولاتنسى طيعا البحر سلم عليه بقوووه وطب فيه اذا قدرت

وش بعد وش بعد >>> براا

تروح وترجع بالسلا مه اقصد اقامه سعيده

وابي هديه مثل دانة المجالس

بالتوفيق يالغالي

مـــوادع · 23-02-2008, 11:50 PM

اي اجازة يالمصرقع

يوم الناس خلصوا تروح انت ... والله انك مخلف

بعدين ليه ما قلتلي كان ارسلتلك الطيارة حقتي

كم مرة قايلك لاتسنحي ياقليل الخاتمه << مايعرف يسوي اخلاق

ع العموم تروح وترجع بالسلامه

هدايا

قلتلي هدايا

اها

على راحتك اذا بتجيب الله يقويك يالدب

نشوووووووووووووووووووووووووووووووووووفك

مـــوادع · 24-02-2008, 12:03 AM

اووووووووووووووووووووووووما خلصت اليوم الاول وانا بعد اودعك << طاح خشمه

المهم كيف الصبايا ...... عشانك وسيم انت وضروسك بعطيك رقمي تبيعه << يصرف

ولاتبيعه الا على الحلوين << وش عنده الغامض

الموهم انتبه على نفسك من البرد والبس زين وصل وكل كويس واذا دقيت عليك رد لا تجحدني والا بفقع وجهك

يالله تشااااااااااااااااااااو

ايه صح خذ الرقم

550 س و ر ض و ب ا 055

لاتنساني انزين << اخربها

المجهول · 24-02-2008, 09:15 AM

قسم انك فله!!

اقول ترى بمسكلك الخط تعرف عاطل ونبي اي شغلانه

الا ما قلتلي بكم يومية الشقه ومن ألحين ترى انا احب انوم كثير مابي قلق

ومباراه للهلال بشوفها وأي شي للإتحاد في البيت ممنوع<<<الحلال حلال ابونا والقوم طردونا

الله يوسع صدرك بالعافيه دوم يالغالي

وبإنتظار يومك الثاني...

تقبل تحياتي...

مواضيع ذات صلة
الموضوع	الكاتب	المجلس	المشاركات	المشاركة الأخيرة
اللقاء الثاني : مجلس .. مصرقع مآركة .. وضيفتنا المصرقــعه .. حياااااكم !!	مـآرد الشمــآل	مجلس الصرقعة	61	23-02-2008 07:10 PM
هــآم جدآ : صوتوا لإختيار الضيف الثاني لمجلــس (( مصرقع مآركة )) ..	مـآرد الشمــآل	مجلس الصرقعة	69	05-02-2008 11:36 PM
اللقاء الأول : مجلس .. مصرقع مآركة .. وضيفنا المصرقــع .. حياااااكم !!	مـآرد الشمــآل	مجلس الصرقعة	80	24-01-2008 03:20 PM

مجلس ملتقى الأصدقاء

للترحيب بالأعضاء الجدد ولتبادل التهاني والتبريكات بين الأعضاء

مصرقع مآركة في الشرقيــة .. يابــري حالـــــي ..

ّ ّ ّّ ّ ّ ّ أبــي ترحــيب ّ ّ ّ ّ ّ ّ

ضمووني إليكم//لديّ بعض الربيع..فأصغووه..!

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق