هذا ماهو شيب .. لا تبكين .. ماهو شيب يمه = لا يهولك منظره في راسي وتبكين .. عادي !
لا يغرّك لونه الأيبض .. ولا يفجعك كمه = صدقيني ماهو من الشيب هذا اللون بادي
تذكرين .. اصابعك لما تبعثره وتلمه ؟ = يوم كنت اوسده رجلك .. واروّض لك عنادي ؟
كل ما مشيتي اصبع بين شعراتي تشمه .. = لين صارن بيض من كبر الغلا وطهر الايادي !
شرّعي لي حضنك الممطور بالمسك ابخمه = خمة ٍ تبرا بها روحي من جروحي .. وانادي
ما ابي مْن الناس : غير اذكارك وريحتك لمه = ولا ابي مْن النور : غير سراجك العن به حدادي
وما ابي مْن العز : غير اللي تحت رجليك قمه = ولا ابي مْن الأرض : غير جلالك اعلن به بلادي
ودي ارجع ( طفلك المغمور ) واللي كان همه .. = يصعد / اطول نخله .. ويشرب / من حثال العوادي
يغسل نعاسه ( باذان الفجر ، واصوات الأئمه ) = ويونـْس الشيبان لا رتّل لهم : ( قل يا عبادي )
ويسرق اول ( خبزه لصاجك ) ويخفيها بفمه ! = قبل ما يصحى حدا اخوانه .. ويحتد التمادي !
طفلك : اللي ذنبه انه ما غسل بالدمع كمه = لين صار الكم الابيض من بطا دموعه رمادي !
ما يخاف الا : بكاك ، ودعوتك : ( حمىً تحمّه ) .. = لا ركض جنب القليب وسمع نبضاتك تنادي !
ولا كشخ ( بشماغ ابوه ) وشفتي الانظار يمه : = تغصبينه / يشرب ( القروه ) بخوف ٍ لا إرادي !
ودي امسح دمعة ( استاذي الفلسطيني ) واضمه = لا بكى في ( حصة التاريخ ) من ظلم الاعادي
واعتذر له عن سخافة جيلي وخذلان الامه = واتعلم منه كيف اروي يقيني باعتقادي
واسأله ليه المجاهد عندنا مهدور دمه ؟؟ = ومن ربط حدوتة الإرهاب بالفكر الجهادي ؟؟
وليه نسمع بألف دعوة صلح مع راهب وعِمه = والف خنجر يشهر بوجه المطوّع في بلادي
ودي ارجع طفل : بعض عيوبه اجمل من شيمه = يوم كان اصغر رفاقه عمر .. واكبرهم مبادي
ودي افتش بتاريخي عن احلامي المهمه = قبل ما تهزم جيوش اليأس صبري واجتهادي
ودي اوشي بحزني الحاضر لماضيّي وانمّه = يمكن انقذ جمرة سنيني من الموت برمادي
بس وشلون اقدر ارجع ؟ ليه ما قلتي لي يمه ؟ = ليه ما قلتي لي ان الشيب مشتاق لسوادي ؟!
ليه فهمتيني ان الخوف من بكره مذمه ؟؟ = ليه خليتيني اكبر واحمل ذنوب اعتدادي ؟؟
وين اعيّن خير يمه ؟؟ والأمل من غير يَمه !! = الحطب - يا ميّّه - قليّل وبرد الليل سادي
كل ما غرست غصني سافي الحرمان دمه = واشعر اني وردة ٍ مزروعة ٍ في بطن وادي !
وانا والله ، ما رضيت بهالعنا من قل همه = ولا كبا غير الدروب اما انت وافي يا جوادي
احمد الله جاعوا عيالي وانا شبعان ذمه = ما زرعت الا الوفا والناس تاكل من حصادي
ما عرفت الاي خال لخاله وعم ٍ لعمه !! = يوم ما ياسع هموم القوم غيرك يا شدادي
وانتي يُمه .. لو بكيتي شيبي وهوّلك كمه = قلت يُمه : ماهو من الشيب هذا اللون بادي
تخبرين ( الثلج ) لا منه تكدّس ( فوق قمه ) ؟؟ = هذا ثلج .. وراسي القمه .. ولا تبكين عادي