تجين نشاور أهداب السحاب اللي جلس يرتاح=وش أحلا لون فص الشمس وإلا لون وجناتك

تجـين نعـلّم التوت المشي ونـزخـرف التفاح=ونشـرح بالكـرز والثلج كيف تسيل ضحكاتك

تجـين نجدّل خيوط الشعاع ونكسـر المصباح=ونشـعل في حنـايا العمر نور زهور خطواتك

تجـين نقـفّـل أبـواب الفـراق ونبلع المفتاح=بعد مانسـترد اللي من أحلام الوصل فـاتك

تجـين نحـارب الدنيـا ومن فيها بدون سلاح=أنا بالحب وإنتي بالجـمال وسـحـر نظـراتك

تجـين بفالنا الطيب نقوّم حظنا لو طاح =ونربـط في جناحين الأمل شـرطان هقواتك

تجـين نغمض عـيون القلوب ونتبع الأرواح=وأراهن شـمسـك أني لأزور أبعـد مـداراتك

تجـين نصارح القمرى بنور ظلالك الوضـاح=ونكشـف للسـحاب ان البروق اسـباب لفتاتك

تجين نسـابق أنـوار الفنـار لنظـرة الملاح=ونكتب للـسـفر مافـيك لـّذه غـير آهـاتك

تجين أبدل الباقي بعـمري عـمرك اللي راح=وأكـون أول حـبيب ٍ في نهـايـاته بدايـاتك

تجين نعد كم نجم ٍ تعثر في سناك وطاح=وكم بـدر ٍ تمـنى لو قبـالـه مثل تقـفـاتك

وتجين نشاور أهداب السحاب اللي عجز يرتاح=يحسب الصبح نور الشمس وهو ظلال وجناتك

العشب أذن الثرى .. والغيم صـوت السمـا =هـي كلهـا كلمتـيـن .. وكــل قــاع ٍ تسـيـل
حبيبـتـي كـانـك الـمـا .. قـلـت كـلـي ظـمـا=وإن صرتي أنتي ظما .. أصير أنا سلسبيل
مـن قـال بـس إن زيـنـك فـيـه كــن وكـمـا=ياروحـي أنـتـي مـثـال لـشـي مـالـه مثـيـل
يـاعـل عـيــن ٍ تـــرف بحـضـرتـك للـعـمـا=وياعـل عـز ٍ مـهـو مـاطـاك يمـسـي ذلـيـل
ماشفتـي النـور فـي حضـن الظـلام أرتـمـا=مثله ترى الحـب فـي حضنـك يـدوّر مقيـل
خليـك مـن كـل مــا .. أيــن مــا .. طالـمـا=حتى عيون المحـال .. تشوفـك المستحيـل
الزيـن فـي النـاس قـاع وزينـك أنتـي غمـا=وحتى علـى النـور لـك ولظـل ظلـك جميـل
ولو مامسحتي جبيـن الشمـس أبـد ماحمـا=والورد إلـى شـم عطـرك قـام عـوده يميـل
والخلق من طين ونـور ونـار وأنتـي بـمـا=والا الهوى به خلـق لـي هالخفـوق العليـل
شفتي الـى مـن كبـر شـوق الحبيـب ونمـا=تلقـيـن لمـعـه لدمـعـه فــي عيـونـه تخـيـل
حبيبـتـي كــان قـلـبـي بالـضـلـوع احـتـمـا=لـك رمـش مـن حربـتـه مايسـلـم الا قتـيـل
والعشـب وجنـة ثـرى والغيـم شـفـة سـمـا=هــي كلـهـا بوستـيـن وكــل حـــبٍ يـسـيـل

أنـا خـبـري بـهالورده وهــي بيضـا قـبـل مـا أجيك=و لـكـن مـن خـجـلها جـيـت أقـدمـها لــك أحـمّـرت
يـفـزّ العـشـب مـن صحرا لها جــاب الـبـدو طاريك=ومـن يـقدر يـلــوم أرضٍ وطيـتيـها لـو أخـضّـرت
حـبـيبي والـجبل وادي .. وقـــف بــقـدومـك يحييك=حـبـيـبي والـكـلام أطـفـال هـابـت حـسـنك وفـرّت
أحـبـك والسما بحـرٍ .. ســما يـومه غـسـل رجـليك=ولو ماأنك لـمـست الـشمس مأشتعلت ولا أحترّت
أحـسـب أن الضحى ظــلـك وأعـرف أن القمر باقيك=وخـدك عذر لأحـلى البيض لـيـن أقبلت وأسمـرّت
وأنـــا لأشتـقـتـلي وجّــه ســـواد العـيـن يـم يـديـك=وإذا مـاني بهـا فـأعرف تــرى أهدابك علي مرّت
وإذا إن الـشـمس طافبها كـواكب فـأنـت ما يكـفـيك=تطـوفــبك الـمـجــرات وكــواكـبـهــا ومـا جــرّت
حبيبي مأنت الأحلى .. أنت الأحلى خذ بعض مافيك=حـبـيـبي والليالي لـــو تــناثر شـعــرك اشـقـرّت
وأنا مدري ورا الـورده مـعـك حـمـرا بـلا تـشـكـيك=ولـكــن خـذتهــا منّك بـأشـم العـطـر وأصـفـرّت

من كثر شوقي لك سبقت لك الأيام =صرت الخميس وتوها الناس الأثنين
ياغمضة عيون المسا كل مانام=يبدا الفجر من ضحكة شفاهك يبين
وعيني من أشباهك لها أنفاس وأحلام=وتنبت لجفني كل ماشفتك يدين
ياكلمة ٍ ماجت على بال الأقلام=كن المحبه والوفا لك معي دين
أصبر علي بالله يافجر الإلهام=وأنا الله أعلم جيت من وين ولوين
أجيك وأنسى ظلي هناك ماقام=وأترك نظر عيني معك وآخذ العين
ياسندرلا .. والعمر سبعة أقزام=وقلبي سفينه .. والمجاديف ضلعين
فيني وله ..فيني بكا.. فيني هيام=وفيني شعور أني لوأتعب تحسين
وياحفلة الدمع بعيوني .. والأوهام=ماطرّوا المسرى ضيوفك إلى الحين
أما أحسبيها ليله أطول من العام=وإلا أكتبيها ساعه إلا أربع سنين
وأنتي تموت بوصفك حروف وأرقام=تكوين.. لكن.. مايشابهك تكوين
وأنتي عيونك شرك وأهدابك أصنام=وأبليس ثغرك .. بس شعرك شياطين
وأنتي بلونك غابنه كل رسام=وكن القمر صورتك من غير تلوين
وأنتي سحر ماحرمك دين الإسلام=دمك عطر وإلا الضيا لك... فساتين
إن قلت أحبك .. تلبس حروفي حرام=وأن قلت أبيك .. أحس للقلب رجلين
والعام جيتك .. والصدر سجن الأيتام =وقلتي لي أصبر .. ها صبرنا .. وبعدين
واليوم من شوقي طمرت أربع أيام=وأمسيت سبت .. وصبح الناس الأثنين