.....
كومة غباء تمشي على الرجلين
أو كومة قلق
وين الرفيــق بها الطريق
وين الطريــق المحتمل في ها لزمن
الأرض وعرا والنوايا طيــن
تحت أجساد خدرا
ما ترى فيهم رمق
والغافلين كثار!!
طنش!
لا تصحيهم عساهم للغرق
اضحك والناس هم الناس يا عزوز!
بعضهم قطعان صيـــف ويعبرون
وبعضهم مبطي نفق
لا يشغلونك بالوفاء
الضمير اللي غفا
عقب اليســـوع والمصطفى
ولا يخدعونك بالعبق
والحقيقة
الحقيقة نور كـوّر شعلته رب الفلق
والزيت يعمى مهو لأي إنسان يا عزوز
نور الله
نور الله اللي صدق
وأن جاك راعي مصلحة لا تجرحه
لكن تغابى وانصحه
أو امسحه من جبهتك مثل العرق
والذوق
خل الذوق للي هرجته مثل الحرير
ومهجته مثل الخَرق
الذوق صار لباس يستر عورة الإحساس
يا عزوز
والصبر انفلق
وأنا طفشت من السكوت وطيبتي
وطالت بعيني غَـيبتي
وأخاف أفجر حِـيرتي
وأغيِّـر ألوان الشفق
يا لعنبوها دنيةٍ ما تمهلك
هبلةٍ تجيك مِغندرة تستهبلك
وأنا إلكْ طَقّتْ حَنـك
يا الشاعر اللي ما سمع همسة جمادٍ إلا نطق
ولا خفوقٍ إلا خفق
وإن طحت يومٍ بيدها!
غِض الرجاء عن ودها
إما يبيدك ثلجها
أو تحرقك في وهجها مثل الورق
والله رزق
والله فرق
والله خلق
ومن العلق كومة غباء
تمشي على الرجلين
أو
كومة قلق