ما به مقارن بين روضة ودارين= الفرق واضح والحلا بالقصيره
الحق حق وأكثر الناس دارين=إن الأميرة دوم تبقى أميره
سلام يا رمز الحلا والمزايين=سلام والمرسل مشاعر مثيره
ثارت من القلب الهواوي براكين=وسارت ودارت في ربوع الجزيره
واضفت على دار الظبي قبل يومين=مع شاعر المليون تبدا المسيره
واستقبلت من اقبلت تنقل الزين=يا مرحبا يا مرحبا يا مديره
ورده وأحلى من جميع البساتين=شمعه وتبقى بالحلا مستنيره
يوم اقبلت رجت عقول الرزينين=وكل ٍ يردد قال يالله خيره
وانا الصراحه قمت ومبزر العين=قالوا خطيره قلت والله خطيره
قالوا ترى روضة تفوق الملايين=قلت اسكتوا يا اهل العقول الصغيره
أدري طويلة طولها تقل مترين=لكنها بالزين ما هي خبيره
تلطخ من المكياج من ليل الاثنين=ومـن الصباح الين حد الظهيره
صحيح كنت أذوب لا قالت احين=لكن حلا دارين ما اريد غيره
ذوق وأناقه باللبس والفساتين=عقل ورزانه بالحكي مستديره
يا خوي روضة وين والزين ذا وين=هذا الجمال وخل عنك الفقيره
الزين يبقى والفنا دوم للشين=ودارين تبقى في عيوني أميره
يا جوهره ما يشترييها الرديين=يا غاليه يا راقيه يا كبيره
تستاهلين العشق واغلى الدواوين=واليوم بكتب لك من الحب سيره
واغيض عذالك ولو هم كثيرين=وادعي على عين الحسد بالضريره
تدرين وش أنتي ولا اظن تدرين=أنتي القمر والكل حولك تنيره
حسنك سطا قلبي وفزتي بشيين=القلب حبك والمشاعر أسيره
واعلنت انا تصريح وقلته بشطرين=يخصني واللي يبي يستعيره
أكبر هديه هالسنه شوف دارين=واول فشيله طردتك يا منيره(1)