يا منهك الحـال فينـي نـوّخ ركابـك=وش بك على باشة الدنيا مضايقهـا ؟؟

ما عادها الغالية تقوى مـن امْصابـك=وانته مسلّـط عليهـا مـا تفارقهـا !!

على لهيب العتـب بكثّـر اعْتابـك=حتى غيوم (( الشفا )) ينهـلّ صادقهـا

هذي عليها الغـلا والشـوق متشابـك=ولا رِكِز فـي الخفـوق الا بيارقهـا

وكان العرب ساقوا الاموال في سابك=فـ انا فدا راسها والـروح سايقهـا !!

يا شمعة الكون جعلـي فـدوة ترابـك=وجعلي فدا مغرب اهْمومك ومشرقهـا

إلى متى يالغـلا والحـزن ينتابـك ؟؟=إلى متى والعيون الدمـع مغرقهـا ؟؟

اطوي فصول الحزن من صفحة اكْتابك=وانـا بحـرّر بيـوتٍ لّـي موثّقـهـا

مضمونها يالمرض شفني علـى بابـك=خذ من سنينـي فدا راحة دقايقهـا

وانا أوعدك يا مرض وان طوّل غيابك=أكون وافي معك .. بس لا تضايقها !!