ياليلـةٍ قضيتهـا عنـد محمـاس=
ماهيب عندي من حسـاب الليالـي
قضيتها في مجلسٍ يرفـع الـراس=
منصاً يرودونه شخوص الرجالـي
على مباهيرٍ علـى النـار جـلاس=
صفـرٍ تعاقبهـا يديـن العيـالـي
يعبا لها مارود صنعـا بالاكيـاس=
ويشرا لها الهندي ولو كان غالـي
فنجالها يطرد عن البال هوجـاس=
لاقـام يـذرف مثـل دم الغزالـي
قد وصفه قبلي كثيرٍ مـن النـاس=
منهم ولد حامـي عقـاب التوالـي
اللي بوصفه لاحسن الوصف لماس=
غازي فـدوه قصيريـن الحبالـي
ليلة عمر ماهيب تنقـاس بقيـاس=
ولاتنتقـدر بالذهـب والريـالـي
للشعـر طلابـه وللبـن حمـاس=
والعود الازرق له علينـا ظلالـي
بحضرة بني غازي وساير وغملاس=
وابوفهـد شامـان نعـم المجالـي
وابن بجد وحسين عدمين الاجناس=
ربـعٍ منازلهـم بـروس العوالـي
ومحمد بن دحيم مانيب اله نـاس=
طيب واعده واحـدٍ مـن خوالـي
واللي جمعنا جاره الله من البـاس=
فـي ليلـةٍ غـرا قمرهـا يلالـي
اتلا الليال اللي طوى دونها الياس=
الـذ واغـلا مايـدور بخيـالـي
يالله عسى محماس وامثال محماس=
في لوح ربي من طـوال المهالـي
رد محماس على عبدالله
للطيب من يمك يابن عون نسناس=
وافي يابو نايـف بكـل الحوالـي
ياطيب الرفقـه وياطيـب السـاس=
ياللي تحـلا بالوصـوف الجزالـي
منه الوفا اللي تعتبر فيـه نبـراس=
وعشق المزايا الساميه والمعالـي
وافي والك في قمة الطيب مجـلاس=
ومن كل منهج معرفه لـك منالـي
ترقا سنود اليا اختفى كـل هـلاس=
وتنفق ولو شان الدهـر ماتبالـي
شاعر وشعرك لاعذب الشعر مقياس=
يوصف علـى عـدٍ قـراحٍ زلالـي
عد الروى هداج ماهـوب هسـاس=
غير الرها شربه على الكبد حالـي
والليله اللي تعتبر بيـن الاقـواس=
تاتختلـف عنهـا لوانـي لحالـي
فيها يبـدد حستـه كـل حسـاس=
بوجودكم ياهـل اليمـان الطوالـي
واللي لسلسات الطواريـق نـواس=
مـن جزلهـا مايلتفـت للهزالـي
اليا تعانق شعر غازي والاحسـاس=
من الرها وصفه يفـوق الخيالـي
دنياك لذتها المواصـل والاونـاس=
اليا استمرت بيـن ربـعٍ غوالـي
ربعٍ مجالسهـم معـزه ونومـاس=
ولمثلهـم يرتـاح بالـك وبـالـي
ناخذ بها سجه قبل مخف الارماس=
والانهايـة كـل شـي الـزوالـي
يالله ياللي فالجسد تجري الانفـاس=
تكتب لنا التوفيـق يـاذا الجلالـي
واسلم ودم بالخير ياطيب السـاس=
وافــي ولله الـوفـا والكمـالـي