ّّّّّ.. صاحبي؟! ما يضحكك بالجرح غير اعذاره ..ّّّّ..

صاحبي؟! ما يضحكك بالجرح غير اعذاره
و انت جرحك لا مموتنـي و لا محيينـي

و مـا يبكـي القبـر الا لامشـوا زوّاره
لا مسحت غبـار اخـر حفنـه بكفينـي

ودام ودك تدفـن اللـي بيننـا باسـراره
ادفنـه! ولا انـا كيـف ادفنـه بيديـنـي

يوم انا بانيه مـن ساسـه اليـن جـداره
وكـل ذرة ملـح فـي تركيبتـه تعنينـي

لك عليّ.. اشغّل "السـي ديـه" بالسيّـاره
وابكي ابكي لين اصب القلب من جفنينـي

و لك عليّ انسى علوم الوصل بالقطّـاره
و لك عليّ اكسر خواطر كل ربعي فينـي

ولك عليّ اطر ذكر الخير فيـك طـراره
ولك عليّ ارضيك لو رضاك ما يرضيني

صاحبي؟! و اللي يحط الطعـم بالسنـاره
احسن انه لو يصرح فيـه عينـك عينـي

ماني مجاوب علـى نظراتـي المحتـاره
خلّها و تضيع مـا بيـن المرايـه وبينـي

خلهـا تشغـل حلـوق العالـم الثرثـاره
ولا انا مـا هيـب تسمنّـي و لا تغنينـي

رح فمان الله وجه ابيض و طيب بشـاره
لا تراعينـي بعينـك ليـن مـا تخفينـي

واعرف انك لو تلف الارض حاره.. حاره
وين ما تلقـى ملامـح طيـب بتلاقينـي

و اعرف انك لـو تضيـق بدنيـةٍ دوّاره
ما تشـوف الا و يدينـك وسـط يدّينـي