الرائع كلاش (راشد العتيبي )

كل ليلة تعدى والسهـر كـل ماله= يزرع الشوك في عيني وينبت لعينـه
ضاق منه الرحيب وطول الليـل بالـه= والهدب للهدب يـروي حكايـة حنينـه
من شقى وقتي اللي كل ما اسـج دالـه= هد ريح القلق واهتز غصـن السكينـه
راح فكري على البيت الكبيريحدى لـه = بيت شعري مدينـه لا زهقـت المدينـه
جيته انسان يونس وحشته من ظلالـه = الظما عن شماله والدهـر عـن يمينـه
ان سكت عبّرت عينه على لسان حالـه = وان حكى خاتمة صوته على مسمعينـه!
وان سعى للهوى من كتم الانفاس واله = وقف اكسيد كربونه وطـاح اكسجينـه
خاطره بيـر ضيقـه لا دلـي ومحالـه = كل ما تـارده فرحـة تصـدر حزينـه
اقرب الناس "لا مر الفرح فـي خيالـه" = ضاع فالناس "لا بيّـح زمانـه كنينـه"
مابقى له من الاحباب في من بقـى لـه = غير من يرسم الضحكه بهمس اصبعينه
عاش عابر سبيل ومزهبه طيـب فالـه = كل همه رضـاء ربـه قبـل والدينـه
يمضي العمر وايامـه تسابـق ليالـه = والزمن قسوته تكسر مجاديـف لينـه
فقر الانسان ماهـو قـل حالـه ومالـه = فقر الانسان قـل اخلاقـه وقـل دينـه
ايه زايمت كاس المـر حتـى الثمالـه = بس ما اقول سوّتها الظروف اللعينـه
الفـراق اولـه علّـه وتاليـه عـالـه = خص لا مزع مهاد اللقـاء قبـل حينـه
كبر هم العمى من فجعته فـي عيالـه = ثقل تنهيدة المديـون مـن هـم دينـه
وين هاك الرفيق السمح قفـت جمالـه؟ = قاع قلبي خلا ونفـوس الايـام شينـه
اتشوّف وارد الشوف واعيـش حالـه = تشبه الحلـم لكـن المـواري غبينـه
والله انه مسـوي فـيّ خيـر وجمالـه = قبل لا اعتق عليه من العيون الرهينـه
المشاعر تربت وافلحـت مـن خلالـه = والقصايد تشكّـل ورد فـي راحتينـه
كثر ما اغرقني جروح وتباعدت جالـه = كثّـر الله شوقـي للبحـر والسفينـه
ومثل ما زانـت محيـاه حبّـات خالـه = زينت قلبـي طعونـه وتسلـم يدينـه!
اكذب ان قلت ساحرني حـلاه وجمالـه = كل مافيه عـادي مـن قدمـه لجبينـه
اللي يميـزه من بــد جنسه لحالـه = انه اول واخـر من قراني بعيـــــنه
كل ما املك من احساس المحبه حلالـه = من هنا لين تستـاذن سنينـي سنينـه

الشوق عمره طويل ولا علـى الصبـر زود=وان طال عمر الجفاء جف القلـم والكـلام
اخايـل الشعـر وبروقـه حديـث الرعـود=ويسمي الخير وجروحـي حديـث الظـلام
ما اقول صدري هو اضيق صدر في هالوجود=لكني احس بيـن ضلـوع صـدري غـرام
لو للمقاديـر مـع وجـه البـن ادم وعـود=ان كـان مـرت مصايبنـا مـرور الكـرام
لقيت عمر الفرح ينقـص وحزنـي يـزود=وانا علـى ايـات حـال اعاملـه باحتـرام
طبيعتي لا انكشف ستر الزمن عن جحـود=امد لـه غصـن زيتـون وحمامـة سـلام
القلـب بستـان طيبـه والعـواذل حشـود=تغانمونـي لحـم واستكثرونـي عـظـام
ان عرضوا لي سموم الهـرج هبّيـت نـود=وان طمنوا روسهم راسـي خـوي الغمـام
من رحمة الله مـا نقـرا عيـون الحسـود=ولا نشوف المغطّـى فـي صـدور الآنـام
ولاّ كثر مـا تشيـل العالـم قلـوب سـود=ماعاد يبقـى علـى الدنيـا خـوال وعمـام
اعيش جـو السعـاده بالدعـاء فالسجـود=لاطـرّف الليـل ثلثينـه وعــز المـنـام
الله يخلـي لقلبـي ضحكـة اربــع ورود=ويقر عيني بشـوف النـور عقـب العتـام
ياليت شعري ,, الا ليـت الليالـي تعـوود=يـوم التجافـي دقيقـه كنـه فـراق عـام
اسألك باللـي جعـل كلـك رهـاوة عـدود=لا تبطي عروق قلبي مـن قراحـك حيـام
من يم دمعي حدر والضيـق يرقـى سنـود=لو قلت لك طيـب وكلـش علـى مايـرام!!
صدقني انـي فقدتـك والجـوارح شهـود=ارجـوك لا تعتبـر بعـدك سبيـل انتقـام
أي والله اخطيت في حقـك وجيـت مهـدود=اشيـل عـذري لعـل العـذر قـد المقـام
اخطيت والبعد يوجعنـي ولا انـت محـدود=تحـط بينـي وبينـك فالمحـبـه نـظـام
لو الخطاء بين خلـق الله جـزاه الصـدود=ماعاش فـي هالزمـان الاّ عيـال الحـرام
عشت الغلا فـي شبابـه لا تخليـه عـود!=والعود ما يطلب الله غيـر حسـن الختـام