نهاية مزاجي شجاع ..

مزاجي · #1

.... نهايـة رجـل شجـاع ....

الموضوع شوي طويل بس لاحد يطلع الا وهو قاريه
--------------------------------------------------------------------------------

مساكم الله بالرضا والعافيه !!

الدنيا هذي يا أخوان كبيره ... من جد كبيره مرّه ... وتخلي الواحد بعض الاحيان يفهّي ويقعد له ربع ساعه يهوجس ... وهو يقول ..ياصغر الدنيا ... خاصتن لاقابل له واحدن مبطي عنه ... وجلسوا يسولفون بسواليفهم من أول ... والمواقف اللي صارت لهم من زماااان <<< مسوي اسلوب تشويق للقصه

مالكم بطول الدندره .. والهذره !!

من يوم وانا صغير .. كانوا اهلي يناظرون فيني نظره طموح وأمل ... حتى أبوي كان يجيب أكياس الرز والسكر ... وهو يقول .. أزرع هالحين تحصد بعدين !!
وانا أراكض وراه واردد ... ما ادري وش يقصد ... وكانت أمي تحنّي يديني لاجيت من المدرسه ملعوّن خيّري من المدرّس او المدير عشان واجب ماحليته والا شي ... وترفع من معنوياتي وهي تقول ... الطق للرجال ... والعلماء كلهم ترى كانوا ينجلدون جلد التسلاب ... وتبدى تسرد علي سواليف الف أرنب وأرنب ... كل هذا لغايه في نفسها ... ما كنت ادري وش كانو يحترووون منّي !!

تخرجت من الثانويه .. على الشميسي علطول ... بثلاث أصابع في كل يد (( من الطق اللي جاني

)) ... وانواع العاهات ... وكان كل اللي يهوّن علي ... رفع امي وابوي من معنوياتي .. والا تسان من مبطي طالعن من المدرسه ... ومتوظف بكبينه بمرتبة ملحط

دجّيت وانا ادور على جامعه تقبلني ... او كليّه تضّفني ... لو على الاقل أستلم المكافأه حقتهم ... مهوب لازم أزاحمهم وادرس معهم ... تعبت من السربته والدشره والطفره!!

بدى يحس ابوي ان جلستي بالبيت مالها سنع ... واني ضيّقت عليه خاصتن لاصار مقابلن خشتي اربع وعشرين ساعه ... صايرن عنده بالبيت تقل ثالول .. ما ياخذ راحته بلحاله !!

وبدى يقلّبها في راسه ... ويجيبها يمين ويسار ... يبي يرسلني برّى اكمل دراستي واشوف نفسي ...
وياخذ راحته هو بعد بلحاله...

المهم ... في نهار من الانهر ... وعقب ذيك الغدوه اللي عقبتها بلبن ... وانا جالسن بالملحق بلحالي أتاغر من زود الفضوه

... وأفكر بحال هالدنيا ... يوم دريت والا باب الملحق يطق على غير عادة ... تقمصت الدور وسويت نفسي مهم ... وقلت انا مشغول !!

صارت العاده وانرجف الباب

.. ودخل ابوي يناظرني معصب ولا وده يزعلني ... وانا اتبوسم عليه واتضوحك تسني اقول ... شلونك صديقي
المهم جلس بجنبي ... وقام يناظر خشّتي ويبحلق انا بصراحه شكيت في نفسي ... قلت له وش فيك ؟

قال لي ... هالحين ياوليدي ماتشوف ان وجهك بدى يتعفط ... وخشّتك بدت تميل زود ماهي مايله ... كل هذا من جلستك بالبيت ... فااا وش رايك وانا ابوك تروح تكمل دراستك برّى كود الله يرزقك بوظيفتن وش حليلها ونزوجك ونفتك منك !! (( ما يعرف يفتح موضوووع أبد ))

سألته وين تبيني اروح ... قال لي أنا بصراحه من رائيي انك تروح الصين !!
(( ملاحظة : شايبنا يشوف الافلام الامريكية ويقول مابيك تروح هناك اخاف تدشر ... ويشوف الدش ويقول مابيك تروح مصر والا لبنان ولا ذيك الديار اخاف تدشر ... ويسمع البحرين ويقول مابيك تروح هناك اخاف تدشر ... مالقى الا الصين لانه مايعرف عنها شي .. على باله انه هالافانس ماعندهم خراب ))

انا بصراحه تسنها جازتلي السالفه ... خاصتن ان فيها كسر للروتين الممل ... نوم وتبّطح بهالملحق وان طلعنا برى بنتمشى ماهنا الا تفاتيش ... قلت له عطني وقت افكر .. بس تراني موافق
قال لي ... خلاص وانا ابوك زهّب عمرك على الاسبوع الجاي تطس ...

طلع من الملحق ... وبديت ازهب اغراضي وافك الشيشه وانظفها واحطها بالكرتون (( أخاف اتوهق هناك ما القى عندهم مقاهي )) ... الوكااااااد انه ماجاء موعد السفر الا وشناطي بالمطار .. تسنه عفش مطلقه

ركبت الطيارة وجلست عند الممر .. عشان لا فتحت الجريده تسني أتصفح كود تلقط يدي شيّن طارف ... وطارت الطياره وانا مجمّعن الجرايد والمجلات عشان اقراهن طول الطريق ... ما ودي شي يفوتني أبد !! جالسن تقل جمرك

وصلت الطياره وانا مستعد أسمّع لكم مقاسات اللي بالطياره كلهم ... حفظتهن من كثر ماجمركتهن ... المهم نزلت من الطياره اول واحد (( كلهم عيّو ينزلون قبلي )) ... وبالمطار كلهم ماشاء الله يشبهون بعض ... احس انهم اخوان ومغمضين والله اني خفت احد ينظلني على وسع عيوني

... تجمعو علي كم افنس وقامو يرطرطون على راسي مدري وش يقولون ... بس بتوارد الخواطر مع ربعنا .. اكتشفت انهم يقولون .. تكسي يالحبيب !!

ما عطيتهم وجه خفت انهم حنشل ... وتسوقني أذني لواحد يرطن عربي .. واقرب من عنده والقاه يتكّس بمطار الصين ... ويلتفت علي ويقول ... بدّك سيااااره !! انا قلت له .. اييييييه (( اعرف اتفاهم معه وابيه يدلني على الزين علطول ))
ركبت معه بالموتر وقال لي .. وين بدك تروح ... قلت له هالحين ابي اقرب فندق وعقبها ابي اروح للبـــار
مشى بالموتر وبالطريق طلّعت بكت الدخان ومديت له زقاره .... وانا اولعها له سالته الا ما تعرفنا يالحبيب !!
قال لي .. انا درويش من سوورياااااا وجاي هون بدي أشتغل واجمع لي مصااري .. قلت له والله والنعم ..تصدق عاد انا خوالي سواريه (( ما عاقت ))

تسنه ارتاح لي وقام يسولف .. سألني شو بدّك جاي عـ بكين !! قلت له والله ادور لي مكان ادرس فيه بس ماضنّتي ابدرس ... ياخي احس اني طفشان وودي انبسط .... التفت علي وعطاني نظره عقب ما نزّل نظارات الفناجيل حقّته شوي وقال ... وشو بدك عشان تنبسط !!
جاوبته قبل ما يكمل سؤاله ... وعطيته القائمة اللي ابيها ... جميع اصناف الدشره الموجوده هنااااك ...
ابي اجرب الخراب بالطعم الصيني !! ما قصّر الرجال .... وطلع يدّل السواح على مبتغاهم ... وصار احسن صديق عندي ...
وعزمته مرّه عندي بالشقه وجاني ومعه واحدن من اهل البلد ... بس من شكله انه رهيب لأنه مسكسك وصايرتن سكسوكته تسنها طرف جديله بنت النور !! سألت درويش منهووو ذا .. قال لي ... هذا خويي في الصين ويعرف يتكلم عربي ... سلمت عليه وقلت له ... مزاجي من الرياض !
فتح عيونه ومدّ يده وقال ... شونغ لو من بكين ... جتني ضحكه بس كتمتها ... قلّطتهم وسألت شونغ لو .. هالحين عندنا بالسعوديه اهل نجد يقول عن نفسه انا نجدي ... واهل الحجاز يقول انا حجازي
انت من بكين ... وش تقول ؟؟؟؟؟؟ <<< تفكيري ماش مهوب زين

حمرّت خدوده واستحى ويقطع دوريش السالفه ويقول ما بدكووون تسهروووو برّى !!

رحت ولبست وضبّطت عمري ورحنا للمرقص مع هالصيني بصراحه خفت ما يدخلونه بس طلع عادي .. ما عندهم نظام ( أقل من 18 ) .. واسفهلينا بالمرقص

وخذ مناقز وردح وفلّه حجاج

مع انه ماندري وش يقولون هاللي يغنون .. بس انت سبّلها وهزّها

ومع هالفلّه قاروره رايحه والثانيه جايه الين صرت احسن واحد بالمرقص (( بالنسبه لي ))

... وصرت احس ان جسمي خفيف وراسي ثقيييييييييل ... ومبسووووط مررررررره
انسدح عليهم على الطاوله ماوعيت الا وانا على فراشي ..

صرت بالصين دشره وفلّه حجاج وآخر شي ممكن أفكر فيه الدراسه ... وابوي مغير يكزّ لي من هالدراهم وانا اقول له ... ترى مصاريف الصين غاليه ... و مجمعّن هالمغنيات عندي بالشقه

ورقص ومطامر وفلّه حجاج !!

قرب موعد رجعتي للرياض ... وابصراحه كنت ناقلن همّ ان ابوي يسألني وش استفدت هناك .. وش اقول له .. اوريه الوشم اللي في بطني

... والا اطلع له صوري بالشقه ... ضاق صدري .. ويجيني درويش وابدى افضفض له .. وانا احط الثلج لأني أحس ان العصير بدى يحرّ الحلق

قال لي درويش ... شوف بدي ألك شغله ... انا عندي حلّ كتير حلو .. بعرف معهد بيعلم مبادئ العلاج بالابر الصينيه ... انت روح هناك وأدرس اسبوع واحد وبتروح لأبوك بتقول كنت أدرس طبّ هناك !!
وهيك ما بيعرف لأنووو معك شهاده مصدقه !!!

جغّفت درويش من زود الفرحه ... وقمت ارقص مثل رقصه (( البرتقاله )) من زود الأسفهلال !! وسعه الصدر واركب السياره انا ودرويش ويوديني للمعهد اللي هو يعرفه واسجل بأقرب دوره اللي كانت تبي تبدى من ثاني يوم

واعزم درويش وشونغ لو ذيك الليله بمطعم صيني (( يقال لي اتفيخر عندهم .. مادرو ان هذا اتلى ماعندي )) ... وعقب ما خلصنا قلت على المرقص هالحين ... حساااابكم علي !!

ومن قبل ما ندخل المرقص تشوفني اتروقص واهزّ عليهم ... خلاااص الدعوه انحلّت والفلّه حلّت !!
وطلبات رايحه والثانيه جايه وهات يالفله ... وأشتغلت شغل ربعنا بالتنقيط على الصينيّات وهم يحسبوني مغرور أذب حسابي على الارض ... ماعندهم شغل تنقيط

راح أسبوع المعهد تساهيل .. يومين غياب وباقي الايام اروح مواصل ... وما اوصلهم الا متأخر
(( سعودي أصلي ))

جااا يوم الاختبار .. وازهب براشيمي وتسهّلت يالله لك الحمد ونجحت .. وادق على ابوي طايرن من الفرحه ..ابشرررررررررررررك يبه نجحت واسمع امي حوله تزاعق وتصفّر !! طرت من الفرحه احسبه عشاني .. بس طلع محمد نور جايبن هدف (( امي اتحاديه ))

حجزت رجعة للرياض ... حاطن شهادتي بمخباتي .. وكالعاده بالطياره .. جالسن بالممر .. ذيك الرحله كلهم عاقلين مرّه مافيه أحد قام من كرسيه ... والمضيفه تستأذن إذا جت تمر من عندي ...

وصلت لمطار الريااااااض وأخذت لي ونيت تكسي ... ورحت لبيتنا طايرن من الفرحه ... اخيرااا جبت شهاده ارفع بها راسي (( جحد أيام الدشره هناك .. وسوّى فيها ما يرفع راسه من كثر المذاكره

))

دخلت البيت والقى عند ابوي ثلاتتالآف شايب بالمجلس .. ما ادري وش عندهم سلمت عليهم وحبيت راس ابوي وجلّسني ابوي عنده بالمجلس .. وقال
هذا ياجمااااعه ولدي اللي قلت لكم عنه .. وانه صار تختووور وجابوه بالتلفزيون ... وصار يدرّسهم هناك بالصين (( الله يهديه ابوي ما يعرّف يبهّر بالحتسي

))

قاموا الشيبان وتجمّعوا علي .. اللي بعصاه واللي يحبي واللي مدري وش به كلهم يبون يتعالجون عندي ... ما اخفيكم اني توهقت فيهم ... والتفت على ابوي والقاه فاكّن كشرته علي مبسووووط على باله اني اطلق واحد بالعالم !!

حسيت بالوهقه مضبوط وقلت لأبوي .. خلاص مايخالف انا بعالجهم بس انت دخّلهم علي بالمقلط واحد واحد .... ويصفّهم ابوي سرى واروح وقتها سلّمت على اميمتي وحبيت راسها ماامداها تهرج الا وانا ضافّن شنطة الخياطه حقّتها

!! ودخلت المقلط وانادي بصوت عالي .. المريض الاول

دخل علي الشايب وسألته وش فيك ياعم ... وش تشتكي بالضبط
قام يتلّفت الشايب وقرّب لي ... وقام يهمس ...وانا عمّك ابي شي يبيّض الوجه ويساعدني .. ظهري وانا عمّك مهوب مثل اول ... ابي تالي الليل ما اسمع الا صرااااااااااخ
انلحس مخي ... منهبل هالشايب والا وش سالفته .. عقب هالعمر يبي يسمع الصراخ !!
قلت له .. ميخالف انا بعالجك بالابر الصينيه بس انت انبطح هالحين وانا ابغزّ هالابر بظهرك عشان يستنشط ويضبط وضعك .. ابكرب صواميلك .. ما امداني اكمل كلامي الا الشايب فاصخن فنيلته ومنبطح على بطنه وهو مبسوووووط

قمت اتذكر الكلام اللي كانوا يقولونها بالمعهد ووشلون أغزّ هالابر ... واسمّي بالله واتويقع لهالابره في وسط ظهره !! وأغزّها وانا مغمض عشان ما استاحش من المنظر !! وعلى زعقّت الشايب راااااح صوته !!

يوم فتحت عيوني والقااه مغمض ولا يتحررررك !! حسيت اني جبت العيد !! واشقله واحطه بطرف المقلط وطلعت عليهم .. شوفو يا اخوان انا الحين تعبااان مرّه من السفر ... والرجال نايم خلوه يرتاح وبيقوم بكرى أنشالله وهو متعافي ومبسوووط ... راحو الشيبان وكل واحد بيده كرت موعد
(( مزّهبن عمره من مبطي شايبنا))

واطلع من البيت وأقص تذكره رجعه للصين أدور النحشه لأن الرجال شكله ودّع ... وكالعاده جالس بالممر أمارس هوايتي بالجمركه في سيب الطياره ... من زود القراده ان ذيك الطياره محد ركب فيها.. مافيه الا انا وواحد حاطينه لي (( على اساس انه مضيف )) واحد أسوووود مررررره كحلة تقل ثور ... طوله الظاهر ثلاثتمتاااار ... شكلهم جايبينه بشبك بلحاله !!

قمطت العافيه وتركت عنّي شغل الجرايد لانها صارات مكشوفه ... ونمت الين وصلّنا لمطار بكين (( يالبيه يابكين )) .. وقبل ما انزل من الطياره طلعوا علي الشرطه ولقطوني من كرسيي وهم يتساسرون وانا طايرتن بوهتي ما ادري وش السالفه ... ركبوني السيااره وطارو بي على مركز الشرطه حسبتها عمليه خطف ... عاد وهم بالطريق اتميلح عليهم على بالي أشبكهم ... اقول لهم ... ما ودكم نروح نسهر سوى ... وهم عشاني ما افهم على كلامهم يردون علي بيديهم ياعلّهم الكسار ... الوكااااد انه عقب ما دخلت ذاك المركز عيني ماشافت النور .. ما تشوف الا وسم الخواتم في وجهي ... صايرتن خشتي تسنها كاريكتير للهليل من كثر البقوس اللي جتني ... كارتيه وجودو وكونغ فو وشونغ لو و سي شانغ كل فنون القتال تعلموها على خشتي .. والله اني اعترفت لهم بكل شي سويته وما سويته ... جاني المترجم عقب ما انلعن خيّري يقول انه جايهم بلااغ عني بالهروب ... وانك مطلوب للسلطات السعوديه !! دريت اني رحت وطي ... وان الشايب راح فيها ... لكن ما اقول الا حسبي الله عليك يادرويش قريح ... لو انك خليتني اكمل دشرتي وافلّها وارجع لأبوي مافي راسي شي .. هو صدق بيهزني وبياكلني بقشوري .. بس فتره وينسى ..

وانا الآن في سجن شنغهاي العظيم ... وتمت أجراءات رجوعي للسعوديه ... عشان ربعنا يمارسون عاداتهم بالجلد والتمحيط ... وكاتبن ذا الموضوع من جوال واحدن صيني في العنبر اللي جنبي ..

واعــذرونــا عــلـــــى المصـــالــــــــــه ... والآطــــــــالــــــــه

مزاجي

الاقشر · 22-08-2005, 05:46 AM

هههههههههههههههههههههههههههههههههههههههههههه
ههههههههههههههههههههههههههههههه
ههههههههههههههههههههه
هههههههههه
هههههه
هه

والله شي طيب اجل جمارك وسهر وفلة حجاج

<<<< مزهب عمره بيروح للصين

الله يرجك يامزاجي على هبالك الرايق

تشااااااااااااااااورماااا ؛؛

المجهول · 22-08-2005, 06:28 AM

هههههههههههههههههههههههههههههههههههههههههههههههههه ههههههههههههه

انا بس عندي سؤال انت من وين تجيب هالأفكار المجنونه؟!!

حتى في شهار ماعندهم هالأفكار الا كانك لاقطهامن صيني

قسمن بالله تنسيم مابعده تنسيم وموضوعك يستاهل الخمس <<< حشا ذبيحه

مشكور يالغالي ولا تحرمنا من تواصلك وسلمني على العيال في شهار

تقبل تحياتي...

المجهول · 22-08-2005, 06:33 AM

يستاهل...

تقبل تحياتي...

رومنصي مشاكص · 22-08-2005, 11:21 AM

ههههههههههههههههههههههههههههههههههههههههههههههههه

هلا بصقيق هونج بن برج كنح

صقيق هارديز ههههههههههههههههههههههههههههه

ابداااااااااااااااااع وتأأأأأألق ... واسلوووووووب اطخم

قصصصة كطير كطير جميييييله .. الله يعطيك خيرها ويكفيك شرها

موضوع يصتحق التثبيت ..

الله يعطيك الف عافيه ولا تقاطعنا بختاتك الشهريه

تقبل خالص تحياتي

a7la_malak · 23-08-2005, 05:41 AM

ههههههههههههههههههههههههههههههههههههههه و الله مبدع و القصه راااايقه بس مجنووووونه يسسلمو مزاجى و ننتظر منك كل جديد

تحياتى
احلى ملاك

سلووتوو

بريــق المــاس · 23-08-2005, 10:39 PM

عاد انت الله يهديك يوم شفت انك ما منك فود وشوله تنكس للصين ورى ما رحت لديرة ثانيه عشان ما تنطلب هناك ولا طلعت للخرج وتنكرت بشخصية بعير عشان ما تنعرف تقعد لك هناك شهرين وتنكس ما يدري عنك احد ..
يله هالمرة راحت عليك المرة الجايه لا جيت تصن لك احد بإبرة علمن عشان احاول ادبر لك ختة منا ولا مناك ترى يمدحون الزحاليق الدهناء يقولون ما بهن لا جوال ولا رادارات يعني ما فيه امل يصيدونك لا السلطات السعوديه ولا البهارات الصينيه

تسلم يا بعدي على هالوناسة والله يوسع صدرك بالعافيه
بس خل عنك النشوق اللي تحطهن مع الشيشة تراهن يدمرن الراس
حووول ؛؛

مزاجي · 26-08-2005, 06:02 AM

يؤ يؤ يؤ

124 زياره ولابه الا 6 ردود

شكل الموضوع ماجازلكم

الاقشر · 26-08-2005, 06:04 AM

8
8
8

الا والله جايز لنا بس انت ما تابعه بالردود

<<< جني طلع من تحت الارض

فتى الرياض · 28-08-2005, 04:14 AM

ههههههههههههههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههه

من جد موضوع واحد منتهي
مثلك
ههه

تقبل تحياتي

نهاية مزاجي شجاع ..

من يوميات رايق1

أخر زمن حتى البزران يعرفون يغازلون

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق